როსავიაციამ საქართველოს მიმართულებით 284 ფრენის შესრულების ნებართვა გასცა

როსავიაციამ საქართველოს მიმართულებით ფრენების ნებართვა გასცა

“რადიო თავისუფლების” რუსული გამოცემა Эхо Кавказа-ს ცნობით, რუსეთის საჰაერო ტრანსპორტის ფედერალურმა სააგენტომ (როსავიაცია) რუსეთსა და საქართველოს შორის კვირაში 284 ფრენის შესრულების ნებართვა გასცა. დოკუმენტი რუსეთის დეპარტამენტის ვებგვერდზეა გამოქვეყნებული.

სტატიაში აღნიშნულია, რომ საქართველოს ხელისუფლებას ახალი ფრენების ნებართვა ჯერ არ გაუცია. მედიის ცნობით, ნებართვების უმეტესობა დეპარტამენტმა ავიაკომპანია Red Wings-ისთვის გასცა, რომელსაც სურს ფრენები შეასრულოს შემდეგ მიმართულებებზე:

• ვლადიკავკაზიდან ბათუმსა და თბილისში (კვირაში შვიდი რეისი);
• ეკატერინბურგიდან ბათუმსა და ქუთაისში (თითო შვიდი რეისი);
• ჟუკოვსკიდან ბათუმის, ქუთაისისა და თბილისის მიმართულებით (შვიდ-შვიდი რეისი);
• ყაზანიდან ბათუმისა და ქუთაისის მიმართულებით (შვიდ-შვიდი რეისი);
• კრასნოდარიდან თბილისამდე (დოკუმენტში მითითებულია სიხშირის 3-დან შვიდ რეისამდე ზრდის შესახებ), ბათუმი და ქუთაისი (შვიდ-შვიდი რეისი);
• მახაჩკალიდან ბათუმის, ქუთაისისა და თბილისის მიმართულებით (შვიდ-შვიდი რეისი);
• “მინვოდიდან” ბათუმსა და თბილისში (შვიდ-შვიდი რეისი);
• მოსკოვიდან ბათუმსა და ქუთაისში (დოკუმენტში მითითებულია სიხშირის 3-დან შვიდ რეისამდე ზრდის შესახებ);
• ნიჟნი ნოვგოროდიდან ბათუმში, ქუთაისსა და თბილისში (შვიდ-შვიდი რეისი);
• პერმიდან ბათუმის, ქუთაისისა და თბილისის მიმართულებით (შვიდ-შვიდი რეისი);
• დონის როსტოვიდან ბათუმში, ქუთაისსა და თბილისში (შვიდ-შვიდი რეისი);
• სამარადან ბათუმისა და ქუთაისის მიმართულებით (შვიდ-შვიდი რეისი);
• სოჭიდან თბილისამდე (სიხშირე გაიზარდა სამიდან შვიდ რეისამდე), ბათუმი და ქუთაისი (შვიდ-შვიდი რეისი);
• ტიუმენიდან ქუთაისისა და თბილისის მიმართულებით (შვიდ-შვიდი რეისი);
• უფადან ქუთაისისა და თბილისის მიმართულებით (შვიდ-შვიდი რეისი);
• ჩელიაბინსკიდან ბათუმში, ქუთაისსა და თბილისში (შვიდ-შვიდი რეისი).

გამოცემა ასევე აღნიშნავს, რომ გარდა ამისა, ავიაკომპანიებს Россия-ს (სოჭი-თბილისი, კვირაში შვიდი რეისი) და Ямал-ს (ტიუმენ-თბილისი და ტიუმენ-ბათუმი, თითო-თითო რეისი) შეეძლებათ საქართველოში ფრენების დაიწყონ, თუმცა ავიაკომპანიებს რუსეთის დეპარტამენტის მიერ მიღებულ გადაწყვეტილებაზე კომენტარი ჯერ არ გაუკეთებიათ.

აღსანიშნავია, რომ 2022 წელს, აშშ-ს ვაჭრობის დეპარტამენტმა Red Wing-ის ორ თვითმფრინავს სანქციები დაუწესა რუსეთსა და ბელარუსში შესრულებული ფრენების გამო, რაც ბაიდენის ადმინისტრაციის მიერ უკრაინაში აგრესიის შედეგად რუსეთის წინააღმდეგ დაწესებულ საექსპორტო შეზღუდვებს არღვევდა. 

5 ივლისს ცნობილი გახდა, რომ ქართული ავიაკომპანია Georgian Airways მოსკოვიდან თბილისის გავლით ქალაქ ნიცაში ტრანზიტულ ფრენებს 5 ივლისიდან იწყებს. მათივე ცნობით, თბილისიდან ნიცაში რეისები ყოველკვირეულად, ოთხშაბათს და შაბათს შესრულდება. 

● “გარეწრებო”, “კომიკურო არარაობებო” – “ჯორჯიან ეარვეისის” სკანდალური განცხადება და საზოგადოების რეაქცია
● “თქვენ აქ არავინ გელოდებათ!” – როგორ დახვდნენ თბილისში პირველ რეისს მოსკოვიდან. ფოტორეპორტაჟი და კომენტარები
● Georgian Airways რუსეთის მოქალაქეებისთვის თბილისიდან ევროპაში ტრანზიტულ რეისებს იწყებს – RTVI

● პირდაპირი ფრენები საქართველოსა და რუსეთს შორის ვლადიმირ პუტინის 10 მაისის გადაწყვეტილებით აღდგა.

● საქართველოს პრეზიდენტის, სამოქალაქო საზოგადოების, ოპოზიციის და დასავლელი პარტნიორების პროტესტის მიუხედავად, საქართველოს მთავრობა პუტინის ამ ინიციატივას შეუერთდა. პუტინის განცხადებიდან რამდენიმე დღეში, 20 მაისს, მთავარმა ეროვნულმა ავიაგადამზიდმა “ჯორჯიან ეარვეისმა” მოსკოვის მიმართულებით პირველი რეისი განახორციელა. საქართველოს პრეზიდენტმა სალომე ზურაბიშვილმა ამის გამო “ჯორჯიან ეარვეისს” ბოიკოტი გამოუცხადა.

● 1 ივლისს უკრაინამ სანქციების ახალი პაკეტი მიიღო. სანქცირებულთა სიაში ასევე აღმოჩნდა რუსულ და ბელარუსულ კომპანიებთან ერთად ქართული ავიაკომპანია Georgian Airways, რომელსაც სანქციები 10 წლით დაუწესდა. განკარგულების თანახმად, გადამზიდავის წინააღმდეგ მიღებული ზომები მოიცავს აქტივების გაყინვას, ასევე უკრაინის ტერიტორიაზე ფრენების სრულ აკრძალვას.