რუსული "რბილი ძალის" გამავრცელებელი "გორჩაკოვის ფონდი" ქართველ ახალგაზრდებს სტაჟირებას სთავაზობს
გაზიარება
გაზიარება
რუსული რბილი ძალა
რუსეთის საგარეო საქმეთა სამინისტროსთან დაკავშირებული „გორჩაკოვის ფონდი“, რომელიც 2010 წელს შეიქმნა, ქართველ ახალგაზრდებს რუსეთში უფასო სტაჟირებაზე იწვევს.
განცხადება ქართულ და რუსულ ენებზე დღეს, 12 აგვისტოს, საქართველოში შვეიცარიის საელჩოს რუსეთის ინტერესების სექციამ გაავრცელა.
როგორც განცხადებაში ვკითხულობთ, პროგრამა სამ მიმართულებას მოიცავს – მედიცინას, ბირთვულ ტექნოლოგიებს და საერთაშორისო ურთიერთობებს.
ორგანიზატორების თქმით, ეს არის შესაძლებლობა, რომ ქართველმა ახალგაზრდებმა მიიღონ პრაქტიკული გამოცდილება და დაამყარონ საერთაშორისო პროფესიული კონტაქტები.
განცხადების თანახმად, ტრენინგები 20 ოქტომბერს იწყება და 15 დეკემბერს დასრულდება.
მონაწილეებს ყველა ხარჯი – მგზავრობა, განთავსება და სტიპენდია – სრულად ფინანსდება.
„გორჩაკოვის ფონდი“ ბოლო წლებია სხვადასხვა გზით ცდილობს ქართველ ახალგაზრდებზე გავლენის მოხდენას.
2018 წელს თბილისში იგეგმებოდა „ახალგაზრდა ლიდერების ფორუმი“, რომლის ორგანიზატორიც „საქართველოს რუს ახალგაზრდათა კავშირი“ იყო, თუმცა ღონისძიება არ გაიმართა. მაშინ ორგანიზატორებმა განაცხადეს, რომ ფორუმის ჩაშლის მიზეზი გახდა „ზოგიერთი პირისა და მედიის მხრიდან არამოტივირებული აგრესია“.
გორჩაკოვის ფონდი 2010 წელს იმდროინდელი პრეზიდენტის, დმიტრი მედვედევის ინიციატივით, რუსეთის საგარეო საქმეთა სამინისტრომ დააფუძნა. ფონდს თავისსავე ვებ-გვერდზე უწერია, რომ მისი მიზანია პოსტსაბჭოთა ქვეყნებში რუსული რბილი ძალის გავრცელება. მაგალითად, ბალტიისპირეთის ქვეყნებში, ამ ფონდის საქმიანობა შეზღუდულია.
ამ ფონდის დახმარებით ახორციელებენ საქმიანობას პრორუსული არასამთავრობო ორგანიზაციები მთელ პოსტსაბჭოთა სივრცეში. მაგალითად, “ე.მ. პრიმაკოვის სახელობის ქართულ-რუსული საზოგადოებრივი ცენტრი”, რომელიც საქართველოში მუშაობს, 2013 წელს სწორედ “გორჩაკოვის სახელობის საჯარო დიპლომატიის მხარდაჭერის ფონდმა” დააფუძნა.