სამხრეთ ოსეთში გაყიდვიდან ქართულწარწერიან წამლებს იღენენ
“კავკაზსკი უზელი”-ს მასალების მიხედვით
სამხრეთ ოსეთის შინაგან საქმეთა სამინისტროს თანამშრომლებმა ადგილობრივი აფთიაქებიდან იმ წამლების ამოღება დაიწყეს, რომლებსაც ქართული წარწერები აქვთ. ადგილობრივი შსს-ს პრესსამსახურის განცხადებით, 17 თებერვალს ”ორ აფთიაქში შემოწმების დროს, აღმოაჩინეს მედიკამენტები ქართული წარწერებით ვოლტარენი, ფლუკოლდ ნ, კრესტორი, ჰემორალი, კოლხური, ტოლარინ პლუსი და სხვები და უკანონო ბრუნვიდან ამოიღეს”.
• ახალგორი ისევ ჩაიკეტა სულ მცირე ორი თვით
აფთიაქების შემოწმება სამხრეთ ოსეთის მთავრობის ბრძანებულების თანახმად დაიწყო “ქართული წარმოების მედიკამენტების გაყიდვის აღმოფხვრის შესახებ”.
ოსი ძალოვნების ქმედებები მიზნად ისახავს დანარჩენ საქართველოსთან კონტაქტების გაწყვეტას ნებისმიერ ფასად, – განაცხადა ამ ფაქტის კომენტირებისას საქართველოს შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა.
“სამწუხაროდ, დაავადებებისგან არავინაა დაცული. წამლები სასიცოცხლო მნიშვნელობისაა ცხინვალის რეგიონის მთელი მოსახლეობისთვის … იმის გამო, რომ მედიკამენტებს აქვს ქართული წარწერები, ისინი ამოღებულია. ამ თვალსაზრისით, ისინი პრაქტიკულად უგულებელყოფენ ხალხის სასიცოცხლო ინტერესებსა და საჭიროებებს და ადამიანებს მსხვერპლწად წირავენ.” – მოჰყავს ციტირებს ქეთევან ციხელაშვილის განცხადება Civil.ge-ს.
წამლების ჩამორთმევა არის მიმართული ხალხის წინაღმდეგ და ამით არა მხოლოდ ქართველები, არამედ ეთნიკური ოსებიც ზარალდებიან, რადგან წამალი ყველას სჭირდება, მიიჩნევს მინისტრი.
სამხრეთ ოსეთში წამლები არ არის
აფთიაქებიდან ქართულწარწერიანი წამლების ამოღება იმ ფონზე ხდება, როდესაც ადგილობრივი მოსახლეობა მედიკამენტების ნაკლებობას უჩივის. “კავკაზსკი უზელის” ცნობით, სამხრეთ ოსეთის გენერალური პროკურატურა, პაციენტების საჩივრების პასუხად, სამედიცინო საწყობების, ცენტრალური საავადმყოფოსა და სააფთიაქო განყოფილების შემოწმება დაიწყო.
2019 წლის ბოლოდან, სოციალურ ქსელებში მომხმარებლის პოსტები გაჩნდა საავადმყოფოებში მედიკამენტების არარსებობის შესახებ, რის გამოც ცენტრალური რესპუბლიკური საავადმყოფო დეპუტატების კომისიამ შეამოწმა.
“ვესაუბრეთ ექიმებსა და პაციენტებს. რა თქმა უნდა, ექიმების თანდასწრებით პაციენტები თავს იკავებენ, თუმცა პირად საუბრებში ამბობენ, რომ საავადმყოფოში არ არის ისეთი საშუალებებიც კი, როგორიცაა ლეიკოპლასტირი და ბინტი, არათუ მედიკამენტები, რომლებიც საჭირო სრულფასოვანი მკურნალობისთვის.” – ამბობს კომისიის ერთ-ერთი წევრი.
”ჩემი ნათესავი ტრავმატოლოგიის განყოფილებაშია. იქ საერთოდ არაა ყავარჯნები, რომ ფეხზე დადგომა შეძლოს,” – თქვა ცენტრალური საავადმყოფოს პაციენტის ახლობელმა სერგეი კოჩიევმა.
“ექიმებს ვეუბნები, რომ მკურნალობა ჩვენთან უფასოა და წამლები განყოფილებაში, მკურნალი ექიმის დანიშნულებით უნდა მოგვცენ. მითხრეს, რომ სიამოვნებით მომცემდნენ წამლებს, მაგრამ ისინი უბრალოდ არ არის და არც ისაა ცნობილი, როდის ექნებათ”, – ამბობს საავადმყოფოს პაციენტი მარინა თედეევა.
