ცხინვალში დეპუტატების დაშინება უნდათ? პარლამენტის სხდომას 200 სამხედრო დაესწრო

ოპოზიციონერი დეპუტატები, რომელთაც ცხინვალში ბევრი მხარდამჭერი ჰყავთ, ამტკიცებენ, რომ ხელისუფლება ძალოვან სტრუქტურებს იყენებს, რათა ისინი აიძულოს, უარი თქვან ადგილობრივ ციხეში, პატიმრებზე უკანონო ძალადობის უამრავი ფაქტის გამოძიებაზე.

ძალოვანი სტრუქტურის, მათ შორის, სპეცრაზმის (ომონი) 200 თანამშრომელი, კამუფლირებულ ფორმებში, შეიარაღებულები მივიდნენ 6 ივნისს, სამხრეთ ოსეთის პარლამენტის სხდომაზე.

იქ განიხილებოდა ხმაურიანი სკანდალი – წინა დღეს, ადგილობრივ ციხეში, 20-ზე მეტმა პატიმარმა ვენები გადაიჭრა ციხის ხელმძღვანელობისა და ძალოვნების მიმართ პროტესტის ნიშნად.

• ცხინვალის ციხეში დაახლოებით ოცმა პატიმარმა ვენები გადაიჭრა

• სტალინი კვლავ ცოცხალია ცხინვალსა და აღმოსავლეთ უკრაინაში

შეიარაღებული ძალოვნების დიდი ჯგუფის გამოჩენამ მკვეთრად გაამწვავა ისედაც არცთუ ისე მარტივი ვითარება პარლამენტის რიგგარეშე სესიაზე, რომელსაც დეპუტატების გარდა, პრეზიდენტი, იუსტიციისა და შს მინისტრები, ასევე, გენერალური პროკურორი ესწრებოდნენ.

„ძალოვნები შეცდომაში შეიყვანეს, ეს მათი დეპუტატებთან დაპირისპირების მცდელობაა“, – განაცხადეს პარლამენტის ოპოზიციონერმა წევრებმა.

34-დან 17-მა დეპუტატმა ხელი მოაწერა საპროტესტო განცხადებას, მათ შორის არიან სამი პოლიტიკური პარტიის წევრები – „სახალხო პარტია“, „ნიხასი“ და „ხალხის ერთობა“, ასევე, რამდენიმე მაჟორიტარი.

„ცალკეული მინისტრების უუნარობით გამოწვეული პრობლემების გადაწყვეტის მცდელობა (…) – ეს პროვოკაციული მეთოდები, რომელიც ამძაფრებს კრიზისულ ვითარებას ცხინვალის შიგნით.

ძალოვნები შეიყვანეს შეცდომაში და ამიტომ არიან განწყობილი დეპუტატთა კორპუსის წინააღმდეგ“, – ნათქვამია განცხადებაში.

შინაგან საქმეთა სამინისტროს საზოგადოებრივი უსაფრთხოების განყოფილების უფროსმა, მერაბ ფუხაევმა დეპუტატები პატიმრების უფლებების ცალმხრივად დაცვაში დაადანაშაულა და პარლამენტს ყველა მხარის მოსაზრების გათვალისწინებისკენ მოუწოდა, სამართალდამცავი ორგანოების ჩათვლით.

„დაუგეგმავი ჩხრეკა ჩავატარეთ, რომლის მიმდინარეობისასაც ჩვენზე განხორციელდა ზეწოლა. იქ უნდა იმუშაო, რომ იცოდე, სინამდვილეში რა ხდება. მიდით და თანამშრომლებთან ერთად იქ თუნდაც 24 საათი გაატარეთ, ნახეთ, რა მუშაობა მიმდინარეობს და ყველაფერს გაიგებთ. განა, დამნაშავეს უფლება აქვს, დაარტყას თანამშრომელს, ესროლოს მას? არა“, – განაცხადა ფუხაევმა.  

მან დეპუტატები ძალოვანი სტრუქტურების მუშაობისთვის ხელის შეშლაში დაადანაშაულა:

„რატომ არავინ საუბრობს ნაცემ მილიციონერებზე? ადამიანებმა თავი დაცულად უნდა იგრძნონ, ჩვენმა ბავშვებმა თავი უსაფრთხოდ უნდა იგრძნონ, ეს არის ჩვენი საქმე და მოგვეცით საშუალება, ეს გავაკეთოთ“, – განაცხადა ფუხაევმა.

საპარლამენტო ოპოზიციის მიმართ მწვავე საყვედურით გამოვიდა ასევე პრეზიდენტი ანატოლი ბიბილოვი. მან პატიმრების მიმართ ძალადობა უარყო და განაცხადა, რომ „ვენებიც კი არავის გადაუჭრია, მათ კაპილარები დაუზიანდათ“-ო.

ბიბილოვმა გაიხსენა, რომ ეს პატიმრები მძიმე დანაშულებში არიან ბრალდებული და განაცხადა:

„წამოდექით ისინი, ვისაც ისეთ იქ ცხოვრება სურს, სადაც კრიმინალური ელემენტები არსებობენ. სანამ მე ვარ პრეზიდენტი, აქ „გაგებით ცხოვრება“ არ იქნება“.

პრეზიდენტს, ძალოვანი სტრუქტურების ხელმძღვანელებსა და დეპუტატებს შორის ემოციურმა დისკუსიამ სიტუაციის გამწვავება და კონფლიქტის პროვოცირება გამოიწვია.

დეპუტატები პირდაპირ დაადანაშაულეს კრიმინალური სამყაროს ინტერესების დაცვაში.

ურთიერთობების გარკვევა დერეფნებში გაგრძელდა – ერთ-ერთმა ძალოვანმა დეპუტატს ხელი ჰკრა და ჰალსტუხით დაიჭირა.

7 ივნისს გამოქვეყნდა მეორე განცხადება – ამჯერად იუსტიციის სამინისტროს თანამშრომლების ხელმოწერით. მათ თავიანთი სამუშაოს სპეციფიკაზე ისაუბრეს და პარლამენტის სპიკერ ალან ტადტაევს მიმართეს თხოვნით, ორგანიზება გაუწიოს დეპუტატებთან მათ შეხვედრას.

სოციალურ ქსელებში გამოქვეყნებული კომენტარების უმეტესობა მხარს ოპოზიციონერ დეპუტატებს უჭერს:

„დეპუტატების დაშინება უნდათ. მიიყვანეს ძალოვნები, წინასწარ დეპუტატების წინააღმდეგ განწყობილები, კონკრეტულად მათ წინააღმდეგ, რომლებიც თუნდაც ინტერესდებიან იმით, რა ხდება ჩვენთან, რატომ არის ციხეში ასეთი განუკითხაობა“, – ამ პოსტს განსაკუთრებით ბევრი მხარდამჭერი კომენტარი მოჰყვა.  

სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო