რუსეთის ФСБ აფხაზ ქალებს ბავშვების შემწეობების თაღლითურად მიღებაში ადანაშაულებს
რუსული შემწეობა აფხაზებისთვის
რუსეთის უსაფრთხოების ფედერალურმა სამსახურმა (ФСБ) აფხაზეთში მცხოვრები ქალების მიმართ თაღლითობის ბრალდებით გამოძიება დაიწყო — საქმე ეხება ბავშვებზე რუსეთის სახელმწიფო შემწეობების მიღებას. ბოლო პერიოდში მათმა დაკავებებმა უკვე მასობრივი ხასიათი მიიღო.
აფხაზეთის მოქალაქე ელენა პროსტიტოვა, რომელიც ოთხი შვილის დედაა, აპრილის ბოლოს რუსეთის საზღვარზე დააკავეს. მას ბრალად წაუყენეს სოციალური შემწეობის თაღლითურად მიღება, რაც რუსული კანონმდებლობით 10 წლამდე თავისუფლების აღკვეთას ითვალისწინებს.
აფხაზეთის მოქალაქეების უმრავლესობა ასევე ფლობს რუსეთის მოქალაქეობას. ამ ორმაგი მოქალაქეობის საფუძველზე, ბევრს მიეწოდება რუსეთის სახელმწიფო პენსიები და სხვა სოციალური დახმარებები, მათ შორის — ბავშვებზე გაცემული შემწეობები. თუმცა, როგორც ირკვევა, მხოლოდ მოქალაქეობა საკმარისი არ არის.
ФСБ-ს ბრალდებები ეფუძნება არგუმენტს, რომ მიუხედავად რუსეთის მოქალაქეობისა, პროსტიტოვა და სხვა აფხაზი ქალები მუდმივად ცხოვრობენ აფხაზეთში და არა რუსეთის ტერიტორიაზე, რაც მათ შემწეობის მიღების უფლებას ართმევს.
ამჟამად პროსტიტოვა ადლერში იმყოფება და მას სისხლის სამართლებრივი დევნა ემუქრება. აფხაზეთში დაბრუნება, სადაც მისი შვილები იმყოფებიან, მას აკრძალული აქვს.
მსგავს ვითარებაში კიდევ არაერთი აფხაზი ქალი აღმოჩნდა — ზოგიერთებმა უკვე გაიგეს სამართლებრივი პრობლემების შესახებ, ზოგიერთს კი ამის შესახებ წარმოდგენაც არ აქვს. ფაქტობრივად, ყველას, ვისაც ორმაგი მოქალაქეობა აქვს და ვინც რუსეთის ტერიტორიაზე დარეგისტრირდა დროებით ან მუდმივად ბავშვებზე შემწეობის მისაღებად, საფრთხე ექმნება.
გამოირკვა, რომ რუსეთის კანონმდებლობით არ არის ნებადართული სახელმწიფო შემწეობის მიღება იმ შემთხვევაში, თუ ბენეფიციარი რუსეთში არ ცხოვრობს.
ამ კრიზისზე უკვე გაიმართა აფხაზეთის პარლამენტის სხდომა, სადაც ე.წ. მინისტრებიც მონაწილეობდნენ. სხდომის დიდი ნაწილი დახურულ ფორმატში ჩატარდა, თუმცა დეპუტატებმა წინასწარ განაცხადეს, რომ აფხაზეთის ხელისუფლება ეცდება საკუთარი მოქალაქეების ინტერესების დაცვას.
„ჩვენ ვალდებულები ვართ, მაქსიმალურად დავიცვათ ჩვენი მოქალაქეების ინტერესები ორ ქვეყანას შორის არსებული კანონმდებლობის ფარგლებში“, – განაცხადა აფხაზეთის ე.წ. საგარეო საქმეთა მინისტრმა, ოლეგ ბარციცმა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
