„აჭამეთ ჩემს კატებს და მე დავრჩები სახლში“ - რუსეთში, ინტერნეტში, მრავალათასიანი „საპროტესტო აქცია“ გაიმართა
ძირითადი წყაროები – BBC и Панорама Ростов-на-Дону
რუსეთის სხვადასხვა ქალაქის ქუჩებიდან, ათასობით ადამიანი ჩაერთო საპროტესტო მიტინგში, რომლის მთავარი მოთხოვნაც ან რეალური საგანგებო მდგომარეობის გამოცხადება და კორონავირუსის პანდემიასთან ასე ბრძოლა, ან შეზღუდვების გაუქმება, ბიზნესების გახსნა და საზოგადოებრივი ტრანსპორტის მუშაობის აღდგენა იყო.
„ჩვენ საჭმელი არ გვაქვს!“ – იყო ყველაზე გავრცელებული ლოზუნგი.
ყველაზე მრავალრიცხოვანი აქციები იმართება სამთავრობო და მუნიციპალური შენობების წინ არსებულ მოედნებზე.
ეს წინააღმდეგობის მოძრაობა – ვირტუალურია. ყველაფერი ინტერნეტში, „იანდექს.რუკისა“ და „იანდექს.ნავიგატორის“ რუკებზე ხდება – Google Maps-ის რუსული ანალოგზე.
ეს სერვისები პოპულარულია იმით, რომ მისი გამოყენება არა მხოლოდ ნავიგატორად შეიძლება. ის თავისებური ჩატიც არის. განსაკუთრებით აქტიური მიმოწერა მძღოლებს შორის იმართება, როდესაც ისინი საცობებში ერთად დგანან.
ახლა განსაკუთრებით მნიშვნელოვანი გახდა შესაძლებლობა, რომელიც ადამიანისგან რაიმე კონკრეტულ ადგილზე ყოფნას არ მოითხოვს. შესაძლებელია უბრალოდ ონლაინრუკაზე, რაიმე წერტილზე თავის მონიშვნა და შეგიძლია კომენტარები სწორედ იქ წერო.
და დაიწყო თვითიზოლაციის რეჟიმის წინააღმდეგ საპროტესტო კომენტარების დიდი ტალღა.
რატომ ითხოვენ ადამიანები საგანგებო მდგომარეობის ოფიციალურად გამოცხადებას?
რუსეთის ქალაქებში, კარანტინი დაწესებული არ არის. ამის ნაცვლად შემოღებულია თვითიზოლაციის რეჟიმი – ცნება, რომელსაც კანონი არ ითვალისწინებს.
ეს იმისთვის გაკეთდა, რომ ადამიანებსა და ბიზნესებს კომპენსაცია არ გადაუხადონ კარანტინის გამოცხადების გამო.
ამავდროულად, თვითიზოლაციის რეჟიმის დამრღვევებს მსხვილი ჯარიმა ემუქრებათ – ათას დოლარამდე.
ონლაინ საპროტესტო აქციის ციფრული დაშლა
საპროტესტო მიტინგი სტიქიურად, დონის როსტოვიდან დაიწყო. ათასობით კომენტარი წამოვიდა, განსაკუთრებით „საპროტესტო აქციიდან“, რომელიც ადგილობრივი ადმინისტრაციის შენობასთან იმართებოდა:
„რით იცხოვროს იმ ხალხმა, რომლებიც უმუშევრები დარჩნენ?!“; „აჭამეთ ჩემს შვილებს“; „გვშია! სამუშაო არ არის!“; „აჭამეთ ჩემს კატებს და მე დავრჩები სახლში!“ – წერდნენ მოქალაქეები.
მაგრამ კომენტარები სწრაფად ქრება. როგორც ერთ-ერთ კომენტარში აღინიშნა, კომპანია „იანდექსს“ მოეწონა „საპროტესტო აქციის ციფრული დაშლა“.
როგორც „იანდექს.ნავიგატორის“ წარმომადგენელმა განმარტა, ინფორმაცია, რომელიც არ შეეხება გზებზე არსებულ ვითარებას ან შეიცავს გინებას, ყოველთვის იშლება.
როსტოველების იდეა მალე შეამჩნიეს და მხარი დაუჭირეს რუსეთის სხვა ქალაქების – სამარის, ნიჟნი ნოვგოროდის, კრასნოიარსკის, კრასნოდარის, ბელგოროდის მცხოვრებლებმა.
მოსკოვში, აქცია პირდაპირ წითელ მოედანზე, კრემლის წინ გაიმართა. მას შემდეგ, რაც მოდერატორებმა კრემლის გარშემო გაკეთებული კომენტარები წაშალეს, მომხმარებლებმა „მდუმარე მსვლელობა“ მოაწყვეს ტვერის ქუჩაზე.
პეტერბურგში, პროტესტის მონაწილეები სასახლის მოედანზე „იკრიბებიან“.
24 აპრილის მონაცემებით, რუსეთში კორონავირუსით 62 773 ადამიანი დაინფიცირდა, მათგან 555 გარდაიცვალა. როსტოვსა და როსტოვის ოლქში – 300 ინფიცირებულია. ყველაზე დაზარალებული რეგიონი – მოსკოვია, დაახლოებით, 34 ათასი ინფიცირებულით.
