სააკაშვილის საქმეები. რისთვის ზის ციხეში ყოფილი პრეზიდენტი
საქართველოს ყოფილი პრეზიდენტი მიხეილ სააკაშვილი ახლა ციხის საავადმყოფოში იმყოფება, სადაც სასჯელს იხდის. ის ბრალს არ აღიარებს და გათავისუფლების მოთხოვნით 45 დღეზე მეტია შიმშილობს. სააკაშვილი 1 ოქტომბერს მას შემდეგ დააკავეს, რაც საქართველოში 8 წლიანი არყოფნის შემდეგ არალეგალურად ჩამოვიდა.
კონკრეტულად რაში წაუყენეს ბრალი და რისთვის იხდის სასჯელს მიხეილ სააკაშვილი?
ხუთი საქმე სააკაშვილის წინააღმდეგ
2021 წლის ოქტომბერში, როცა სააკაშვილი საქართველოში დაბრუნდა, მის წინააღმდეგ სისხლის სამართლის საქმე ოთხ ეპიზოდზე იყო აღძრული:
1. 2006 წლის იანვარში სანდრო გირგვლიანის მკვლელობასთან დაკავშირებით უფლებამოსილების ბოროტად გამოყენება. ამ საქმეზე შსს-ს ოთხი თანამშრომელი გაასამართლეს, მაგრამ 2 წლის შემდეგ ისინი პრეზიდენტმა შეიწყალა. გამოძიება მიიჩნევს, რომ მსჯავრდებულების შეწყალება სააკაშვილის მიერ დამნაშავეებთან წინასწარი შეთანხმებით მოხდა.
- რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
- ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
- უკრაინული მიშა
2. სამსახურებრივი უფლებამოსილების გადამეტება 2007 წლის 7 ნოემბრის აქციის დარბევისა და ტელეკომპანია „იმედში“ შეჭრის დროს.
3. ოპოზიციონერი დეპუტატის, ვალერი გელაშვილის ცემასთან დაკავშირებით სამსახურებრივი უფლებამოსილების გადამეტება. თავდამსხმელებს ნიღბები ეკეთათ და სააკაშვილის მმართველობის დროს გამოძიებამ დამნაშავეები ვერ იპოვა.
4. საბიუჯეტო სახსრების გაფლანგვა. ამ მუხლით პირველი საქმე, რომელიც საჯარო გახდა, ეხებოდა პრეზიდენტისთვის სახელმწიფოს ხარჯზე ექვსი პიჯაკის შეძენას, ასევე სადილს სუში-ბარში.
მოგვიანებით საქმეს დაემატა სახელმწიფოს მიერ დაფინანსებული დასვენება მდიდრულ სასტუმროებში, ვიზიტები კოსმეტიკურ კლინიკებში, მასაჟი და ტანსაცმლის შეძენა.
საერთო ჯამში, გაფლანგვის ოდენობამ 8,8 მილიონი ლარი შეადგინა. ამ საქმესთან დაკავშირებით საქართველოში სააკაშვილის ოჯახის ქონება დააყადაღეს – მისი აგარაკი კახეთში, სააკაშვილის მეუღლის სანდრა რულოვსის საკუთრებაში არსებული ბინა, ასევე ბებიის 12 წლის ავტომობილი Honda.
სააკაშვილის საქართველოში დაბრუნების შემდეგ მის წინააღმდეგ კიდევ ერთი საქმე აღიძრა:
5. საზღვრის უკანონო გადაკვეთის საქმე.
რისთვისაა სააკაშვილი გასამართლებული
სასამართლომ ყოფილ პრეზიდენტს ორ საქმეზე – გირგვლიანის მკვლელების შეწყალებისა და დეპუტატ გელაშვილის ცემის საქმეზე, განაჩენი დაუსწრებლად გამოუტანა.
დეპუტატის ცემის საქმეზე სააკაშვილს 6 წლით თავისუფლების აღკვეთა მიესაჯა. შეწყალების საქმეზე – 3 წელი. ვინაიდან, საქართველოს კანონმდებლობით, სხვადასხვა დანაშაულისთვის სასჯელის შეკრებითობა არ მოქმედებს, სააკაშვილი ახლა, კანონის მიხედვით, ყველაზე ხანგრძლივ სასჯელს იხდის – 6 წელს გელაშვილის ცემის საქმეზე.
სამართლიანია თუ არა ბრალდებები?
სასამართლო პროცესებში მონაწილე სააკაშვილის ადვოკატები ჟურნალისტებთან კომენტარებში აცხადებენ, რომ საქმეებში, რომლებზეც სააკაშვილი გაასამართლეს, მისი ბრალის პირდაპირი მტკიცებულება არ არსებობს.
კერძოდ, გელაშვილის ცემის საქმეში არ არსებობს მტკიცებულება, რომ ცემის ბრძანება პირადად სააკაშვილმა გასცა – ბრალდებები ეფუძნება ყოფილი თანამდებობის პირების – და შემდგომში სააკაშვილის პოლიტიკური ოპონენტების – ირიბ ჩვენებებს, რომლებიც არ იყვნენ დანაშაულის პირდაპირი მოწმეები.
რაც შეეხება შეწყალების საქმეს, ადვოკატებისა და დამოუკიდებელი იურისტების შეფასებით, უფლებამოსილების გადამეტების ბრალდება თავად შეწყალების აქტისთვის, რაც პრეზიდენტის უპირობო უფლებაა, სამართლებრივი თვალსაზრისით მიუღებელია.
ორივე საქმე, რომლებზეც ყოფილი პრეზიდენტი გაასამართლეს, ადვოკატებმა ადამიანის უფლებათა ევროპულ სასამართლოში გაასაჩივრეს.
სააკაშვილის პარტიის წევრები და მისი მხარდამჭერები აცხადებენ, რომ სააკაშვილი უდანაშაულოა და საქართველოს ახალი ხელისუფლების მიერ მის წინააღმდეგ აღძრული ყველა საქმე პოლიტიკურად მოტივირებულია.
