"სააკაშვილის პოლიტპატიმრად მოხსენიების გამო" - მმართველმა პარტიამ მხარი არ დაუჭირა PEACE-ს ისტორიულ რეზოლუციას 

PEACE-ს ისტორიული რეზოლუცია

ევროპის საბჭოს საპარლამენტო ასამბლეამ (PACE) რუსეთის რეჟიმი ტერორისტულად გამოაცხადა და გახდა პირველი საერთაშორისო ორგანიზაცია, რომელმაც მსგავსი აქტი მიიღო. საქართველოს მმართველი პარტია აცხადებს, რომ იზიარებს PACE-ის რეზოლუციის ზოგად სულისკვეთებას, თუმცა დოკუმენტს მხარი არ დაუჭირა, რადგან არ ეთანხმება ჩანაწერს ექსპრეზიდენტ მიხეილ სააკაშვილის პოლიტპატიმრობის შესახებ.

რეზოლუციაში შესწორების სახით დამატება მოგვიანებით შევიდა, სადაც ასამბლეა ითხოვს რუსეთის ფედერაციასა და სხვა ქვეყნებში “პრეზიდენტ პუტინის მოწინააღმდეგე პოლიტპატიმრების, მათ შორის უკრაინის მოქალაქისა და საქართველოს ყოფილი პრეზიდენტის, მიხეილ სააკაშვილის საქმეების განხილვასა და მათ გათავისუფლებას.”

საქართველოს PACE-ში ხუთი მუდმივი წარმომადგენელი ჰყავს. მათგან სამი “ქართული ოცნებიდანაა” (ირაკლი ჩიქოვანი, ირაკლი კობახიძე და თამარ ტალიაშვილი), ერთი პარტია “მოქალაქეებიდან” (ლევან იოსელიანი) და ერთიც “ნაციონალური მოძრაობიდან” (ხატია დეკანოიძე). კენჭისყრაში მონაწილეობა მხოლოდ ხატია დეკანოიძემ მიიღო და მხარი დაუჭირა როგორც რეზოლუციას, ისე მის შესწორებებს.

მიხეილ სააკაშვილის შესახებ შესწორება საპარლამენტო ასამბლეამ 56 ხმით მიიღო. რეზოლუციის ძირითად ტექსტში აღნიშნული დამატების ინიციატორი იყო 45 დეპუტატი, მათ შორის ხატია დეკანოიძე, ლიზა იასკო, ოლექსი გონჩარენკო და ემანუელ ზინგერისი (რომლის ანგარიშის საფუძველზეც მომზადდა რეზოლუცია).

„რეზოლუციასთან მიმართებაში ჩემი მხრიდან საბოლოო ტექსტზე მხარდაჭერა არ იქნა გამოხატული გამომდინარე იქიდან, რომ ეს კონკრეტული დამატება [სააკაშვილის შესახებ] არის აბსოლუტურად მიუღებელი… მთლიანი ტექსტის მხარდაჭერა ნიშნავდა, რომ მაშინ ვეთანხმებით იმ ცვლილებასაც… თუმცა გამოსვლის დროს დავაფიქსირე, რომ ამ რეზოლუციის მთლიანი სულისკვეთება აბსოლუტურად მისაღებია, თუმცა საჭიროებს ცვლილებებს დამატებებთან მიმართებაში და შემდეგ გავაპროტესტე ის დამატება, რომელიც მე-4 ნომრად იქნა წარმოდგენილი“, — განმარტა “ქართული ოცნების” დეპუტატმა და დელეგაციის ერთ-ერთმა წევრმა გივი მიქანაძემ ტელეკომპანია „იმედის“ ეთერში.

მმართველი პარტიის თავმჯდომარე ირაკლი კობახიძე აცხადებს, რომ ხუთშაბათი არის ყველაზე პასიური დღე ასამბლეის მუშაობაში და “56 ხმით 600-კაციან ასამბლეაში შეაპარეს რაღაც ცვლილება”, სადაც მოხსენიებულია მიხეილ სააკაშვილი. 

“ეს არის ზოგადად სამწუხარო მოვლენა, თუმცა ჩვენ არაფერი გვიკვირს მას შემდეგ, რაც რამდენიმე თვის წინ ევროპარლამენტმა 300-ზე მეტი ხმით სრულიად უსამართლო რეზოლუცია მიიღო. არაფერი განსაკუთრებული. არის ერთი უსამართლო ჩანაწერი PACE-ს რეზოლუციაში. მთავარია, რომ პარტნიორებმა ყველაფერი იციან სააკაშვილის საქმის შესახებ. იციან, რომ პატიმარი სააკაშვილი არის ექიმების მეთვალყურეობის ქვეშ და სამედიცინო მომსახურების ყველა პირობა შექმნილი აქვს“, – ამბობს კობახიძე.

პარტია “ლელოს” წევრი და ევროკავშირთან საქართველოს მისიის ყოფილი ხელმძღვანელი სალომე სამადაშვილი ამბობს, რომ “ქართული ოცნების” გადაწყვეტილება “სამარცხვინოა.”

“ქართული ოცნება ხმას რომ არ აძლევს უკრაინის მხარდამჭერ რეზოლუციას ევროსაბჭოში, მერე რატომ უკვირთ, რუსეთის ხმა რომ ესმის უკრაინას მათ პოზიციაში? ქვეყნის სირცხვილია ეს ამბავი.” – წერს სალომე სამადაშვილი.

● სააკაშვილის საქმეები. რისთვის ზის ციხეში ყოფილი პრეზიდენტი
● უკრაინული მიშა
● გადამწყვეტი 180 დღე. რა უნდა მოასწროს საქართველომ დეკემბრამდე, თუ ევროკავშირთან დაახლოება უნდა

უკვე 1 წელია, მიხეილ სააკაშვილი, დაპატიმრებულია. ექსპრეზიდენტი დააპატიმრეს მას შემდეგ, რაც ის 2021 წლის 1 ოქტომბერს, ფარულად დაბრუნდა საქართველოში.

საქართველოს ყოფილი პრეზიდენტი რუსთავის მე-12 სასჯელაღსრულების დაწესებულებაში იმყოფებოდა. იგი თავს პოლიტიკურ პატიმრად მიიჩნევს, ამიტომ, ამ ხნის განმავლობაში, პროტესტის ნიშნად ორჯერ იშიმშილა. მათ შორის, პირველ შემთხვევაში შიმშილობა 51 დღე გაგრძელდა.

მაშინ მიხეილ სააკაშვილის ჯანმრთელობის მდგომარეობა ისე დამძიმდა, რომ მკურნალობა დასჭირდა. იგი სამკურნალოდ ჯერ გორის სამხედრო ჰოსპიტალში, ხოლო შემდეგ კლინიკა “ვივამედში” გადაიყვანეს, სადაც ამ დრომდე მკურნალობს.

არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილებაც. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.