რუსეთსა და აფხაზეთს შორის საზღვაო მიმოსვლა განახლდა
საზღვაო კომუნიკაცია სოჭსა და სოხუმს შორის
სოჭსა და სოხუმს შორის საზღვაო მიმოსვლა განახლდა. ინიციატივის მიზანია, ტურისტული სეზონის პიკზე რუსეთიდან აფხაზეთში ჩასული დამსვენებლების ნაკადით გადატვირთული საავტომობილო გზების განტვირთვა.
6 აგვისტოს სოჭიდან სოხუმში პირველი რეისი შეასრულა სამგზავრო გემმა “კოსმონავტი პაველ პოპოვიჩი“, რომელიც 120 მგზავრზეა გათვლილი. მან ორ ქალაქს შორის არსებული 145 კილომეტრიანი მანძილი 2 საათსა და 30 წუთში დაფარა.
სოხუმის პორტში გემი აფხაზეთის ე.წ. პრეზიდენტმა ბადრა გუნბამ და რუსეთის პრეზიდენტის ადმინისტრაციის წარმომადგენელმა, სერგეი კირიენკომ მიიღეს. კირიენკო კრემლში აფხაზეთის მიმართულებას კურირებს.
საზეიმო ღონისძიების გამო უსაფრთხოების ზომები გამკაცრდა. ოპოზიციური Telegram-არხის “აიაშარას“ ინფორმაციით, აფხაზურ გემებს სოხუმის პორტის აკვატორიის დატოვება დაევალათ.
რუსეთსა და აფხაზეთს შორის საზღვაო მიმოსვლის აუცილებლობაზე საუბარი წლების განმავლობაში მიმდინარეობდა. თავდაპირველად, დაგეგმილი იყო, რომ ეს ფუნქცია საკრუიზო ლაინერ “კნიაზ ვლადიმირს“ დაკისრებოდა, თუმცა ლაინერის ამ მარშრუტზე გაშვება არაეკონომიურად ჩაითვალა.
შედეგად, მიღებულ იქნა გადაწყვეტილება, რომ სოჭსა და სოხუმს შორის მცირე ზომის, სწრაფმავალი გემი იმოძრავებს — წყალქვეშა ფრთების მქონე ხომალდი “კომეტის“ ტიპის.
გემი, სავარაუდოდ, არასეზონურ პერიოდშიც იმუშავებს, მათ შორის ზამთარში, რადგან მისი კაპიტნის, კონსტანტინ შვიდკოის თქმით, “შავი ზღვა აფხაზეთის წყლებში მშვიდია და ძლიერი შტორმები არ არის“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
