სახალხო დამცველი: დაკავებული 180 მოქალაქიდან 93 პოლიციის მხრიდან არასათანადო მოპყრობაზე საუბრობს
რუსულ კანონზე დაკავებული აქტივისტები
სახალხო დამცველის აპარატის ინფორმაციით, ომბუდსმენის რწმუნებულებმა 15 აპრილიდან 17 მაისის პერიოდში აქციებზე დაკავებული 180 პირი მოინახულეს.
ომბუდსმენის ცნობით, 93 პირი მიუთითებდა პოლიციის მხრიდან არასათანადო მოპყრობაზე, ხოლო 71 პირმა ითხოვა რეაგირება, რის თაობაზეც სახალხო დამცველმა სპეციალურ საგამოძიებო სამსახურს მიმართა.
აღნიშნულ პერიოდში, სახალხო დამცველის აპარატის ცხელ ხაზზე 382 შეტყობინება შევიდა.
აგენტების შესახებ რუსული კანონის დამტკიცება და აქტივისტების დაკავება საქართველოში ევროკავშირის დელეგაციის სტუმრობას დაემთხვა. მომხდარი ევროკავშირის წევრი ქვეყნების უმაღლესი თანამდებობის პირებმა ძალიან მკაცრად შეაფასეს.
„ქართული კოშმარი“ – ასე აღწერა საქართველოში არსებული ვითარება ლიეტუვის პარლამენტის საგარეო საქმეთა კომიტეტის თავმჯდომარემ ჟიგიმანტას პავილიონისმა.
მან გაიხსენა ლიეტუვის ისტორია, როდესაც ის ევროკავშირში გაწევრებას ცდილობდა. თქვა, რომ 1997 წელს ლიეტუვა საქართველოსავით იყო.
„იმედგაცრუებული ვარ“ – თქვა ასევე თბილისში მყოფმა გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარემ, მაიკლ როთმა. მან ისაუბრა სანქციებზე. თქვა, რომ იცის, რომ სამოქალაქო საზოგადოების აქტივისტები და პარლამენტარები ითხოვენ სანქციებს. მაგრამ, ყველაზე მკაცრი სანქცია, არის ის, რომ კანდიდატის სტატუსი უფასურდება.
