საქართველო 2015: ექვსი ყველაზე მნიშვნელოვანი მოვლენა

1. 13 ივნისის სტიქია

თბილისში დატრიალებულმა ამ ტრაგედიამ არა მხოლოდ საქართველო, არამედ მთელი მსოფლიო შეძრა.
20 დაღუპული, 2 უგზო უკვლოდ დაკარგული, 154 უსახლკაროდ დარჩენილი ოჯახი, 800 დაზარალებული, 56 მილიონი ლარი ზარალი _ ასეთია ის შემზარავი სტატისტიკა, რომელიც 13 ივნისის ღამეს მდინარე ვერეს ადიდებას მოჰყვა.

წყლისგან წაღებული სახლები და მანქანები, წყალქვეშ მოქცეული ზოოპარკი და მტაცებელი ცხოველები თბილისის ცენტრში.

ქუჩაში, ესტაკადასთან მოსეირნე ბეჰემოტი საერთაშორისო მედიის ფოკუსში მოექცა.

13 ივნისი, უდავოდ, საქართველოსთვის წლის ყველაზე ტრაგიკული დღე იყო.

2. რუსთავი 2-ის საქმე

ამ ოპოზიციური არხის გარშემო ვითარება მას შემდეგ დაიძაბა,რაც არხის ყოფილმა მფლობელმა, ბიზნესმენმა ქიბარ ხალვაშმა სასამართლოში სარჩელი შეიტანა და ტელეკომპანიის 100– პროცენტიანი წილი მოითხოვა. ხალვაში აცხადებს, რომ 2006 წელს სააკაშვილმა ტელეკომპანია ძალის გამოყენებით დაათმობინა და ახლა საკუთარი, უკანონოდ ჩამორთმეული ქონების დაბრუნებას ცდილობს.  

რუსთავი 2-ის მენეჯმენტი, არხზე მომუშავე ჟურნალისტები და საზოგადოების დიდი ნაწილი მიიჩნევს, რომ ხალვაშის ხელით ხელისუფლება მისთვის არაკომფორტული არხის მითვისებას ცდილობს, რადგან მოახლოებული საპარლამენტო არჩევნებისთვის საინფორმაციო ველი მოისუფთავოს.

რუსთავი 2-ის დასაცავად საზოგადოების წარმომადგენლები და უბრალო მოქალაქეები რამდენიმე კვირის განმავლობაში სასამართლო შენობასთან საპროტესტო აქციებს მართავდნენ. პირველი ინსტანციის სასამართლო დავა ხალვაშის სასარგებლოდ დასრულდა.

უკვე 2016 წელს ეს საქმე სააპელაციო სასამართლოს განაჩენს ელის. მანამდე კი არხზე ძველი მენეჯმენტი რჩება.

3. სკანდალი შეწყალების კომისიის გარშემო

საქართველოს პრეზიდენტთან არსებული შეწყალების კომისიის ყოფილმა თავმჯდომარემ ალექსანდრე ელისაშვილმა მმართველი გუნდის ლიდერები _ პარლამენტის ვიცე სპიკერი მანანა კობახიძე და ადამიანის უფლებათა დაცვის საპარლამენტო კომიტეტის თავმჯდომარე ეკა ბესელია ზეწოლასა და კორიუფციაში დაადანაშაულა.

ელისაშვილი აცხადებს, რომ კობახიძე და ბესელია აიძულებდნენ მას, შეწყალებულთა სიაში კოკაინის საქმეზე დაკავებული პატიმრები შეეყვანა. ელისაშვილი, რომელიც ამჟამად თბილისის საკრებულოს დამოუკიდებელი დეპუტატია, ამტკიცებს, რომ ამ საქმის სანაცვლოდ, ბესელია და კობახიძე მილიონნახევარ ლარს მიიღებდნენ. ამ ბრალდებებს კატეგორიულად უარყოფენ “ქართული ოცნების დეპუტატები და აცხადებენ, რომ ელისაშვილმა სიცრუისთვის პასუხი უნდა აგოს.

პოლიტიკურმა ოპოზიციამ უკვე უწოდა ამ ამბავს “პოლიტიკური სკანდალი, რომელიც ჯერ არ ყოფილა საქართველოში.

საქმეზე დაწყებულია გამოძიება, თუმცა პასუხები ჯერ არ არის. “ეს საქმე ვიღაცის ციხეში ჩასმის გარეშე არ დამთავრდება, _ აცხადებს პოლიტიკური ოპოზიცია.

4. ვიზალიბერალიზაცია

18 დეკემბერს ევროკომისიამ საქართველოსთან უვიზო რეჟიმის შემოღებას დაუჭირა მხარი, რაც იმას ნიშნავს, რომ დიდი ალბათობით, უკვე 2016 წლის ზაფხულიდან, საქართველოს მოქალაქეები ევროპაში უვიზოდ იმოგზაურებენ. ევროპასთან უვიზო მიმოსვლის შესაძლებლობას თბილისმა “დამოუკიდებელი საქართველოს ისტორიაში უმნიშვნელოვანესი მოვლენა უწოდა

5. ლარის გაუფასურება და ინფლაცია

ლარის გაუფასურების ტენდენცია ჯერ კიდევ 2014 წლის ბოლოს დაიწყო, თუმცა 2015 წელს საქართველოს ეროვნულმა ვალუტამ საკუთარი რეკორდი მოხსნა და დოლართან მიმართებაში ისტორიულ მინიმუმამდე დავიდა. ლარი 2015 წელს 36 პროცენტით გაუფასურდა.

2015 წლის 30 დეკემბერს ლარის ოფიციალური გაცვლითი კურსი დოლართან მიმართებაში არის _ 
“2015 წელი იყო ყველაზე წარუმატებელი წელი ბოლო 17 წლის განმავლობაში. მოსახლეობა ყველაზე მეტად გაღარიბდა წინა წლებთან შედარებით, _ ასე შეაჯამა წელი ეკონომიკურმა ექსპერტმა რომან გოცირიძემ.

სამაგიეროდ, ვარდნა არ შეხებია სახელმწიფო უწყებებში დასაქმებული ჩინოვნიკების პრემიებსა და სახელფასო დანამატებს. მაგალითისთვის, იუსტიციის სამინისტროში 206 პროცენტით გაიზარდა პრემიებისა და სახელფასო დანამატების რაოდენობა; სასჯელაღსრულებისა და პრობაციის სამინისტროში _ 412 პროცენტით, კულტურის სამინისტროში _ 1509 პროცენტით.

6. პრემიერის გადადგომა და ახალი პრემიერი

წლის ბოლოს საქართველოს ახალი პრემიერ მინისტრი ჰყავს. გიორგი კვირიკაშვილმა ეს პოსტი მას შემდეგ დაიკავა, რაც მისმა წინამორბედმა _ ირაკლი ღარიბაშვილმა 23 დეკემბერს გადადგომის შესახებ მოულოდნელი განცხადება გააკეთა. ღარიბაშვილს არ დაუკონკრეტებია გადადგომის მიზეზი. პოლიტიკის ექსპერტთა ნაწილი სამთავრობო ცვლილებებს კოალიცია ‘ქართული ოცნებისა’ და მთავრობის რეიტინგის კლებას უკავშირებს. მათი აზრით, ღარიბაშვილის გადადგომის შესახებ გადაწყვეტილება ყოფილმა პრემიერ-მინისტრმა ბიძინა ივანიშვილმა მიიღო, რომელსაც დღეს არავითარი ოფიციალური თანამდებობა არ უკავია. თუმცა, ექსპერტთა აზრით, სწორედ ის არის ქვეყნის არაფორმალური მმართველი.