როგორ მივიღოთ საქართველოს მოქალაქეობა. დეტალური გიდი მოქალაქეობის არმქონე პირებისთვის

როგორ მივიღოთ საქართველოს მოქალაქეობა

საქართველოში ცხოვრობს რამდენიმე ათასი ადამიანი, რომლებიც ამ ქვეყანაში დაიბადნენ, გაიზარდნენ, მაგრამ საქართველოს მოქალაქეობა არ აქვთ. ესენი არიან ის ადამიანები, რომლებიც სხვადასხვა დროს საცხოვრებლად ან სამუშაოდ სხვა ქვეყანაში, უმეტესად რუსეთში წავიდნენ. 

ასეთი ბევრია სამხრეთ საქართველოში, ჯავახეთში, სადაც კომპაქტურად ცხოვრობენ ეთნიკური სომხები. ჯავახეთში ათი ოჯახიდან ექვსიდან კაცები გაზაფხულიდან შემოდგომამდე პერიოდს რუსეთში ატარებენ, სეზონურ სამუშაოზე. მათ დიდ ნაწილს რუსეთის ან სომხეთის მოქალაქეობა აქვს, რადგან საქართველოს მოქალაქეობით უვიზოდ რუსეთში ვერ წავიდოდნენ. შესაბამისად, ავტომატურად შეწყვეტილი აქვთ საქართველოს მოქალაქეობა. 

---

• საქართველოს ცივი სამხრეთი
• მექსიკის გავლით ამერიკაში – სად და რატომ გარბიან ქართველები
• დედა-შვილობა სკაიპით. ათასობით ემიგრანტი ქალი ვერ ხედავს, როგორ იზრდებიან მათი შვილები
• სამსახური პოლონეთში – ახალგაჭრილი გზა ევროპაში საქართველოს მოქალაქეებისთვის

---

ჯავახეთის გარდა, საქართველოს მოქალაქოება არ აქვს ბევრ დევნილს. უმეტესად, აფხაზეთიდან დევნილებს, რომლებიც აფხაზეთის ომის შემდეგ, 90-იან წლებში, რუსეთში წავიდნენ საცხოვრებლად და სამუშაოდ.

უკრაინის ომმა ბევრი რამ შეცვალა – რუსული პასპორტით დღეს ბევრი რამ გართულდა, მათ შორის, მოგზაურობა ევროპის ქვეყნებში. ასევე, რუსეთში გამოცხადებულმა მობილიზაციამ ბევრი ადამიანი, მათ შორის, ეთნიკურად ქართველები, ფრონტის ხაზზე მოხვედრის საფრთხის წინაშე დააყენა. შესაბამისად, დღეს მნიშვნელოვნად არის გაზრდილი იმ ადამიანთა რიცხვი, რომლებსაც საქართველოს მოქალაქეობის დაბრუნება უნდათ.

თუმცა, აღმოჩნდა, რომ ეს არც ის მარტივი საქმეა.

საქართველოში დიდი ხანია პერიოდულად ისმის მოთხოვნა, რომ ეთნიკური ქართველებისთვის უნდა გამარტივდეს მოქალაქეობის მიღების პროცედურები. ამ საკითხს თვით საქართველოს პრეზიდენტი ლობირებს, რომელიც თავის საჯარო გამოსვლებში ხშირად ეხება აღნიშნულ თემას.

ერთ-ერთ ბოლო გამოსვლაში სალომე ზურაბიშვილმა გააკრიტიკა საქართველოს ხელისუფლება, რომელიც რუსეთში მცხოვრებ ქართველებზე ზრუნვის მოტივით მიესალმა რუსეთის მხრიდან პირდაპირ ფრენების აღდგენას და უვიზო რეჟიმის შემოღებას. ზურაბიშვილმა თქვა, რომ თუკი ხელისუფლებას მართლაც ადარდებს თანამემამულეების ბედი, მაშინ მათთვის მოქალაქეობის აღდგენის პროცედურები უნდა გაამარტივოს:

“თუ ესოდენ გვაინტერესებს ქართული წარმოშობის თანამემამულეების ბედი, საინტერესოა, რატომ ვერაფრით მივაღწიე შედეგს იუსტიციასთან ოთხწლიანი მოლაპარაკებებით, ანუ იმას, რომ გამარტივდეს მოქალაქეობის მინიჭება, რათა ხელოვნურად, გაუგებარი ტესტებით არ ვართულებდეთ საქართველოს მოქალაქეობის აღდგენას ან მინიჭებას”.

დღეს, 5 ივნისს, საქართველოს იუსტიციის მინისტრმა თქვა, რომ ეთნიკური ქართველებისთვის მოქალაქეობის მიღების პროცედურები გამარტივდება. საუბარია ორ დეტალზე: ერთი – 10-დან 5 წლამდე შემცირდება საქართველოში უწყვეტად ცხოვრების ხანგრძლივობა. და მეორე, მსურველები ჯერ გამოცდებს ჩააბარებენ და შემდეგ დაიწყება პროცედურა, რომ თუ გამოცდა ვერ ჩააბარეს, ზედმეტი ხარჯი და ბიუროკრატია თავიდან აიცილონ.

რა ხდება ახლა? რა გზა უნდა გაიარონ ადამიანებმა საქართველოს მოქალაქეობის მისაღებად? – JAMnews-მა ორგანიზაცია “უფლებები საქართველოს” იურისტთან, ნინო ხეცაძესთან ერთად, შეისწავლა ყველა კანონი და დადგენილება და დეტალურად ვხსნით, როგორია პროცედურა დღეს.

მოქალაქეობის მინიჭების რა ფორმები არსებობს:

მოქალაქეობა გულისხმობს სამართლებრივ კავშირს პიროვნებასა და  სახელმწიფოს შორის. 

ეს კავშირი მოქალაქეს ანიჭებს პიროვნული თავისუფლების, ღირსეული ცხოვრების, განათლების, არჩევნებში მონაწილეობის, მინიმალური შემოსავლის მიღების უფლებებს. მაგრამ, ამავდროულად გარკვეულ ვალდებულებებსაც აკისრებს, მაგალითად, ქვეყნის კანონმდებლობის დაცვას.

საქართველოს მოქალაქეობის მოიპოვება ორი გზით: დაბადებითა და ნატურალიზაციით. 

დაბადებით მოპოვება, ცხადია, მარტივი გზაა. ადამიანი დაბადებიდანვე ითვლება საქართველოს მოქალაქედ, თუ: 

• დაიბადა საქართველოში და მისი ერთი მშობელი მაინც არის საქართველოს მოქალაქე;
  
• დაიბადა საქართველოში სუროგაციით  და მისი იურიდიული მშობლები არ ცნობენ თავისი ქვეყნის მოქალაქედ; 
  
• დაიბადა საქართველოს ტერიტორიაზე და მისი ორივე მშობელი საქართველოს მოქალაქეობის არმქონე პირია. (ეს სტატუსი ოფიციალურად უნდა ჰქონდეთ მშობლებს მინიჭებული)
  
• დაიბადა საქართველოში, მისი ერთი მშობელი არის მოქალაქეობის არმქონე და მეორე მშობლის ვინაობა უცნობია. 

ნატურალიზაციის გზით მოქალაქეობის მინიჭება ნიშნავს, რომ სახელმწიფო თავის მოქალაქეობას ანიჭებს უცხოელს, ან მოქალაქეობის არმქონე პირს.  ასეთმა პირმა სახელმწიფოს თავად უნდა მიმართოს, მოქალაქეობის მიღება მისი სურვილი უნდა იყოს. 

2020 წლის აღწერით, რუსეთში 114 ათასამდე ეთნიკურად ქართველი ცხოვრობს. ოცნება ამტკიცებს, რომ იქ მილიონამდე ქართველია

რუსეთში მხოლოდ 3 045 პირია საქართველოს მოქალაქე

რას ნიშნავს ნატურალიზაცია? ანუ, როგორ შეიძლება მივიღო მოქალაქეობა, თუ ის დაბადებით არ მაქვს?

არსებობს არსებობს ხუთი წესი, რომელთა მიხედვითაც უცხოელს შეიძლება მიენიჭოს საქართველოს მოქალაქეობა:

1. ჩვეულებრივი წესით მინიჭება
2. გამარტივებული წესით მინიჭება 
3. სპეციალური წესით მინიჭება
4. აღდგენის წესით მინიჭება
5. საგამონაკლისო წესით მინიჭება  

* ჩვეულებრივი წესი 

ჩვეულებრივი წესით მოქალაქეობის მისანიჭებლად პირმა ოთხი პირობა უნდა დააკმაყოფილოს:  

1. ბოლო ათი წლის განმავლობაში უწყვეტად ცხოვრობდეს საქართველოში; უწყვეტად ცხოვრება ნიშნავს, რომ მას ერთი წლის განმავლობაში, ანუ 365 დღიდან, 90 დღეზე მეტი ვადით არ ჰქონდეს დატოვებული საქართველოს ტერიტორია. გამონაკლისია როდესაც ადამიანი სასწავლებლად ან სამკურნალოდ მიდის. ასეთი გასვლის მაქსიმუმიც ორი წელია. ანუ, ათი წლიდან ორი წელი თუ იყო უცხოეთში სამკურნალოდ ან სასწავლებლად და ამას დაადასტურებს, მას ჩაეთვლება უწყვეტი ათწლიანი ცხოვრება.

2. ჩააბაროს გამოცდა ქართულ ენაში,ანუ, მეორე პირობა სახელმწიფო ენის ცოდნაა მინიმალურ დონეზე. ეს ცოდნა მოწმდება გასაუბრებით, ან ტესტირებით. პირი თავად ირჩევს, რა ფორმით ჩააბარებს ამ გამოცდას.  

3. ჩააბაროს გამოცდა საქართველოს ისტორიასა და სამართლის საფუძვლებში. პრინციპი აქაც იგივეა, შესაძლებელია არჩევა – გასაუბრებით სურს ჩაბარება თუ ტესტირებით. ჯერ ისტორიის გამოცდა ბარდება. თუ პირმა ისე კარგად იცის ისტორია, რომ “ზეზვა და მზიადან” “ვარდების რევოლუციამდე” (ზუსტად ამ პერიოდზეა კითხვები ტესტებში) ყველაფერი კარგად ახსოვს, შემდეგი სამართლის გამოცდაზე უნდა გავიდეს.

5. და ბოლო პირობაა პირი მუშაობდეს საქართველოს ტერიტორიაზე; ჰქონდეს უძრავი ქონება და ან მოქმედი საწარმო საქართველოში ან ჰქონდეს წილი ან ინვესტიცია  რომელიმე კომპანიაში. [თუმცა, არსებობს გამონაკლისი: მაგალითად, თუ პირი არის ლტოლვილი, მას მეოთხე პუნქტი არ მოეთხოვება]

ჩვეულებრივი წესით ბავშვსაც შეუძლია მოიპოვოს მოქალაქეობა. მას მოეთხოვება ხუთწლიანი უწყვეტი ცხოვრების ვადა.  მაგალითად, თუ საქართველოში ცხოვრობს ლტოლვილის სტატუსის მქონე ოჯახი და ამ ოჯახს შეეძინა შვილი. ხუთი წლის მერე მშობლებს შეუძლიათ, რომ შვილისთვის მოქალაქეობა მოითხოვონ.

* გამარტივებული წესი 

გამარტივებული წესით მოქალაქეობა შეიძლება მოითხოვოს პირმა, რომელიც დაქორწინებულია საქართველოს მოქალაქეზე. ქორწინება აუცილებლად რეგისტრირებული უნდა იყოს. 

თუმცა, ამ შემთხვევაშიც მას მოეთხოვება, ბოლო ხუთი წელი უწყვეტად ცხოვრობდეს საქართველოში.

ასევე, მანაც უნდა ჩააბაროს სამივე გამოცდა.

თუმცა, მას არ მოეთხოვება ბოლო პირობა –  საქართველოში ჰქონდეს უძრავი ქონება, ან მუშაობდეს, ან წილი ჰქონდეს საწარმოში. 

* სპეციალური წესი 

ამ წესით მოქალაქეობა შეიძლება მიიღოს პირმა, რომელიც არის დაბადებული საქართველოში 1993 წლის 31 მარტამდე და საქართველოს მოქალაქეობა არ უდგინდება.

ასეთმა პირმაც უნდა ჩააბაროს სამივე გამოცდა.

* საგამონაკლისო წესი 

ეს არის ე.წ. ორმაგი მოქალაქეობა. ორმაგი მოქალაქეობის მინიჭების უფლება აქვს მხოლოდ საქართველოს პრეზიდენტს. იმისთვის, რომ ადამიანს მიენიჭოს ამ ფორმით მოქალაქეობა, მას უნდა ჰქონდეს რაიმე დამსახურება საქართველოს წინაშე. 

ომის დაწყების შემდეგ საქართველოს მოქალაქეობა რუსეთის 3 375, ხოლო უკრაინის 78 მოქალაქეს მიენიჭა

საქართველომ არ დააკმაყოფილა რუსეთის მოქალაქეების 2 959 განაცხადი

ორმაგი მოქალაქეობის მინიჭებისას ითვალისწინებენ რა კავშირი აქვს ამ პირს საქართველოსთან, მისი წინაპრები ხომ არ იყვნენ დაკავშირებული, ხომ არ აქვს რაიმე უძრავი ქონება ამ ქვეყანაში.

შეიძლება ორმაგი მოქალაქეობა მიანიჭონ პირს, რომელიც არის გამორჩეული მეცნიერი, საზოგადო მოღვაწე და მნიშვნელოვანია საქართველოსთვის.  სპორტსმენია და საქართველოს სახელით იასპარეზებს სადმე. ან, საქართველოში დიდი ინვესტიციების ჩადებას აპირებს. 

* აღდგენის წესი 

ამ ფორმით მოქალაქეობის მინიჭება შეიძლება მოითხოვონ პირებმა, რომლებსაც საქართველოს მოქალაქეობა შეუწყდათ. ეს შეიძლება ორი რამის გამო მოხდეს: მოქალაქეობიდან გასვლის, ან მოქალაქეობის დაკარგვის გამო. 

პირი მოქალაქეობიდან გადის, როდესაც თავად ამბობს მოქალაქეობაზე უარს. მაგალითად იმიტომ, რომ სხვა ქვეყნის მოქალაქეობა უნდა მიიღოს. 

და, მოქალაქეობას კარგავს, იმ შემთხვევაში, თუ საქართველოს ნებართვის გარეშე შეუერთდა სხვა ქვეყნის ჯარს, პოლიციას, უშიშროებას და ეს საქართველოში რომელიმე სახელმწიფო უწყებამ გაიგო. ასევე, თავის დროზე ყალბი საბუთებით მოიპოვა და ეს გაიგეს.  ან, როდესაც სხვა ქვეყნის მოქალაქეობა მიიღო (მაგალითად, ჯავახეთის შემთხვევა). 

ასეთი პირს არ მოეთხოვება ათწლიანი ან ხუთწლიანი უწყვეტი ცხოვრება საქართველოში. მაგრამ, გამოცდებს აბარებს.

ვის უნდა მიმართოს პირმა მოქალაქეობის მისაღებად ან აღსადგენად?

მოქალაქეობის მისაღებად პირმა უნდა მიმართოს საქართველოს სახელმწიფო სერვისების განვითარების სააგენტოს, ანუ, იგივე იუსტიციის სახლს. თუ ადამიანი საქართველოში არ არის, მაშინ მას შეუძლია იმ კონკრეტულ ქვეყანაში საქართველოს საელჩოში ან საკონსულოში მივიდეს.

ორივე შემთხვევაში, მას ადგილზე მისცემენ განაცხადს, რომელიც უნდა შეავსოს.

განაცხადის შევსება შესაძლებელია ელექტრონულადაც. ამ გვერდზე პირი ირჩევს რომელი წესით უნდა განაცხადის წარდგენა. თითოეულ წესს, სადაც არის ახსნა-განმარტებები, ბოლოში თან ერთვის განაცხადის ელექტრონული ფორმა. ერთი დაკლიკებით ფორმა იხსნება და პირი ავსებს მონაცემებს.

იქვე მითითებულია ტარიფებიც – რა თანხაა გადასახდელი განაცხადის სტანდარტული, თუ დაჩქარებული წესით განხილვისთვის.

როგორც წესი, ტარიფი იწყება 65-ლარიდან (სტანდარტული, სამთვიანი ვადის შემთხვევაში) და ადის 390 ლარამდე (თუ პირს უნდა, რომ პასუხი 20 დღეში მიიღოს). 

რა საბუთებია საჭირო?

ყველა შემთხვევაში აუცილებლად წარსადგენი დოკუმენტებია:

• შევსებული განაცხადი;
• ფერადი ფოტოსურათი ზომით 3X4 (ელექტრონული
• მომსახურების საფასურის გადახდის დამადასტურებელი დოკუმენტი;
• პირადობის მოწმობის ასლი 

დანარჩენი დოკუმენტების ნუსხა იმაზეა დამოკიდებული, რომელი წესით ითხოვს პირი მოქალაქეობის მინიჭებას. 

თუ მაგალითად, ითხოვს ჩვეულებრივი წესით, მაშინ მას აუცილებლად დასჭირდება საქართველოში მისი ათწლიანი ცხოვრების დამადასტურებელი საბუთი. ასევე, დოკუმენტი, რომელიც ადასტურებს რომ საქართველოში ის მუშაობს, აქვს უძრავი ქონება, საწარმო და ა.შ.   

გამარტივებული წესით მისაღებად პირმა ქორწინების მოწმობა და მეუღლის მოქალაქეობის დამადასტურებელი დოკუმენტიც უნდა წარადგინოს. 

ორმაგი მოქალაქეობის მსურველს მოეთხოვება, რომ ორი რეკომენდაცია წარადგინოს საქართველოს მოქალაქის ან საქართველოში რეგისტრირებული იურიდიული პირისგან.

თუ პირი მოქალაქეობის აღდგენას ითხოვს, მას აუცილებლად დასჭირდება იმ დოკუმენტების ასლები, რომლებითაც დასტურდება, რომ ის იყო საქართველოს მოქალაქე. ეს შეიძლება იყოს: მოქალაქეობის შეწყვეტის ან დაკარგვის დამადასტურებელი დოკუმენტი.

რა ხდება განაცხადის შევსებისა და დოკუმენტების წარდგენის შემდეგ?

როგორც კი პირი შეავსებს განაცხადს, იუსტიციის სახლში არსებული სპეციალური კომისია მისი საქმის შესწავლას იწყებს. თავდაპირველად საბუთები მოწმდება. 

თუ დადგინდება, რომ წარდგენილი დოკუმენტები არასრულია, განმცხადებელს ეძლევა დამატებითი ვადა დანაკლისის შესავსებად.  ეს ვადა ინდივიდუალურია და იმაზეა დამოკიდებული, რა ტიპის ხარვეზია, რა საბუთი აკლია პირს. 

თუ განმცხადებელი ამ ვადაში დამატებით დოკუმენტებსაც წარადგენს, სააგენტო მისი საქმის შესწავლას იწყებს. თუ ვერ წარადგენს, სააგენტოს შეუძლია მისი განცხადების განხილვაზე უარი თქვას. 

რთულია გამოცდები? რატომ ითხოვს პრეზიდენტი მათ გაუქმებას?  

ის სამი გამოცდა, რომელიც მოქალაქეობის მიღების მსურველებმა უნდა ჩააბარონ (ჩვეულებრივი, გამარტივებული, აღდგენის წესის შემთხვევაში), ერთი შეხედვით, არც ისე რთულია. 

გამოცდის ჩაბარების ორი ფორმა არსებობს – გასაუბრება და ტესტი. რომელი ფორმა ურჩევნია, პირი ამას თავად ირჩევს და უთითებს განაცხადის შევსებისას.

მაგალითად, ქართული ენის ტესტები ასეთია: 

შემოხაზეთ სწორი პასუხი:

ა. შენ ხარ ექიმმა;
ბ. შენ ხარ ექიმით;
გ. შენ ხარ ექიმი;
დ. შენ ხარ ექიმად.

შემოხაზეთ სწორი პასუხი:

ა. არმსტრონგმა მთვარეში დადგა ფეხი;
ბ. არმსტრონგმა მთვარეზე დადგა ფეხი;
გ. არმსტრონგმა მთვარისგან დადგა ფეხი;
დ. არმსტრონგმა მთვარეს დადგა ფეხი.

ქართული ენის ტესტის ყველა ნიმუშს შეგიძლიათ გაეცნოთ ამ ბმულზე. 

ისტორიის გამოცდაში დაახლოებით ასეთი ტესტები დაგხვდებათ:

ძვ. წ-ის VI საუკუნეში ისტორიული კოლხეთის ტერიტორიაზე ქალაქების დაარსება დაკავშირებულია:
ა) ეგვიპტელებთან;
ბ) ბერძნებთან;
გ) სპარსელებთან;
დ) რომაელებთან;

 რომელი პოლიტიკური პარტიის ლიდერი იყო არჩილ ჯორჯაძე?
ა) მოქალაქეთა კავშირის;
ბ) აღორძინების;
გ) ნაციონალური მოძრაობის;
დ) სოციალისტ-ფედერალისტთა პარტიის;

სახელმწიფო სერვისების განვითარების სააგენტოს ვებგვერდზე, ამ ბმულზე, იპოვით ისტორიის ტესტების ნიმუშებსაც. 

არც თუ მარტივად გამოიყურება ტესტის ნიმუშები სამართლის საფუძვლებში:

მაგალითად, 

ვისი თანხმობით შეიძლება სახალხო დამცველის დაკავება ან დაპატიმრება, მისი საცხოვრებელი ან სამუშაო ადგილის, მანქანის ან პირადი გაჩხრეკა?

ა. არავითარ შემთხვევაში;
ბ. საქართველოს პარლამენტის თანხმობით;
გ. საქართველოს პრეზიდენტის თანხმობით;
დ. საქართველოს საკონსტიტუციო სასამართლოს თავმჯდომარის თანხმობით. 

როდის შეიძლება დაწესდეს შეკრების შესახებ წინასწარი გაფრთხილება?
ა. თუ შეკრება სკოლაში იმართება;
ბ. არ შეიძლება ასეთი გაფრთხილების დაწესება არავითარ შემთხვევაში;
გ. თუ შეკრება ხალხის ან ტრანსპორტის სამოძრაო ადგილას იმართება;
დ. თუ შეკრება რესტორანში იმართება.

გამოცდა ჩაბარებულად ითვლება, თუ პირი ათიდან შვიდ კითხვას უპასუხებს სწორად. 

და, რა შუაშია პრეზიდენტი?

საქართველოს პრეზიდენტს ეკუთვნის ბოლო სიტყვა. მაგრამ, ის თავად არ სწავლობს ყველა კონკრეტულ შემთხვევას. 

თითოეული განმცხადებლის საქმეს სააგენტოში არსებული სპეციალური კომისია სწავლობს. ეს კომისია ადგენს ოქმს, რომელსაც უგზავნის სააგენტოს. 

სააგენტო, ამ ოქმის საფუძველზე, ამზადებს დასკვნას და საბოლოო გადაწყვეტილებისთვის უგზავნის პრეზიდენტს. ამ დასკვნაში უკვე მითითებულია, ეკუთვნის თუ არა მოქალაქეობა კონკრეტულ განმცხადებელს. 

პრეზიდენტის როლი მეტწილად ფორმალურია – უარი ან თანხმობა. 

განსხვავებულია ფორმატი – თუ პრეზიდენტი განცხადებას დააკმაყოფილებს, ის გამოსცემს შესაბამის ბრძანებას. თუ უარყოფითი გადაწყვეტილება მიიღო, მაშინ იღებს განკარგულებას. 

პრეზიდენტს გადაწყვეტილების მისაღებად აქვს ერთი კვირა. 

თუ მაგალითად, სააგენტო აგზავნის დასკვნას და პრეზიდენტი ერთი კვირის ვადაში არ გამოსცემს ბრძანებულებას (დაკმაყოფილების შემთხვევა) ან განკარგულებას (უარი), იგულისხმება, რომ მან უარი თქვა მოქალაქეობის მინიჭებაზე, ვინაიდან, ერთკვირიანი ვადა გავიდა. 

პრეზიდენტის გადაწყვეტილება არ საჩივრდება. 

შეიძლება რომ სააგენტომ დადებითი დასკვნა გასცეს, მაგრამ პრეზიდენტმა მაინც უარყოფითი გადაწყვეტილება მიიღოს?

შეიძლება. რადგან საბოლოო სიტყვა მაინც მასზეა. 

რატომ შეიძლება უთხრან ადამიანს უარი, თუ ის აკმაყოფილებს ოფიციალურად ყველა მოთხოვნას?

შეიძლება პირისთვის მოქალაქეობის მინიჭება არ იყოს სახელმწიფოს ინტერესებში. პირს არ უნდა ჰქონდეს ჩადენილი საერთაშორისო დანაშაული, არ უნდა იძებნებოდეს ინტერპოლით.  

ჯამში, რა დრო სჭირდება მოქალაქეობის მიღებას / ან არმიღებას? დიდხანს იწელება პროცესი?

კანონი განსაზღვრავს სამთვიან ვადას. მთელი ეს პროცესი, განცხადების შევსებიდან პრეზიდენტის გადაწყვეტილებამდე, უნდა მოესწროს სამ თვეში. 

თუმცა, კანონი იცნობს პროცედურის დაჩქარებასაც. ყველაზე მოკლე პერიოდი 20 დღეა და თუ ადამიანს 20 დღეში უნდა პასუხი, მაშინ ის 65 ლარის ნაცვლად 390 ლარს იხდის.

და ბოლოს, რას ამბობს სტატისტიკა? ხშირია უარი? 

ინფორმაციის თავისუფლების განვითარების ინსტიტუტის ინფორმაციით, ოთხ წელიწადში, 2018-2022 წლებში სახელმწიფო სერვისების განვითარების სააგენტომ  პრეზიდენტს მოქალაქეობის მინიჭებაზე 13 644 დადებითი და 7 360 უარყოფითი დასკვნა გაუგზავნა. აქედან პრეზიდენტმა 13 575 პირს უთხრა დასტური ანუ, 69 პირზე, რომელსაც სააგენტომ მოქალაქეობის რეკომენდაცია გაუწია, პრეზიდენტმა უარყოფითი გადაწყვეტილება მიიღო.

მათგან, ვინც დადებითი დასკვნა მიიღო, 5 111-ს მოქალაქეობა აღუდგა, 8 464-მა კი საგამონაკლისო წესით მიიღო საქართველოს მოქალაქეობა (ე.წ. ორმაგი მოქალაქეობა). 

და, ამ უკანასკნელებს შორის, 72 პროცენტი (6 ათასზე მეტი ადამიანი), რუსეთის მოქალაქე იყო.