აზერბაიჯანში სამართალდარღვევის ახალი სახეობა გაჩნდა - გასვენებაში წასვლის თხოვნა

მას შემდეგ, რაც 5 აპრილს აზერბაიჯანში მოქალაქეების გადაადგილებაზე შეზღუდვა დაწესდა, სამართალდარღვევის ახალი სახეობა გაჩნდა – კარანტინის გვერდის ასავლელად ადამიანები ყველანაირ საბაბს იგონებენ. 

ამ მეთოდებიდან ყველაზე პოპულარულია გამოგონილი გასვენება და გაყალბებული SMS-ნებართვა. 

ამის გამო, ყოველდღიურად ათობით ადამიანს აკავებენ.

14 აპრილის დილის ოფიციალური მონაცემებით, აზერბაიჯანში კორონავირუსი COVID-19-ით დაინფიცირების 1148 შემთხვევაა დაფიქსირებული, 12 ადამიანი გარდაიცვალა,  289 გამოჯანმრთელდა. 

მაღაზიაში – და უკან!

ახალი წესების თანახმად, სახლიდან გასასვლელად აზერბაიჯანელ მოქალაქეთა უმრავლესობამ ნომერზე „8103“  წინასწარ  უნდა გაგზავნოს SMS, მიუთითოს თავისი პირადობის დამადასტურებელი ნომერი და სახლიდან გასვლის მიზანი აირჩიოს. მიზანი სულ სამია: ექიმთან ვიზიტი, მაღაზიაში/აფთიაქში/ ბანკში/ ფოსტაში ან ახლო ნათესავის გასვენებაში წასვლა. პასუხად მოდის SMS ნებართვით, რომელიც მოქალაქემ პოლიციელს უნდა უჩვენოს, თუკი მას ქუჩაში გააჩერებენ.

ადამიანი დარღვევისთვის შეიძლება დააჯარიმონ ან დააპატიმრონ კიდეც. 

ნებართვის მიღება შესაძლებელია მხოლოდ დღეში ერთხელ; თანაც, ექიმთან ვიზიტისთვის ან მაღაზიაში წასასვლელად ორი საათი ეძლევათ, ხოლო გასვენების შემთხვევაში, დროის ლიმიტი მითითებული არ არის.

ხელისუფლება ირწმუნება, რომ ეს ზომები კორონავირუსის გავრცელების წინააღმდეგ საბრძოლველად სრულიად გამართლებულია, და რომ სხვაგვარად ადამიანებს სახლში დარჩენას ვერაფრით აიძულებენ. 

მაგრამ, ქვეყნის ბევრ მცხოვრებელს მიაჩნია, რომ ისინი ზედმეტად მკაცრ ჩარჩოებში მოაქციეს.

• როგორ გამოიყურება ბაქო კარანტინის დროს
• კორონავირუსი სომხეთში: სამი შვილის დედის დღიური იზოლაციიდან

საეჭვოდ ბევრი გასვენება

ახალი შეზღუდვის ძალაში შესვლის მომენტიდან უკვე დაახლოებით 3 ათასმა ადამიანმა „ითხოვა“ უახლოესი ნათესავის გასვენებაში წასვლის ნებართვა. შესაბამის სახელმწიფო სტრუქტურებში ტყუილის თაობაზე ეჭვი გაუჩნდათ .

შემოწმებებმა უჩვენა, რომ ხშირად არავითარი გასვენება არ არსებობს, ან ეს უახლოესი ნათესავის გასვენება არ არის.

მხოლოდ გასული დღე-ღამის განმავლობაში, ამ სიცრუის გამო, 50 ადამიანი დააკავეს. თითოეული მათგანი 100 მანათით [დაახლოებით $59] დააჯარიმეს.

ტრაბახა გამყალბებელი

აკრძალვების გვერდის ავლის მეორე გავრცელებული მეთოდია – SMS ნებართვის გაყალბება. ამას, როგორც წესი, მაშინ მიმართავენ, როდესაც დღიური ორსაათიანი ლიმიტი უკვე ამოწურულია და გასვლა მაინც სურთ.

ერთ-ერთი ასეთი გამყალბებელი ახალგაზრდა მამაკაცი, სახელად ნაილ იაგუბოვი, საგანგებო კომპიუტერული პროგრამის მეშვეობით ნებართვის გაყალბებას არამხოლოდ დაეუფლა, არამედ სოციალურ ქსელებსა და Whats App-ის ჯგუფებში ამით ტრაბახობდა კიდეც. ახალგაზრდა მამაკაცი 25 დღე-ღამით დააკავეს, სოციალური ქსელების მომხმარებლები კი იმას წუხდნენ, თუ რა სულელურად გაყიდა მან თავი.

მოცემული მომენტისთვის აზერბაიჯანში შემოღებულია მკაცრი საკარანტინო რეჟიმი  – დაკეტილია მეტრო, ყველა პარკი და სკვერი, კომერციული ობიექტების უმრავლესობა, ორგანიზაციები და საწარმოები.

65 წელიწადზე უფროსი ასაკის ადამიანებს ქუჩაში გასვლა საერთოდ ეკრძალებათ.

ამავდროულად ქვეყანაში საგანგებო მდგომარეობა ოფიციალურად  გამოცხადებული არ არის.