რუსეთი პანდემიის პიკის მოლოდინში

ხელისუფლება ახალ შეზღუდვებს აწესებს, მდიდრები სამედიცინო ტექნიკას ყიდულობენ, სპეციალისტები კარანტინს ითხოვენ, მოქალაქეები კი ბუნებაში მწვადს წვავენ.

მსოფლიოს თითქმის ყველა ქვეყანა უკვე დაახლოებით ორი კვირაა, რაც კარანტინის რეჟიმშია და კორონავირუსის პანდემიის გამო, სოციალური იზოლაციის პროპაგანდას ეწევა. რუსეთში, პირველი შემზღუდავი ზომები მხოლოდ 30 მარტიდან ამოქმედდება.

ამ დრომდე, მოსკოვში, 65 წელზე უფროსი ასაკის ადამიანებს სახლში დარჩენისკენ დაჟინებით მოუწოდებდნენ. ამ ზომის გამკაცრებისთვის, ხანდაზმულ მოსკოველებს 28 მარტიდან სოციალური ბარათები დაუბლოკეს, რომელსაც ისინი საზოგადოებრივი ტრანსპორტით გადაადგილებისთვის იყენებენ.

30 მარტიდან, მოსკოვში, თვითიზოლაციის მოთხოვნა ამოქმედდება ყველასთვის – უკიდურესი აუცილებლობის გარეშე სახლიდან გამოსვლა იკრძალება.

მოთხოვნა მხოლოდ მოსკოვს ეხება.

ასევე, 30 მარტიდან, რუსეთი ყველა საზღვარს კეტავს, მათ შორის, აფხაზეთსა და სამხრეთ ოსეთთან.

28 მარტიდან 5 აპრილამდე, სკოლის მოსწავლეები და სტუდენტები დისტანციურ სწავლებაზე გადაიყვანეს.

ასევე, დაიხურა რესტორნები, კაფეები, გასართობი ადგილები და ყველა მაღაზია, სურსათისა და აფთიაქების გარდა – მაგრამ მხოლოდ მოსკოვსა და პეტერბურგში.

და ბოლოს, ზომა, რომელმაც უზარმაზარი კრიტიკა გამოიწვია:

30 მარტიდან 5 აპრილამდე, მთელ რუსეთში არასამუშაო კვირა გამოაცხადეს – რათა ადამიანებს სოციალურ დისტანცირებაში დაეხმარონ და წინააღმდეგობა გაუწიონ კორონავირუსის გავრცელებას.

მაგრამ, ამავდროულად, ქვეყანაში მაინც არ გამოცხადდა კარანტინი.

• „დასხედით სახლში და ეკლესიაში არ იაროთ“ – მკვეთრი შემობრუნება რუსეთის ხელისუფლებისა და რუსული ეკლესიის პოლიტიკაში
• „მიწა დააყარეთ, მოკვდეს“. კადიროვმა კარანტინის დამრღვევები ტერორისტებს გაუთანაბრა
• კორონავირუსი ირანში: ერთ-ერთი ყველაზე დიდი აფეთქება მსოფლიოში და ხელისუფლების ტყუილი
• სიკვდილი, სკამების დემონტაჟი და ხანდაზმულების იძულებითი დეზინფექცია – კორონავირუსი თურქეთში

„არასამუშაო კვირის დაწესება სავალდებულო კარანტინის გარეშე -დანაშაულია“

«თუკი არ არის სახლში დარჩენის მოთხოვნა, რა თქმა უნდა, ადამიანები წავლენ აგარაკებზე, მწვადს შეწვავენ, ერთმანეთს დააინფიცირებენ. ან მე არ მესმის რაღაც, ან ეს არის ზომა, რომელზეც პუტინმა არ ისაუბრა – საპენსიო ფონდზე დაწოლის შემცირება. გარდაიცვლებიან და პენსიების გადახდა საჭირო აღარ იქნება».

ეს ერთ-ერთია, სოციალურ ქსელებში გაკეთებული ათობით კომენტარიდან. სწორედ ასე მოხდა – რუსეთის ათასობით მოქალაქე პარკში მწვადის შესაწვავად და სათამაშოდ გავიდა.

ინტერნეტში დადებულ უამრავ ვიდეორგოლში, ადამიანები თავს იწონებდნენ უქმეების შესანიშნავად გატარებით. განსაკუთრებით პოპულარული გახდა ვიდეო, რომელიც სოსნოვი ბორიში გადაიღეს.

ოფიციალური ინფორმაციით, რუსეთის დედაქალაქი კორონავირუსით ინფიცრებულთა რაოდენობით ლიდერობს – 28 მარტს 817 ასეთი პაციენტი ჰყავდათ.

ამ ვიდეოებში, დამსვენებლები ახლო-ახლოს სხედან ერთმანეთთან და მწვადებს წვავენ. მათ შორის, ბევრი პენსიონერი და ბავშვია.

პეტერბურგულმა გაზეთმა „ფონტანკამ“ რეპორტაჟი გამოაქვეყნა, რომელსაც ირონიული სათაური გაუკეთა: „რომელი კორონავირუსი? ჩვენ მწვადები და მდინარის პირას მოწყობილი „კარანტინი“ გვაქვს“.

„ფონტანკა“ წერს, რომ მხოლოდ პეტერბურგში, უკანასკნელი დღე-ღამის განმავლობაში, კორონავირუსით ინფიცირებული 11 პაციენტი დაემატათ. 28 მარტს ერთი პაციენტი დაიღუპა, ეს პეტერბურგში ვირუსით გარდაცვალების პირველი შემთხვევაა.

პრეზიდენტ ვლადიმირ პუტინთან (რომელიც 67 წლისაა) დაკავშირებით გამოცხადებულია, რომ ის საკუთარ რეზიდენციაში, კუნძულ ვალდაიზე იმყოფება და მუშაობს. ეს ადგილი მოსკოვიდან 400 კილომეტრშია.

«საჭიროა სასწრაფოდ მკაცრი კარანტინი, ასევე, ეპიდემიასა და ეკონომიკურ კრიზისთან ბრძოლის გეგმა – თუ უკვე გვიან არ არის»

პრეზიდენტისადმი ასეთი მიმართვით გამოვიდა 14 წამყვანი რუსი ეკონომისტი, რომლებიც მოღვაწეობენ, როგორც რუსეთში, ის საზღვარგარეთ.

«შემოვიღოთ კარანტინი თუ არ შემოვიღოთ – ეს ტყუილი დილემაა. საკითხავია მხოლოდ ის, თუ როდის უნდა შემოვიღოთ – როდესაც ინფიცირებულები ქვეყანაში ასეულები არიან თუ როდესაც მათი რიცხვი ათასები და ათი ათასები გახდება. თუკი გადამწყვეტად და ეფექტურად დაწესდება კარანტინი, მოქალაქეები კი დაცული იქნებიან ეკონომიკური შედეგებისგან, კრიზისი მოკლევადიანი იქნება, აღდგენა – სწრაფი.

წინააღმდეგ შემთხვევაში, ეკონომიკური ვარდნა იქნება ღრმა, სიცოცხლის დანაკარგები კი – მნიშვნელოვანი».

«ხელოვნური სუნთქვის აპარატები – მდიდრებს?

სოციალურ ქსელებში მწვავე დისკუსიას იწვევს რუსულ მედიაში გამოქვეყნებული პუბლიკაციები იმის შესახებ, რომ, როდესაც უმრავლესობა თვითიზოლაციის ნაცვლად ბუნებაში მწვადებს წვავს, მდიდარი რუსები პირადი მოხმარებისთვის ხელოვნური სუნთქვის აპარატებს ყიდულობენ.

ასევე, აღშფოთებას იწვევს ინფორმაცია იმის თაობაზე, რომ მარტში, როდესაც ეპიდემია უკვე გახურებული იყო და დაინფიცირებულ ქვეყნებთან ავიამიმოსვლა შეწყვეტილი, რუსი მაღალჩინოსნების კერძო თვითმფრინავებმა 20-ზე მეტი რეისი შეასრულეს იტალიის, საფრანგეთის, აშშ-ისა და დუბაის მიმართულებით.

მაგრამ რუსეთში, საზოგადოების განსაკუთრებით ემოციური რეაქცია გამოიწვია ხელისუფლების ხანგრძლივმა დუმილმა ქვეყანაში კორონავირუსის გავრცელების შესახებ – მას შემდეგაც კი, რაც ჯანდაცვის მსოფლიო ორგანიზაციამ მიმდინარე მოვლენას პანდემია უწოდა.