31 მაისის მონაცემებით, საქართველოში კორონავირუსით ინფიცირების 783 შემთხვევაა დადასტურებული. კარანტინის რეჟიმშია 3031 ადამიანი, ხოლო სტაციონარში მეთვალყურეობის ქვეშ – 262 პირი. კორონავირუსით ინფიცირებულთაგან 605 გამოჯანმრთელდა და 12 გარდაიცვალა.
უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.
საქართველოში კორონავირუსის კიდევ ერთი ახალი კლასტერი გაჩნდა – ეს ე. წ. საბურთალოს კლასტერია. კორონავირუსის 26 ახალი შემთხვევიდან 4 სწორედ ამ კლასტერშია გამოვლენილი.
კორონავირუსის ახალი კლასტერი თბილისში გუშინ, 30 მაისს გაჩნდა – დედაქალაქის ცენტრალური უბნის ერთ-ერთ საცხოვრებელ კორპუსში covid-19 9 ადამიანს დაუდგინდა. ისინი ერთი ოჯახის წევრები და მათთან ახლო კონტაქტში მყოფი ადამიანები არიან. ეპიდემიოლოგები ფიქრობენ, რომ დაინფიცირების წყარო შესაძლოა, მედიკოსი იყოს.
სულ საბურთალოს კლასტერში ამ დროისთვის covid-19-ით 15 ადამიანია დაავადებული. კორონავირუსზე შემოწმდა ინფიცირებულებთან კონტაქტში მყოფი 50-ზე მეტი ადამიანი. ეპიდემიოლოგების რეკომენდაციით, საბურთალოს კლასტერის საცხოვრებელ კორპუსში შემოწმება გრძელდება.
covid-19-ის 26 ახალი შემთხვევიდან 18 ბოლნისის მუნიციპალიტეტის სოფელ მუშევანში გამოვლინდა, სადაც ამ დროისთვის გაფართოებული ტესტირება ტარდება და კორონავირუსზე სოფელში მცხოვრები ყველა ადამიანი მოწმდება. მძიმე ეპიდემიოლოგიური მდგომარეობის გამო ამ სოფელში ისევ კარანტინი მოქმედებს. ჩაკეტილია ბოლნისის კიდევ ერთი სოფელი – გეტაც.
დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, რეგულაციების შემსუბუქების შემდგომ პერიოდში, ინფიცირებულთა რაოდენობის ზრდა მოსალოდნელი იყო, თუმცა, ვითარება კონტროლს ექვემდებარება.
კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული.
კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა.15 ივნისიდან საქართველო შიდა ტურიზმის განახლებას გეგმავს, 1 ივლისიდან კი საზღვრების გახსნას და უცხოელი ტურისტების მიღებას.