რობინ დანიგანი: ვთქვით, რომ გადავხედავთ ჩვენს ორმხრივ ურთიერთობას, ყველაფერი განხილვის პროცესშია
რობინ დანიგანი აშშ და საქართველო
საქართველოში აშშ-ის ელჩის, რობინ დანიგანის თქმით, სახელმწიფო მდივანმა მთავრობისთვის 95 მილიონი დოლარის პირდაპირი დახმარების შეჩერების გადაწყვეტილება რუსული კანონის, ზოგიერთი ანტიდემოკრატიული ქმედებისა და აშშ-სა და დასავლეთის შესახებ ცრუ ნარატივის გამო მიიღო. ამის შესახებ აშშ-ის ელჩმა მედიას განუცხადა.
ელჩი ამბობს, რომ აშშ კვლავ გააგრძელებს სტუდენტების, მასწავლებლების, ფერმერების, სამოქალაქო აქტივისტებისა და ორგანიზაციების მხარდაჭერას, ასევე, გაგრძელდება აშშ-ის დახმარება თავდაცვის ძალების მიმართაც. დანიგანი იმედს გამოთქვამს, რომ მთავრობა გადადგამს მნიშვნელოვან ნაბიჯებს, რათა საქართველო-აშშ-ის ურთიერთობა პირვანდელ კურსს დაუბრუნდეს. ის ამბობს, რომ აშშ მზად არის ურთიერთობის აღდგენისთვის და სურს, გაგრძელდეს ერთად მუშაობა, რათა მოხდეს ხალხის მისწრაფების რეალიზება და საქართველო გახდეს დასავლური დემოკრატიების ოჯახის წევრი.
რა თქვა აშშ-ს ელჩმა
“ნება მომეცით დავიწყოთ იმით, რომ გავიმეორო შეერთებული შტატების მთავრობისა და ამერიკელი ხალხის აბსოლუტური მხარდაჭერა საქართველოს ხალხის მიმართ.
ჩვენ უკვე 33 წელია პარტნიორები ვართ. 33 წელია, რაც ერთად ვმუშაობთ. ჩვენ ერთად ვიბრძოდით. ჩვენ ერთად დავეხმარეთ სკოლებისა და კლინიკების აშენებაში.
ჩვენ ეს გავაკეთეთ ერთად, რათა ხელი შევუწყოთ საქართველოს დამოუკიდებლობის, მისი სუვერენიტეტისა და ევროატლანტიკური ინტეგრაციის გზას. ჩვენ გავაგრძელებთ ამის გაკეთებას საქართველოს ხალხისთვის.
თქვენ იკითხეთ სახელმწიფო მდივნის გუშინდელ განცხადებაზე, რომ ჩვენ ვაჩერებთ საქართველოს მთავრობის დახმარებას. რატომ გავაკეთეთ ეს? ჩვენ არაერთხელ გვილაპარაკია საქართველოს მთავრობის ზოგიერთ ქმედებებზე, რაც ძალიან გვაწუხებს – ზოგიერთი ანტიდემოკრატიული ქმედება, როგორიცაა კანონი უცხოური გავლენის შესახებ, ასევე სხვა ქმედებები და ცრუ განცხადებები აშშ-ის შესახებ, ნეგატიური რიტორიკა შეერთებული შტატებისა და დასავლეთის შესახებ.
ჩვენ არაერთხელ გამოვთქვით ჩვენი შეშფოთება და ვთხოვეთ მთავრობას გადახედოს მის ქმედებებს. ჩვენ ასევე ვთქვით, რომ გადავხედავთ ჩვენს ორმხრივ ურთიერთობას. გუშინ კი მდივანმა ბლინკენმა გამოაცხადა, რომ ამ განხილვის შედეგად, ის აჩერებს ჩვენი დახმარების გარკვეულ ნაწილს, რომელიც პირდაპირ მთავრობას მიეწოდება. ჩვენ ვაგრძელებთ სტუდენტების, მასწავლებლების, ფერმერების, მცირე ბიზნესის მფლობელების, სამოქალაქო აქტივისტებისა და სამოქალაქო საზოგადოების ორგანიზაციების მხარდაჭერას. ასევე გაგრძელდება ჩვენი დახმარება საქართველოს თავდაცვის ძალების მიმართ.
როგორც სახელმწიფო მდივანმა თქვა, ყველაფერი განხილვის პროცესშია. ევროკავშირმა განაცხადა, რომ ამ ქმედებებმა და დეზინფორმაციამ გამოიწვია საქართველოს ევროკავშირში გაწევრიანების პროცესის შეჩერება. ჩვენ გვსურს გავაგრძელოთ ერთად მუშაობა, რათა დავეხმაროთ ქართველი ხალხის მისწრაფებების რეალიზებას, გახდეს დასავლური დემოკრატიების ოჯახის წევრი.
ჩვენ მზად ვართ აღვადგინოთ ეს ურთიერთობა. იმედი მაქვს, მთავრობა გადადგამს მნიშვნელოვან ნაბიჯებს, რათა დავუბრუნდეთ პირვანდელ კურსს. მინდა გავიმეორო, რომ ჩვენ ყოველთვის ვიქნებით საქართველოს ხალხის მეგობარი და პარტნიორი.”
ოთხშაბათს ოფიციალურმა ვაშინგტონმა განაცხადა, რომ შეაჩერებს 95 მილიონ დოლარზე მეტ დახმარებას საქართველოს მთავრობისთვის. როგორც გამოცემა Reuters წერს, ეს გადაწყვეტილება მიღებულია მას შემდეგ, რაც მოხდა საქართველო-აშშ -ის ორმხრივი თანამშრომლობის გადახედვა. ურთიერთობების გადახედვა გამოწვეულია საქართველოს მთავრობის “ანტიდემოკრატიული ქმედებებით”, აღნიშნულია სახელმწიფო დეპარტამენტის ხელმძღვანელის განცხადებაში, გადმოსცემს Reuters. ამ ინფორმაციას ავრცელებს ასევე X-ზე თეთრი სახლის კორესპონდენტი ალექს რაუფოღლუ.
ამასთან, ბლინკენის განცხადებაში ნათქვამია, რომ შეერთებული შტატები გააგრძელებს პროგრამებისა და აქტივობების მხარდაჭერას, რომელსაც სარგებელი მოაქვს ქართველი ხალხისთვის დემოკრატიის, კანონის უზენაესობისა და ეკონომიკური განვითარების გაძლიერებით.
