ცხინვალში ფიჭური კომპანიის ხელმძღვანელს "განძის მოძიების მიზნით უკანონო გათხრებში” ადანაშაულებენ
ჟანა თარხანოვა, ცხინვალი
ცხინვალში სკანდალია – ერთადერთი ადგილობრივი მობილური სატელეფონო კომპანიის ხელმძღვანელი “შავი არქეოლოგიური გათხრების” გამო დააკავეს. ადგილობრივი სამართალდამცავების თქმით, იგი ცდილობდა ისტორიული ღირებულების მქონე ნივთები უკანონოდ მოეპოვებინა. ამ ფაქტმა ბევრი ადგილობრივი აღაშფოთა. მიმდინარეობს გამოძიება – ძველი საგანძურის მოყვარულს 6 წლამდე პატიმრობა ემუქრება, მაგრამ ბევრი ეჭვობს, რომ გავლენიანი მეწარმე არ დაისჯება.
გამოძიების თანახმად, “მეგაფონი – სამხრეთ ოსეთის” გენერალური დირექტორი რომან კოვრიგა და მისი მეუღლე ერთად ჯავის რაიონის ერთ-ერთი სოფლის ეკლესიისა და სასაფლაოს ტერიტორიაზე “არქეოლოგიურ ფასეულობებს” ლითონის დეტექტორით ეძებდნენ. ისინი იქვე დააკავეს.
ამ საქმეზე წინასაგამოძიებო მოქმედებებს ცხინვალის გენერალური პროკურატურა აწარმოებს.
- სტალინი კვლავ ცოცხალია სამხრეთ ოსეთსა და აღმოსავლეთ უკრაინაში
- შეიძლება თუ არა პატიმრების ცემა? ცხინვალის გამოცდილება
- „იმ მინდორზე ოს ბიჭებთან ფეხბურთს ვთამაშობდით“. რეპორტაჟი გუგუტიანთკარიდან
ეროვნული პოლიტიკის, კულტურის, რელიგიისა და მედიის საკითხებში საპარლამენტო კომიტეტის თავმჯდომარემ ამირან დიაკონკოვმა კულტურისა და შინაგან საქმეთა სამინისტროს მოუწოდა აქტიურად დაიცვან ეროვნული მემკვიდრეობა.
”ისინი აწარმოებდნენ სამუშაოებს არქეოლოგიური ფასეულობების უკანონოდ მოსაპოვებლად, დაზიანდა კულტურული და ისტორიული მემკვიდრეობის ობიექტში არსებული კულტურული ფენა, რომელიც შედიოდა კულტურული ძეგლების ერთიან სახელმწიფო რეესტრში. დანაშაული ითვალისწინებს სასჯელს – 6 წლამდე ვადით თავისუფლების აღკვეთას ან ჯარიმას 1 მილიონ რუბლამდე (დაახლოებით 14,5 ათასი დოლარი),” – ამბობს დეპუტატი.
კოვრიგას ქმედებებმა მოსახლეობა აშკარად აღაშფოთა. ზოგიერთი მათგანი მის “გაძევებას”, “დაპატიმრებას” და “დახვრეტასაც” კი ითხოვს.
კომპანიას მოქალაქეები ასევე უხსენებენ “მეგაფონის” არადამაკმაყოფილებელ მუშაობას – მომსახურების მაღალ ფასებს, მუდმივი შეფერხებებსა და სუსტ ინტერნეტს.
”ეს ძალიან უსიამოვნო ფაქტია, ასეთი ამბები ამაზრზენია. არ შეიძლება იმის პატიება, რომ ვიღაცამ ხელყო კულტურული მემკვიდრეობა, საკუთარი გამდიდრების მიზნით ჩვენი ისტორიის გამოყენება სცადა.” – აღშფოთებულია ცხინვალის მკვიდრი ელვირა ბაგაევა.
თავად კოვრიგა ბრალდებაზე კომენტარს არ აკეთებს. მას და მის მეუღლეს გაუსვლელობის ხელწერილი აქვთ დადებული და ცხინვალს ვერ დატოვებენ.
”რომან კოვრიგა, სავარაუდოდ, თავიდან აიცილებს სერიოზულ სასჯელს, რადგან გავლენიანია,” – თქვა, პარლამენტის ყოფილმა წევრმა როლანდ ქელეხსაევმა.
მისი თქმით, “აქ კანონი ყველასათვის ერთნაირად არ მუშაობს.”
ყოფილი სამართალდამცავი ალან იკაევი სკეპტიკურად უყურებს კოვრიგას დაპატიმრების შანსებს, თუნდაც მისი ბრალეულობა დამტკიცდეს.
”გამოძიება მიმდინარეობს. ჯერჯერობით მისთვის არანაირი ბრალი არ წაუყენებიათ. არ არის გამორიცხული, ბრალი ვანდალიზმის უფრო მსუბუქი მუხლით წარედგინოს. ეს ყველაფერი გამოძიებასა და მართლმსაჯულებაზეა დამოკიდებული.”
კოვრიგას და მისი მეუღლის მიმართ სისხლის სამართლის ან ადმინისტრაციული წარმოების დაწყების საკითხი საგამოძიებო ორგანოების პრეროგატივაა. ყველაზე სერიოზული მუხლი, რაც მას შეიძლება მიუყენონ, არქეოლოგიური ნივთების უკანონო მოპოვებაა.
