რომის პაპი ფრანცისკე 88 წლის ასაკში გარდაიცვალა
რომის პაპი გარდაიცვალა
რომის პაპი ფრანცისკე 21 აპრილს ვატიკანში, საკუთარ რეზიდენციაში გარდაიცვალა.
„მთელი მისი ცხოვრება მიძღვნილი იყო უფლისა და მისი ეკლესიის მსახურებას. მან გვასწავლა, როგორ ვიცხოვროთ სახარებისეულ ღირებულებებთან ერთგულებით, სიმამაცით და უნივერსალური სიყვარულით — განსაკუთრებით ღარიბთა და დაუცველთა სასარგებლოდ. უზარმაზარი მადლიერებით მისი როგორც ჭეშმარიტი ქრისტეს მოწაფის მაგალითისთვის, ჩვენ ვაბარებთ პაპ ფრანცისკეს სულს სამების უსაზღვრო მოწყალებას,“ — განაცხადა კარდინალმა კევინ ფარელმა, რომელმაც ფრანცისკეს გარდაცვალება გამოაცხადა.
ფრანცისკე (საერო სახელი — ხორხე მარიო ბერგოლიო) რომის პაპად 2013 წლის მარტში აირჩიეს. მან ამ პოსტზე შეცვალა ბენედიქტე XVI, რომელმაც ჯანმრთელობის მდგომარეობის გამო გადადგომა გადაწყვიტა. ფრანცისკე გახდა პირველი პაპი ისტორიაში ამერიკის კონტინენტიდან და პირველი იეზუიტი ამ პოზიციაზე.
ხორხე მარიო ბერგოლიო დაიბადა 1936 წლის 17 დეკემბერს, ბუენოს-აირესში, რკინიგზელის ოჯახში. ქიმიკოს ტექნოლოგის დიპლომის მიღების შემდეგ ის სემინარიაში შევიდა. 1963 წელს მიიღო ფილოსოფიის ლიცენციატის ხარისხი, ხოლო 1970 წელს — თეოლოგიის ლიცენციატის. 1969 წლის დეკემბერში ბერგოლიო მღვდლად იქნა ხელდასხმული და არგენტინის იეზუიტთა ორდენში სხვადასხვა თანამდებობაზე მსახურობდა. 2001 წლის თებერვალში რომის პაპმა იოანე პავლე II-მ იგი კარდინალად გამოაცხადა.
2025 წლის თებერვალში რომის პაპი ფრანცისკე ბრონქიტის გართულებით ჰოსპიტალში გადაიყვანეს. მოგვიანებით მისი მდგომარეობა მკვეთრად გაუარესდა — მას დაუდგინდა ორმხრივი პნევმონია და რამდენჯერმე საჭირო გახდა ხელოვნური სუნთქვის აპარატზე მიერთება. კარდინალმა ჯანფრანკო რავაზიმ განაცხადა, რომ ფრანცისკე, შესაძლოა გადადგეს, „თუკი პაპის მოვალეობების შესრულება გაუჭირდება“.
23 მარტს საავადმყოფოში 38-დღიანი ყოფნის შემდეგ ფრანცისკე ვატიკანში დაბრუნდა.
20 აპრილს, აღდგომა დღეს, დღისით, მან წმინდა პეტრეს მოედანზე შეკრებილ მორწმუნეებს სიტყვით მიმართა. გამოსვლაში პაპმა მოითხოვა „გაზის სექტორში ცეცხლის დაუყოვნებლივ შეწყვეტა, [ისრაელის] მძევლების გათავისუფლება და ჰუმანიტარული დახმარების დაუბრკოლებლად მიწოდება“ ადგილობრივი მოსახლეობისთვის. მან ასევე ახსენა უკრაინა და მოუწოდა ყველა მხარეს გააგრძელოს ძალისხმევა „სამართლიანი და მდგრადი მშვიდობის“ მისაღწევად.
