სომხეთმა საქართველოს გავლით რუსეთში ტვირთების ბორნით გადაზიდვა შეაჩერა
გაზიარება
გაზიარება
რუსეთში ტვირთების ბორნით გადაზიდვა
სომხეთმა საქართველოს გავლით რუსეთში ტვირთების ბორნით გადაზიდვა შეაჩერა, ამის შესახებ განცხადებას სომხეთის ეკონომიკის მინისტრი, ვაჰან ქერობიანი ავრცელებს.
მინისტრის თქმით, საბორნე გადასასვლელმა, რომელიც საქართველოს გავლით სომხეთსა და რუსეთს შორის ტვირთების ტრანსპორტირებისთვის ზემო ლარსის სახმელეთო გზის ალტერნატივა უნდა ყოფილიყო, რამდენიმე თვე იმუშავა, თუმცა, ექსპორტიორებსა და იმპორტიორებში საკმარისი ინტერესი ვერ გამოიწვია. როგორც ქერობიანი აღნიშნავს, სომხეთმა პარტნიორებთან ერთად პროგრამის შეჩერება გადაწყვიტა.
ეკონომიკის მინისტრის განმარტებით, რუსეთი სომხეთის უმსხვილეს სავაჭრო პარტნიორად რჩება, თუმცა, მისი წილი შედარებით შემცირდა. მისივე ცნობით, სიაში მომდევნო ადგილებს არაბთა გაერთიანებული საამიროები, ჩინეთი, საქართველო და აშშ იკავებენ. ამასთან, მინისტრის თქმით, ერევანი ექსპორტის დივერსიფიკაციაზე მუშაობს.
სომხურმა მედიამ, საზღვაო გზით ტვირთების გადაზიდვისა და ბათუმი-ნოვოროსიისკი-ბათუმის მიმართულების გამოყენების დაწყების შესახებ ცნობა გასული წლის მაისში გაავრცელა.
“არმენპრესთან” საუბარში გადამზიდავი კომპანია C&M INTERNATIONAL-ის დირექტორი დავიდ ილოიანი ამბობდა, რომ რუსეთიდან ლარსის გავლით სომხეთში ტვირთების გადაზიდვის ალტერნატივას დიდი ხანია ეძებდნენ, მიმდინარე წლის აპრილიდან კი გადაზიდვები ბათუმი-ნოვოროსიისკი-ბათუმის მიმართულებით დაიწყეს. საზღვაო გზით ტვირთების გადაზიდვას კომპანია სომხეთის მთავრობის სუბსიდიით ახორციელებს.
„ჩვენს გემს 350 კონტეინერის გადაზიდვა შეუძლია. 18 აპრილს პირველი წარმატებული გადაზიდვა განვახორციელეთ, ვგეგმავთ ერთ რეგულარულ, ყოველკვირეულ რეისს ნოვოროსიისკი-ბათუმის და უკუ მიმართულებით. მოთხოვნის შესაბამისად ჩვენ შევძლებთ გადაზიდვების რაოდენობის 2-4 -ჯერ გაზრდას. ახლა ყველაზე მთავარია, განვახორციელოთ რეგულარული, სტაბილური გადაზიდვები კვირაში ერთხელ“, – განაცხადა მაშინ ილოიანმა.
გასული წლის ნოემბერში გადაზიდვები შეფერხდა. სომხეთის ეკონომიკის მინისტრმა ვაჰან ქერობიანმა საქართველოდან რუსეთის მიმართულებით საბორნე გადასასვლელის ამოქმედების შეფერხების მიზეზები დაასახელა და განაცხადა, რომ ფოთის პორტის ოპერატორი კომპანია მკაცრად აკვირდება რუსეთისადმი ევროკავშირისა და აშშ-ის მიერ დაწესებული სანქციების დაცვას. ქერობიანის თქმით, კომპანიისგან ჯერ არ აქვთ პასუხი, რამდენი ხნის შემდეგ მიიღებენ გადაწყვეტილებას ამა თუ იმ ტვირთის გაშვება-არგაშვების თაობაზე.
მოგვიანებით საქართველოს საზღვაო ტრანსპორტის სააგენტომ განცხადება გაავრცელა და სომხური მედიის მიერ გავრცელებულ ინფორმაციას „სინამდვილესთან შეუსაბამო“ და „ინტერპრეტირებული“ უწოდა.
სააგენტოს თანახმად, აპრილში, პალაუს დროშის ქვეშ მცურავმა გემმა ნამდვილად შეასრულა ორი კომერციული რეისი ნოვოროსისკსა და ბათუმს შორის. განცხადებაში ხაზგასმულია ის ფაქტი, რომ ეს არ არის რეგულარული რეისი და სრულად არის კომერციული ხასიათის, რომელიც სისტემატურად ხორციელდება.
„საქართველოს საზღვაო ტრანსპორტის სააგენტო, ფინანსთა სამინისტროს შემოსავლების სამსახურთან კოორდინაციით, მუდმივ რეჟიმში ახორციელებს როგორც გემების, ასევე გემთმფლობელების შემოწმებას საერთაშორისო სანქციებთან მიმართებით. შესაბამისად, თუკი გემი, ან გემის მფლობელი არის სანქციების სიაში, მას არ ეძლევა საქართველოს ნავსადგურებში შემოსვლისა და შესაბამისი პროცედურების განხორციელების უფლება.“ – ნათქვამია საზღვაო ტრანსპორტის სააგენტოს განცხადებაში.
