ევროპის საბჭოს ადამიანის უფლებების კომისარი შალვა პაპუაშვილს მოუწოდებს, რუსული კანონი არ მიიღონ

რუსული კანონი

ევროპის საბჭოს ადამიანის უფლებების კომისარი მიქაელ ო’ფლაჰერთი საქართველოს პარლამენტის თავმჯდომარეს, შალვა პაპუაშვილს წერილით მიმართავს და მოუწოდებს, პარლამენტმა “უცხოური გავლენის გამჭვირვალობის შესახებ” კანონპროექტის განხილვა შეაჩეროს.

წერილი 11 აპრილით არის დათარიღებული და ო’ფლაჰერთი ითხოვს, რომ მისი ასლი ყველა დეპუტატს გაეგზავნოს. თუმცა როგორც პარტია “ლელოს” დეპუტატმა, ანა ნაცვლიშვილმა სესიის სხდომაზე განაცხადა, წერილის შესახებ მხოლოდ დღეს, 16 აპრილს გახდა ცნობილი.

“მე შეშფოთებული ვარ ამ საკანონმდებლო ინიციატივის თავსებადობით ადამიანის უფლებათა სტანდარტებთან გაერთიანებისა და გამოხატვის თავისუფლების სფეროში, მათ შორის, მისი მიღების მსუსხავი ეფექტი შეიძლება ჰქონდეს მედიასაშუალებებისა და სამოქალაქო საზოგადოების ორგანიზაციების მუშაობაზე, განსაკუთრებით მათზე, რომლებიც ადამიანის უფლებებზე, დემოკრატიისა და კანონის უზენაესობის საკითხებზე მუშაობენ”, – წერს კომისარი.

ო’ფლაჰერთი თავის წერილში ასევე საუბრობს რუსეთში მოქმედი კანონის წინააღმდეგ სტრასბურგის გადაწყვეტილებაზე, რომელშიც აღნიშნულია, რომ იმისათვის, რომ არასამთავრობო ორგანიზაციებს შეეძლოთ შეასრულონ თავიანთი როლი, როგორც “საზოგადოების დარაჯებმა”, მათ უნდა ჰქონდეთ თავისუფლება მოითხოვონ და მიიღონ დაფინანსება სხვადასხვა წყაროდან. გარდა ამისა, მიქაელ ო’ფლაჰერთი მიუთითებს ადამიანის უფლებათა ევროპულ კონვენციაზე, რომ გაერთიანების თავისუფლების ნებისმიერი შეზღუდვა უნდა იყოს დადგენილი კანონით, რაც მოითხოვს სიცხადისა და განჭვრეტადობის ტესტს.

“ამ კანონის მიღების შემთხვევაში, მისმა იმპლემენტაციამ დიდი ალბათობით შეიძლება გამოიწვიოს სტიგმატიზაცია და დისკრედიტაცია სამოქალაქო საზოგადოების ორგანიზაციებისა და მედიასაშუალებებისა, რომლებიც უცხოურ დაფინანსებას იღებენ და მათ საქმიანობას გაართულებს ან შეუძლებელს გახდის.

სამართლებრივი ჩარჩო, რომელიც არეგულირებს არაკომერციული ორგანიზაციების ლეგიტიმურ მუშაობას, უნდა შეიცავდეს დებულებებს, რომლებიც არ არის დისკრიმინაციული და ყოველთვის უნდა ეფუძნებოდეს გამჭვირვალობისა და ანგარიშგების მკაფიო და მიუკერძოებელ სტანდარტებს, მიუხედავად მათი დაფინანსების წყაროებისა.” – განმარტავს კომისარი.

● აკუნინი ქართველებს: თქვენივე ხელისუფლების ინიციატივით, პუტინიზმი ცდილობს თქვენს სახლში დამკვიდრებას
● რაში დასჭირდა “ქართულ ოცნებას” აგენტებზე რუსული კანონის დაბრუნება? ექსპერტების შეფასებები
● მასშტაბური პროტესტი თბილისში. აქციაზე 14 პირი დააკავეს

● 15 აპრილს იურიდიულმა კომიტეტმა ოცნების მიერ ხელმეორედ ინიციირებულ რუსულ კანონს პირველი მოსმენით მხარი დაუჭირა. კანონპროექტი პირველი მოსმენით კენჭისყრაზე დღეს გავა. კომიტეტის თავმჯდომარის, ანრი ოხანაშვილის თქმით, ალტერნატიული კანონპროექტები, რომლებიც ოპოზიციამ დააინიციირა, უარყოფილია. 

● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” მმართველი პარტია რუსულ კანონს ხელახლა აინიციირებს. ამის შესახებ “ქართული ოცნების” ფრაქციის თავმჯდომარემ, მამუკა მდინარაძემ სპეციალურ ბრიფინგზე განაცხადა.

● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგუმენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.

● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიციირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.