საგანგებო მდგომარეობა 23 მაისამდე, მსუბუქი ავტომანქანებით გადაადგილების აკრძალვა კი 27 აპრილამდე გაგრძელდება

კორონავირუსის პანდემიის შეჩერების მიზნით, საქართველოში საგანგებო მდგომარეობა 22 მაისამდე გაგრძელდება, ხოლო მსუბუქი ავტომობილებით გადაადგილების აკრძალვა – 27 აპრილამდე. 

21 აპრილის მონაცემებით, საქართველოში კორონავირუსით ინფიცირების 408  შემთხვევაა დადასტურებული. კარანტინის რეჟიმშია 4779 ადამიანი, ხოლო სტაციონარში მეთვალყურეობის ქვეშ – 561 პირი. კორონავირუსით ინფიცირებულთაგან 95 გამოჯანმრთელდა და 4  გარდაიცვალა. 

„ფართოვდება კლასტერები და სულ უფრო მძიმდება წყაროს დადგენა. შემდეგი 2-3 კვირის განმავლობაში ვიქნებით ვირუსის გავრცელების ყველაზე აქტიურ, პიკურ ფაზაში,“ – განაცხადა პრემიერის პრესსპიკერმა ირაკლი ჩიქოვანმა.

საგანგებო მდგომარეობა ერთი თვის ვადით საქართველოში 21 მარტს გამოცხადდა.  

ვადა დღეს, 21 აპრილს ამოიწურა. საქართველოს მთავრობამ საგანგებო მდგომარეობის გახანგრძლივების თხოვნით პრეზიდენტს უკვე მიმართა. ახლა პრეზიდენტმა ხელახლა უნდა გამოსცეს საგანგებო მდგომარეობის გამოცხადების ბრძანება.

პრეზიდენტის ბრძანება ძალაში მას შემდეგ შევა, როცა მას პრემიერ-მინისტრი მოაწერს ხელს, შემდეგ კი პარლამენტი დაამტკიცებს. 

• საქართველო პიკს უახლოვდება. მზად არის თუ არა ქვეყანა
• კორონავირუსი და ბოლო ჟამის ეკლესია. საუბარი გია ნოდიასთან და ბექა მინდიაშვილთან
• “ვართ მე და ჩემი ბერიკაცი, ხან ნარდს ვთამაშობთ, ხან კარტს,” – როგორ ცხოვრობენ ხანდაზმულები იზოლაციაში

ავტომობილებით გადაადგილება საქართველოში 17 აპრილს აიკრძალა. აკრძალვა 22 აპრილამდე უნდა გაგრძელებულიყო. თუმცა, საკოორდინაციო საბჭოს გადაწყვეტილებით, ავტომობილებით გადაადგილების აკრძალვა ერთი კვირით, 27 აპრილამდე გაგრძელდება.

პრემიერის პრესსპიკერის, ირაკლი ჩიქოვანის განცხადებით,  24 აპრილს ხელისუფლება ანტიკრიზისულ გეგმას და საგანგებო მდგომარეობის ფარგლებში დაწესებული შეზღუდვების ეტაპობრივი შემსუბუქების და ეკონომიკის გახსნის გეგმას წარადგენს. 

ირაკლი ჩიქოვანმა აღნიშნა, რომ მთავრობის გადაწყვეტილებას საგანგებო მდგომარეობის 22 მაისამდე გაგრძელების თაობაზე პარლამენტი მხარს უჭერს. 

საპარლამენტო ოპოზიცია საგანგებო მდგომარეობის გაგრძელებას მხარს არ უჭერს 

ფრაქცია „ნაციონალური მოძრაობის“ თავმჯდომარე, რომან გოცირიძე აცხადებს, რომ თანმხლები ეკონომიკური დახმარების პროგრამის გარეშე მისი ფრაქცია საგანგებო მდგომარეობის გაგრძელებას მხარს არ დაუჭერს.

“საგანგებო მდგომარეობა გამოვაცხადე და ხელები დამიბანია – ასე არ არის. ადამიანმა, რომელიც სარჩოს ყოველდღიური შრომის შედეგად შოულობდა, როცა სახლში დარჩება, უნდა იცოდეს, რომ შუქი არ გაეთიშება და წყალს არ დაუწყვეტენ. საგანგებო მდგომარეობას აუცილებლად სჭირდება თანმხლები ეკონომიკური დახმარების პროგრამა.“

ევროპული საქართველო მიიჩნევს, რომ საგანგებო მდგომარეობის გაგრძელების საკითხი პარლამენტში პრემიერ-მინისტრმა გახარიამ უნდა წარადგინოს.

პარტიაში ამბობენ, რომ მხარს დაუჭერენ ყველა სამედიცინო ღონისძიებას, რომელიც მოსახლეობის ჯანმრთელობის დაცვისთვის იქნება საჭირო, მაგრამ არა – აბსურდულ შეზღუდვებს.

“აუცილებელია საზოგადოებამ სწორედ პრემიერისგან გაიგოს, თუ რა სტრატეგია აქვს მთავრობას მომავალი ერთი თვის განმავლობაში. როგორ იქნება გამოყენებული და როგორ იმუშავებს საგანგებო მდგომარეობა, როგორ გამოსწორდება ის ხარვეზები, რომლებიც ყველამ დავინახეთ წინა თვის საგანგებო მდგომარეობის დროს”, – ამბობს ევროპული საქართველოს ერთ-ერთი ლიდერი, დავით ბაქრაძე.

საქართველოს პარლამენტის თავდაცვისა და უშიშროების კომიტეტის თავმჯდომარე, ირაკლი სესიაშვილი აცხადებს, რომ 22 აპრილს, როდესაც პარლამენტი საგანგებო მდგომარეობის გაგრძელების საკითხს უყრის კენჭს, საპარლამენტო უმრავლესობა გადაწყვეტილებას მხარს სრული შემადგენლობით დაუჭერს.  

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა.