სასამართლომ სუს-ს “მთავარი არხიდან” კორონავირუსზე გასული სიუჟეტის დაუმონტაჟებელი მასალის ამოღების ნება დართო

სახელმწიფო უსაფრთხოების სამსახური “მთავარის” ეთერში 20 ივნისს გასული სიუჟეტის – “ნაყიდი covid-19”-ის სრული მასალის გადაცემას ითხოვს. თბილისის საქალაქო სასამართლომ სუს-ს ამ სიუჟეტის სრული, დაუმონტაჟებელი მასალის ამოღების ნება დართო. სასამართლოს განჩინება არხის ხელმძღვანელობას დღეს უნდა ჩაბარდეს.

“საგამოძიებო ორგანოს ინიციატივისა და საქართველოს გენერალური პროკურატურის შესაბამისი შუამდგომლობის საფუძველზე, თბილისის საქალაქო სასამართლოს მიერ გამოტანილი იქნა განჩინება 2020 წლის 20 ივნისს გადაცემა “შაბათის მთავარში” გასული რეპორტაჟის – “ნაყიდი COVID 19” და ასევე, 2020 წლის 25 ივნისს, 21:03 – 21:13 საათის პერიოდში გასული სიუჟეტის, სრული და უწყვეტი დაუმონტაჟებელი მასალის გამოთხოვის თაობაზე, რომელიც დღეს ოფიციალურად ჩაბარდება აღსასრულებლად სამაუწყებლო კომპანია “მთავარი არხის” ხელმძღვანელობას”, – ნათქვამია სუს-ის განცხადებაში.

• “გამარჯობა, თქვენ დაწერეთ სტატუსი კორონავირუსზე?”- სუს-ი ფეისბუკ-პოსტების გამო პოლიტიკოსებს და ჟურნალისტებს იბარებს
• დიდი Facebook-წმენდა – ფეისბუკმა “ქართული ოცნების” PR-კონსულტანტთან, კოკა ყანდიაშვილთან და “ნაციონალურ მოძრაობასთან” დაკავშირებული ასეულობით გვერდი და ანგარიში გააუქმა.

ამავე განცხადებაში აღნიშნულია, რომ მთავარი არხის ეთერში გავიდა “გამოგონილ და განზრახ დამახინჯებულ ფაქტებზე აგებული სიუჟეტი”, რომლის თანახმადაც, მარნეულის მუნიციპალიტეტში ოჯახებს მათი ნათესავების გარდაცვალების მიზეზად ახალი კორონავირუსის დასახელების სანაცვლოდ 10 000-მდე ლარს სთავაზობდნენ.

უწყების ინფორმაციით, ამ საქმეზე დაიკითხა რეპორტაჟის ყველა ფიგურანტი და რესპონდენტი. ასევე ის პირები, “ვინც სოციალურ ქსელებში აქტიურობდნენ აღნიშნულ თემასთან დაკავშირებით”; მათ შორის იყვნენ რესპუბლიკური პარტიის წევრი, ხათუნა სამნიძე და ჟურნალისტი ნინო ჭელიძე. 

განცხადებას გამოეხმაურა „მთავარი არხის“ გენერალური დირექტორი, ნიკა გვარამია. 

გვარამიას თქმით, სუს-მა ეთნიკურად აზერბაიჯანელი მოქალაქეები დააშინა, რაც „ერთი მხრივ, ჩაფარცხვის და, მეორე მხრივ, მთავარი არხის დისკრედიტაციის მიმართულებით მოქმედებაზე მეტყველებს მხოლოდ“.

“გასაგებია რაც გეწვით, მაგრამ არ გამოვა არც ჩვენი შეშინება, არც ამ თემით შაქარაშვილის საქმის გადაფარვა. დაივიწყეთ, რიგითი სიუჟეტი იქნება. როგორი ავადმყოფი დებილები ხართ და რა მეთოდებით ებრძვით მედიას“, – წერს გვარამია.

სახელმწიფო უსაფრთხოების სამსახურმა “მთავარი არხის” სიუჟეტის გამო, ე.წ. საბოტაჟის საქმეზე გამოძიება 25 ივნისს დაიწყო.

სიუჟეტის რესპონდენტების გარდა, სუს-ში დაიკითხნენ ასევე “რესპუბლიკური პარტიის” ლიდერი ხათუნა სამნიძე და ჟურნალისტი ნინო ჭელიძე.