იგორ კოჩიევი: სოფელ უისტასთან ქართული საგუშაგოს მოხსნა სამხრეთ ოსეთისთვის კვლავ საკვანძო საკითხად რჩება
საგუშაგო სოფელ უისტასთან
სოფელ უისტასთან ქართული პოლიციის საგუშაგოს სრულად მოხსნა ე.წ. სამხრეთ ოსეთისთვის კვლავ ერთ-ერთ უმთავრეს პოლიტიკურ მოთხოვნად რჩება – ეს არის საკითხი, რომელიც, ცხინვალის დე ფაქტო ხელისუფლების განცხადებით, ყველა შეხვედრაზე განიხილება და კომპრომისს არ ექვემდებარება.
ინციდენტების პრევენციისა და მათზე რეაგირების მექანიზმი 2009 წელს შეიქმნა და მიზნად ისახავს კონფლიქტის ზონაში უსაფრთხოების საკითხების განხილვასა და დაძაბულობის შემცირებას საქართველოს, რუსეთისა და დე ფაქტო ხელისუფლების წარმომადგენლების მონაწილეობით.
ინციდენტების პრევენციისა და მათზე რეაგირების მექანიზმის (IPRM) მორიგი შეხვედრის შემდეგ, ე.წ. სამხრეთ ოსეთის დელეგაციის ხელმძღვანელმა იგორ კოჩიევმა განაცხადა, რომ აღნიშნული საგუშაგო მუდმივად დგას დღის წესრიგში და მისი მოხსნა დე ფაქტო ხელისუფლებისთვის სტრატეგიულად მნიშვნელოვან ამოცანად რჩება.
კოჩიევის თქმით, მსგავსი საკითხების გადაწყვეტა ერთ შეხვედრაში შეუძლებელია, თუმცა პროცესში “გარკვეული პოზიტიური ძვრები“ უკვე იკვეთება. მისი განცხადებით, მუშაობა ამ მიმართულებით უწყვეტად მიმდინარეობს და ცხინვალი არ აპირებს თემის მოხსნას მოლაპარაკებების დღის წესრიგიდან.
დე ფაქტო წარმომადგენელმა “დადებით მოვლენად“ შეაფასა საქართველოს ყოფილი პრემიერ-მინისტრისა და შინაგან საქმეთა მინისტრის, გიორგი გახარიას წინააღმდეგ დაწყებული სისხლისსამართლებრივი დევნა. კოჩიევის თქმით, გახარია იყო სწორედ ის პოლიტიკოსი, რომლის ინიციატივითაც უისტასთან პოლიციის საგუშაგო გაიხსნა.
მისივე განცხადებით, ბრალდების ერთ-ერთი პუნქტი გახარიას საგუშაგოს გახსნით “ვითარების დესტაბილიზაციის მცდელობას“ უკავშირდება. ეს არის ფორმულირება, რომელიც ხშირად გამოიყენება ცხინვალის მხრიდან საქართველოს უსაფრთხოების ნაბიჯების შეფასებისას.
კოჩიევის თქმით, სამხრეთ ოსეთი ამ მიმართულებით მუშაობას გააგრძელებს და პოზიციას არ შეცვლის.
“ჩვენთვის ამ საგუშაგოს სრულად მოხსნისა და სამხრეთ ოსეთის ტერიტორიიდან გასვლის ალტერნატივა არ არსებობს.“ — განაცხადა მან.
