"არ აწიოთ ხელი მოქალაქეებზე" - პრეზიდენტის მიმართვა ძალოვან უწყებებს. მასშტაბური პროტესტის მეორე დღე
სალომე ზურაბიშვილის მიმართვა
საქართველოს პრეზიდენტი სალომე ზურაბიშვილი ძალოვან უწყებებს მიმართავს, არ აწიონ ხელი აქციის მონაწილეებზე. 29 ნოემბრის საღამოს თბილისში, პარლამენტის შენობასთან ისევ გრძელდება მრავალათასიანი, თვითორგანიზებული პროტესტი საქართველოს ხელისუფლების გადაწყვეტილებაზე, შეაჩეროს ევროკავშირთან მოლაპარალებები 2028 წლამდე.
საღამოს, დაახლოებით 23:00 საათიდან, სპეცრაზმი პერიოდულად ისევ იყენებს წყლის ჭავლსა და წიწაკის სპრეის აქციის მონაწილეების წინააღმდეგ.
- საქართველოს პრემიერი: მივიღეთ გადაწყვეტილება, 2028 წლის ბოლომდე არ გავხსნათ ევროკავშირთან მოლაპარაკებები
- პრეზიდენტი მიმართავს ხალხს, ელჩებს, ოპოზიციას: არ შეგუება, არ დანებება, ბოლომდე ბრძოლა
ვრცელ მიმართვაში სალომე ზურაიშვილმა ჩამოთვალა პროტესტის ის კერები, რომელიც გაჩნდა სხვადასხვა საჯარო და სახელმწიფო უწყებაში.
პრეზიდენტის თქმით, ცხადად ჩანს, რომ “არავინაა მზად, შეეგუოს გარუსებულ, კონსიტუცია წართმეულ საქართველოს, არალეგიტიმური მთავრობისა და პარლამენტის ხელში მყოფ საქართველოს”
“ამიტომ ხართ ბევრნი გამოსულნი. გიყურებთ.
გიყურებთ რუსთაველზე, საქართველოს სხვადასხვა ქალაქებში – ბათუმი, ქუთაისი, ახმეტა, ლაგოდეხი, თელავი. ეს არნახულია, რომ ერთდროულად და სპონტანურად გამოდიოდენ საქართველოს მოქალაქეები ამ ფორმით, უაღრესად მშვიდობიანად.
მინდა მივმართო სამართალდამცავებს. ვიცი, რომ საპატრულო პოლიცია ყველაფერს აკეთებს, რაც შეუძლია და მინდა მადლობა ვუთხრათ. დანარჩენებს მინდა მგმართო – არ აწიოთ ხელი მოქალაქეებზე. თავი შეიკავეთ. არაფერი ხდება არც რუსთაველზე, არც სხვა ქალაქებში, რაც მოითხოვს თქვენს ჩართულობას და დარბევას. პასუხისმგებლობა არის მხოლოდ თქვენი და თქვენი უფროსების. იმათმაც ამაზე იფიქრონ“, – ამბობს სალომე ზურაბიშვილი.
ამავე მიმართვაში მან ახსენა საქართველოს ფარგლებს გარეთ, ემიგრანტების პროტესტებიც. პრეზიდენტმა ჩამოთვალა აქციები ბერლინში, პოზნანში, პარიზში, ბრიუსელში, სტრასბურგში, ვაშიგტონში.
“ეს ძალიან დიდი მოძრაობაა, რომელიც მოითხოვს, რომ ჩვენი საგარეო უწყება და დიპლომატიური კორპუსი გახდეს ამ პროცესის თანამონაწილე. იგი ხდება, ნელ-ნელა. პროტესტსაც აქვს თავისი შედეგი. ვნახეთ, რომ საგარეო სამინისტროს 154 თანამშრომელი გაემიჯნა ჩვენ ახალ, პრო-რუსულ პოლიტიკას და გამოხატა პროტესტი ხელმოწერებით.
ასევე, ერთი ჩვენი ელჩი გადადგა. სხვებმა, ხუთ სხვა ქალაქში, გამოხატეს თავიანთი პროტესტი. ეს ძალიან მნიშვნელოვანია, მით უმეტეს ევროკავშირის დედაქალაქებში, სადაც ისინი უნდა წარმოადგენდნენ საქართველოს ევროპულ მომავალს, არა შეჩერებულ ევროინტეგრაციის პროცესს“, – ამბობს პრეზიდენტი.
მან ასევე ახსენს, თავდაცვის სამინისტროს 40-ზე მეტი თანამშრომლის განცხადება და თქვა, რომ ესეც ძალიან ბევრს ნიშნავს:
“იმიტომ, რომ, ვიცი და ვგულშემატკივრობ იმ მდგომარეობას, რომელშიც იმყოფება ჩვენი ჯარი, როცა მას ეუბნებიან, რომ ჩვენი პარტნიორები სანდონი არ არიან, როცა შეურაცხყოფას აყენებენ პარტნიორებს. ეს მათთვის კიდევ უფრო მეტადაა მიუღებელი“.
ახსენა პროტესტი განათლების სფეროში, სადაც 450-ზე მეტი თანამშრომელი შეუერთდა განცხადებას.
ასევე, მან ახსენა 17 მოსამართლე და 2 რაიონული სასამართლოს მოსამართლე , რომლებიც გაემიჯნნენ ამ პრორუსულ პოლიტიკას. სერვისების განვითარების სააგენტოს100-ზე მეტი თანამშრომელი. საკონსტიტუციო სასამართლოს 16 თანამშრომელი. აჭარის საზოგადოებრივი მაუწყებლის 42 თანამშრომელი. თსუ-ს სენატის ცხრა წევრი.
“ეს ძალიან დიდი მოძრაობაა, რომელიც დაწყებულია – საჯარო სექტორში“, – განაცხადა სალომე ზურაბიშვილმა.
შეგახსენებთ, საქართველოს პრემიერ-მინისტრის ირაკლი კობახიძის განცხადების შემდეგ, რომ ქვეყანა აჩერებს ევროკავშირთან მოლაპარაკებების გახსნას, საქართველოში დიდი საპროტესტო ტალღა აგორდა.
ქუჩის აქციების გარდა, ქვეყანაში გაჩნდა დაუმორჩილებლობისა და პროტესტის სხვა მცირე კერებიც – სკოლებში, უნივერსიტეტებში, გამოქვეყნდა ასზე მეტი დიპლომატის საჯარო წერილი სისტემასთან გამიჯვნაზე, მთელი დღეა ვრცელდება განცხადებები სამინისტროების თანამშრომლების სახელით.
ამ სიას უკვე შეუერთდა 17 მოსამართლის განცხადება, საკონსტიტუციო სასამართლოს თანამშრომლების განცხადება. ასევე, განცხადება გაავრცელეს და გაემიჯნენ “ქართული ოცნების” გადაწყვეტილებას დაავადებათა კონტროლის ეროვნული ცენტრის თანამშრომლები, იუსტიციის სახლის თანამშრომლები.
სია ვრცელია და განახლებადი.
სალომე ზურაბიშვილის მიმართვა
