"რატომ არ გესმით ხალხის მოთხოვნა? მათ უნდათ ევროპა და არა რუსეთი" - საქართველოს პრეზიდენტის გამოსვლა პარლამენტში
სალომე ზურაბიშვილის გამოსვლა პარლამენტში
საქართველოს პარლამენტში მოხსენების დაწყებამდე, პრეზიდენტმა სალომე ზურაბიშვილმა ბუჩის ტრაგედიიდან 1 წლის თავზე, დაღუპულთა ხსოვნას პატივი მიაგო და დეპუტატებს წუთიერი დუმილისკენ მოუწოდა.
“სანამ მიმართვას დავიწყებდე, მინდა სოლიდარობა გამოვუცხადო ჩვენს მეგობარ უკრაინას. დღეს არის ბუჩას ტრაგედიიდან 1 წლის თავი და გთხოვთ, პატივი მივაგოთ დაღუპულთა ხსოვნას წუთიერი დუმილით“, – თქვა ზურაბიშვილმა.
ასევე, სალომე ზურაბიშვილმა განაცხადა, რომ 18 აპრილს ევროპარლამენტს სიტყვით მიმართავს. მისი თქმით, სიტყვით გამოსვლაზე მოწვევა ურსულა ფონ დერ ლაიენისგან მიიღო.
აღსანიშნავია, რომ ბოლოს ევროპარლამენტში სიტყვით საქართველოს მესამე პრეზიდენტი, მიხეილ სააკაშვილი გამოვიდა 2010 წლის 23 ნოემბერს.
რა თქვა საქართველოს პრეზიდენტმა:
● რაც არ უნდა ეცადოთ, რომ ხან იმპიჩმენტით დამემუქროთ, ხან საკონსტიტუციო სასამართლოში მიჩივლოთ, ხან რომელ ძალას მიმაწებოთ, ხან ეცადოთ და ამიკრძალოთ საერთაშორისო ვიზიტები, ხან ეცადოთ და შემიზღუდოთ რეგიონებში ადგილობრივ ხელისუფლებასთან ურთიერთობა, ხან ქართული დამიწუნოთ, ხან ცილი დამწამოთ მე და ჩემს ოჯახს, და მოკლედ, რა აღარ დამაბრალოთ, მაინც ვერ შეცვლით ჩემს მიზანს და მეც ვერ შემცვალეთ და ვერც შემცვლით.
● რატომ არ გესმით ხალხის მოთხოვნა? – მათ უნდათ ევროპა და არა რუსეთი. ქართველი ხალხი თქვენს გასაგონად სამჯერ გამოვიდა – არა პოლიტიკური პარტიების დაძახებით, არა უცხოელების კარნახით, არა დაკვეთით, არა ფულით, არა გადატრიალებისთვის, არა შეთქმულებისათვის, არამედ თავისი ევროპული მომავლისთვის.
● აღარ დაამთავრეთ ანტიევროპული რიტორიკა, პარტნიორების შეურაცხყოფა – 2019 წელს, გავრილოვის ჩამოყვანით, ქვეყნის მიმართ პირველად გააჩინეთ ეჭვები და კითხვის ნიშნები, თუმცა რეალურად ხელისუფლების საგარეო კურსის ფერისცვალება 2021 წელს იწყება, როდესაც ქართულ პოლიტიკას ტოვებს ქართული ოცნების მაშინდელი პარტიის თავმჯდომარე ბატონი ბიძინა ივანიშვილი, აქ იწყება დიდი გაუგებრობა იმაზე, თუ ვინ არის პასუხისმგებელი ამ ახალ კურსზე.
● ხალხმა 2020 წლის 20 ივნისს გითხრათ, რომ რუსეთი არ უნდათ, არცერთი ფორმით და არცერთი წამით. 2022 წლის 4 მარტს გითხრათ, რომ და ჩვენი და უკრაინის ერთობლივ ევროპულ გზას ალტერნატივა არ აქვს. 2023 წლის 7-8 მარტს, გითხრათ, როგორი მომავალი სურთ, და რომ არასდროს შეეგუებიან ევროპული მომავლის დაკარგვას.
● სალომე ზურაბიშვილი: ქართველმა ხალხმა მნიშვნელოვან პროგრესს მიაღწია თბილისის ქუჩებში
● სალომე ზურაბიშვილი ბერბოკს: მოსახლეობა ევროკავშირის კანდიდატის სტატუსზე მეორე უარს ვერ გაიგებს
● თბილისის ანტირუსულმა აქციებმა სოხუმსა და ცხინვალში „მეორე ფრონტის“ შიში გააჩინა. ხელისუფლების რეაქცია
● ქართველი ხალხის გამოძახილი უაღრესად მკაფიო და ნათელია – ეს მსოფლიომ ძალიან კარგად გაიგო და დაინახა. ხელისუფლებამ კი ვერ გაიგეთ, რომ ხალხის წინაშე თქვენ ხართ ვალდებულნი და თქვენ გაქვთ მანდატი, თქვენ ჩაგაბარათ ქართველმა ხალხმა მისი ნების აღსრულება.
● რაც არ უნდა სიმართლე იყოს ის, რომ ოპოზიციას თავისი ბრალეულობები აქვს ხან გაუთავებელი ბოიკოტების გამოცხადებით და საქმის გაფუჭებით, ხან ბრიუსელსა და ამერიკაში ქვეყნისთვის დამაზიანებელი გზავნილების ჩატანით და პოზიციონირებით, პასუხისმგებლობის ლომის წილი მაინც ხელისუფლებაზე მოდის.
● რაც არ უნდა ეცადოთ, რომ შედეგის მიუღწევლობა სხვას გადააბრალოთ სხვადასხვა მეთოდებით – მოდელირებული სცენარებით, კონსპირაციებით, შეთქმულების თეორიებით და ხალხის შეურაცხყოფით ეს არ შეცვლის ხალხის თვალში თქვენს პასუხისმგებლობას და მისი ნების არშესრულებას.
● რაც არ უნდა ეცადოთ, რომ ხალხი დაარწმუნოთ იმაში, რომ ევროპა ეწინააღმდეგება ჩვენს ეროვნულ ინტერესებს, ღირებულებებს, ან კიდევ მშვიდობას, შედეგს ვერ მიაღწევთ. ქართველმა ხალხმა საუკუნეზე მეტია რაც იცის რა არის ევროპა, თუ რატომ უნდა ევროპა და, რომ ევროპული ღირებულებები სრულ თანხვედრაშია ქართულ ღირებულებებთან.
● ფაქტია, რომ თბილისი და მოსკოვი მეორე ფრონტის თემაზე, ერთ ენაზე საუბრობენ. ქართველმა ხალხმა ძალიან კარგად იცის, რომ ევროკავშირის შექმნის იდეა სწორედ მშვიდობას ემსახურება და არა ომს. ევროკავშირი საქართველოში პირდაპირ ემსახურება ჩვენი ქვეყნის მშვიდობას ევროკავშირის სადამკვირვებლო მისიის სახით და მშვიდობიან განვითარებას.
● რაც არ უნდა ეცადოთ, რომ ეს მოდელირებული სცენარები, რომლებიც წინა ხელისუფლებას სჩვეოდა და საეჭვოდ ემთხვევა რუსეთისა და სეპარატისტების გზავნილებს, თავს მოახვიოთ ხალხს, შედეგს ვერ მიაღწევთ.
● რაც არ უნდა ეცადოთ, რომ დაამტკიცოთ, თითქოსდა ევროპული და ჩვენი ეროვნული ინტერესი თითქოს ერთმანეთთან წინააღმდეგობაშია, რეალობას ვერ გაექცევით.
● სალომე ზურაბიშვილმა საზოგადოებას პირველი გამარჯვება მიულოცა
● “ქართული ოცნება” ამბობს, რომ გაიწვევს რუსულ კანონს. თუმცა, ექსპერტები გვაფრთხილებენ, რომ განცხადება არ კმარა
● ტერიტორიის დაცვა, დეოკუპაცია, თავდაცვის გაძლიერება, მოსახლეობის უსაფრთხოება, ეკონომიკისა და განათლების განვითარება – ეს ყველაფერი წარმოუდგენელი და შეუძლებელია ჩვენი პარტნიორებთან თანამშრომლობის გარეშე.
● უკრაინასთან მიმართებაში ვერც დიპლომატია გამოვიჩინეთ, ვერც გონიერება – დიახ, ჩვენ ვუერთდებით გაეროში რეზოლუციებს, თუმცა ყველა სხვა მორალური, პოლიტიკური სოლიდარობის გამოხატვას ვერიდებით, თუ ვემიჯნებით. 25 თებერვალს, სრულიად უადგილო ადგილას, ვაცხადებთ, რომ სანქციებს არ ვუერთდებით, მაშინ, როდესაც პირიქითაა და შეგვიძლია, ვთქვათ, რომ ჩვენ ვერ და არ დავაწესებთ ჩვენს ეროვნულ სანქციებს, მაგრამ ვუერთდებით საერთაშორისოს – მეტს არავინ არაფერს გვთხოვდა არც ჩვენ და არც მოლდოვას.
● ლუკაშენკომ დაარღვია ოკუპაციის კანონი – ახია ჩვენზე! როცა მთელმა ევროპამ საჭიროდ მიიჩნია, გამიჯვნოდა ბელარუსს, ჩვენ გავუფრთხილდით მათ და არ შევუერთდით ევროკავშირს მიერ დაწესებულ შეზღუდვებს. ამ დროს ბელარუსის პრეზიდენტი არ გაგვიფრთხილდა, არ გაუფრთხილდა ჩვენს ტერიტორიულ მთლიანობას.
● ამ ბოლო ორი წლის რიტორიკით და ქმედებებით თქვენ წაშალეთ და შეუცვალეთ გეზი თქვენს 9 წლიან მმართველობას და გადაუხვიეთ თქვენი ხალხის და ამომრჩევლის ნებას და მანდატს. ამ ყველაფრის შედეგად კი 2022 წლის 17 ივნისს საქართველომ ვერ მიიღო კანდიდატის სტატუსი.
● ხელისუფლებამ კი დღესაც უნდა აღასრულოს ქართველი ენის ნება, სწორედ ამისთვის მოგცათ თქვენ ხალხმა მანდატი, სწორედ ამისთვის ხართ აქ და ამიტომ მინდა შეგახსენოთ კონსტიტუციაში თქვენ მიერვე ჩაწერილი მუხლი – კონსტიტუციურმა ორგანოებმა თავიანთი უფლებამოსილების ფარგლებში მიიღონ ყველა ზომა ევროპის კავშირისა და ჩრდილოატლანტიკური ხელშეკრულებების ორგანიზაციაში საქართველოს სრული ინტეგრაციის უზრუნველსაყოფად. ამიტომ არ შემიძლია, დღეს არ შეგახსენოთ, სად იდექით გუშინ, როცა ხალხის მიერ მინიჭებული მანდატის შესრულებას შეუდექით.
● ამის ყველაზე თვალსაჩინო მაგალითია, ევროპული საბჭოს უმაღლესი ხელმძღვანელის შეურაცხყოფა და მისი ჩართულობით შედგენილი დოკუმენტის ისე ანულირება, რომ არავინ ჩათვალა საჭიროდ თუნდაც მისი გაფრთხილება. იმავე წელს უარი ითქვა ევროკავშირის სესხზე. ეს ყველაფერი კი, ბოლოს იმ ზომამდე მივიდა, რომ ევროკავშირის ყოფილი ელჩი ქვეყნიდან საყვედურებით და ბრალდებებით გავაცილეთ.
● დემოკრატიის ქვაკუთხედის – ინსტიტუტების ნაცვლად ძლიერდება ერთპარტიული სისტემა. ევროპულ გზას თქვენ, მმართველი პარტია ერთხმად ცივილიზაციურ არჩევანს უწოდებდით. ამიტომ ახლა არ შემიძლია არ გკითხოთ: სად დგახართ და რატომ? რატომ ჩამოშორდით ხალხის ნებას და მისგან მიღებულ მანდატს, რომელსაც აქამდე პირნათლად ასრულებდით?
● ერთი მხრივ, 12 რეკომენდაციის მხოლოდ ფორმალურად შესრულებით და ხალხის მხარდაჭერის გარეშე ხელისუფლება შედეგს ვერ მიაღწევს, დღეს მოვისმინეთ სრულად ეს ფორმალური შესრულება. მეორე მხრივ, მარტო აქციებით სამოქალაქო სექტორი თუ პოლიტიკური პარტიები შედეგს ვერ მიაღწევენ. რეალური საქმის შესრულების გარეშე და მისი სწორი ფორმით წარდგინების და დანიშნულების ადგილზე მიტანის გარეშე ჩვენ ხალხის ნებას ვერ აღვასრულებთ.
● ვინაიდან აქამდე ვერ მოხერხდა, რომ საქართველოს ევროპული პოზიციები და იმიჯი დაცული, გამყარებული ყოფილიყო ჩვენს ევროპელ პარტნიორებთან, სწორედ ამიტომ გადავწყვიტე, აქტიურად ჩავერთო ამ პროცესში და ხელი შევუწყო ერთიან და კონსოლიდირებულ მუშაობას და ისეთი რეალური შედეგი დავდოთ ყველამ ერთად, რომელიც მოგვიტანს ევროკავშირის წევრობის კანდიდატის სტატუსს.
● ამ პასუხისმგებლობას იმიტომ ვიღებ, რომ ვარ ყველას პრეზიდენტი და არ წარმოვადგენ არც ერთ მხარეს და არც მეორეს, თუ არა ქართველი ხალხისა. ჩვენ არ უნდა გავუშვათ ჩვენი შანსი და ვინც ამას შეძლებს, ის ასევე შეძლებს ხვალ, რომ თქვას: “ამ დღეს აღსრულდა ნება ქართველი ერისა!”
