აიღებს თუ არა ოპოზიცია ბიუჯეტიდან დაფინანსებას?
საბიუჯეტო დაფინანსების შესახებ საკითხმა ოპოზიციაში აზრთა სხვადასხვაობა გამოიწვია. ცხრა პოლიტიკურმა პარტიამ დაფინანსების მიღებაზე თანხმობა განაცხადა, ოთხმა პარტიამ კი ბიუჯეტის ფულზე უარი თქვა.
დაფინანსებაზე თანხმობა განაცხადეს იმ პარტიებმაც, რომლებიც საპარლამენტო მანდატებზე უარს ამბობენ და პარლამენტში შესვლას არ აპირებენ.
● საქართველოს ერთპარტიული პარლამენტი: შეძლებს თუ არა იგი სრულფასოვნად მუშაობას
კანონის თანახმად, პარტიები, რომლებიც საპარლამენტო არჩევნებში ერთ პროცენტიან ზღვარს გადალახავენ, სახელმწიფო ბიუჯეტიდან დაფინანსებას იღებენ.
“პარლამენტის ბოიკოტირება და საბიუჯეტო დაფინანსების აღება ერთმანეთთან შეუთავსებელია, ირიბი ლეგიტიმატიცაა არჩევნების შედეგების, გამოვა კოლექტიური კობახიძე, იტყვის ოპოზიციამ ამ ნაბიჯით არჩევნების ლეგიტიმურობა სცნოო და მართალი იქნება”, – აცხადებს “გირჩის” ლიდერი ზურაბ ჯაფარიძე.
დაფინანსებაზე წერილობითი თანხმობა განაცხადეს შემდეგმა პარტიებმა:
● „ქართულმა ოცნებამ“
● „ევროპულმა საქართველომ“
● ბლოკში „ერთიანი ნაციონალური მოძრაობა – ძალა ერთობაშია“ გაერთიანებულმა ხუთმა პარტიამ – („ნაციონალური მოძრაობა“, „მოძრაობა სახელმწიფო ხალხისთვის“, „პროგრესი და თავისუფლება“, „საქართველოს რესპუბლიკური პარტია“ და „ევროპელი დემოკრატები“)
● ბლოკში „გიორგი ვაშაძე – სტრატეგია აღმაშენებელი“ გაერთიანებულმა ორმა პარტიამ – („გიორგი ვაშაძე – სტრატეგია აღმაშენებელი“ და „კანონი და სამართალი“).
● “საქართველოს პატრიოტთა ალიანსი”
დაფინანსების მიღებაზე თანხმობა არ უთქვამთ ბარიერგადალახულ შემდეგ პარტიებს:
● „ლელო“
● „გირჩი“
● „მოქალაქეები“
● „ლეიბორისტულ პარტია“
„ევროპული საქართველოს“ ერთ-ერთი ლიდერის, გიორგი კანდელაკის განცხადებით, ბიუჯეტის ეს თანხა პარტიას ოფისების რაღაც რაოდენობის შესანარჩუნებლად და „ივანიშვილის რეჟიმისთვის“ წინააღმდეგობის გასაწევად სჭირდება. კანდელაკმა დაამატა, რომ საბიუჯეტო დაფინანსებაზე თანხმობა 2020 წლის პარლამენტის არჩევნების შედეგების აღიარებას არ ნიშნავს.
„ნაციონალური მოძრაობის“ პოლიტსაბჭოს წევრის, ზურაბ მელიქიშვილის განცხადებით, პარტიების დაფინანსების ერთადერთი წყარო, განსაკუთრებით არასაარჩევნო პერიოდში, საბიუჯეტო დაფინანსებაა.
„მაშინ, როდესაც ყველა ბიზნესმენს ეკრძალება ოპოზიციასთან და განსაკუთრებით „ნაციონალურ მოძრაობასთან“ ურთიერთობა – მე პატივს ვცემ ყველა პარტიის ინდივიდუალურ გადაწყვეტილებას“, – აცხადებს ზურაბ მელიქიშვილი.
პოლიტიკურ პარტიებს დაფინანსების მისაღებად ცესკოში თანხმობის წერილის წარდგენის ვადა 25 ნოემბრამდე ჰქონდათ.
კანონის თანახმად, თუ პარტია დადგენილ ვადაში არ წარადგენს წერილობით თანხმობას საბიუჯეტო დაფინანსების მიღების თაობაზე, ამ ვადის გასვლიდან მეორე დღეს, აუდიტის სამსახური წერილობით გააფრთიხილებს პარტიას დაგვიანების შესახებ.
პარტიას უფლება აქვს, აუდიტის წერილობით გაფრთხილებიდან 3 დღის ვადაში დაადასტუროს თანხმობა.
თუ პარტიამ სახელმწიფო აუდიტის სამსახურის მიერ დადგენილ ვადაში კვლავ არ წარადგინა შესაბამისი თანხმობა, იგი კარგავს მომავალი წლის საბიუჯეტო დაფინანსების მიღების უფლებას.
