რამზან კადიროვის დაკვეთით გიორგი გაბუნიას მკვლელობა იგეგმებოდა - ნიკა გვარამია

“მთავარი არხის” დირექტორის, ნიკა გვარამიას განცხადებით,  რუსეთის მოქალაქე ვასამბეკ ბოკოვი, რომელიც თბილისში,  ქავთარაძის ქუჩაზე 12 ივნისს ჩატარებული სპეცოპერაციის დროს დააკავეს, ჩეჩნეთის ლიდერის, რამზან კადიროვის დაკვეთით ტელეკომპანია მთავარის ჟურნალისტის, გიორგი გაბუნიას მკვლელობას გეგმავდა.

გვარამიას ინფორმაციით, მკვლელობის დაკვეთის მიზეზი ტელეკომპანია “რუსთავი 2”-ის ეთერში გასული წლის 7 ივლისს გასული ის გადაცემაა, სადაც ჟურნალისტმა გიორგი გაბუნიამ რუსეთის პრეზიდენტს ვლადიმერ პუტინს პირდაპირ ეთერში დედა შეაგინა. 

• გინება პუტინის მისამართით რუსთავი 2-ის ეთერში. პოლიტიკოსებისა და ექსპერტების კომენტარები
• როგორ იბადებოდა და ეცემოდა „რუსთავი 2“

“მთავარი არხის” დირექტორის ინფორმაციით, ბოკოვი საქართველოში სულ სხვა მიზეზითაა დაკავებული. 

“კონტრტერორისტულმა სამსახურმა საქართველოში დააკავა რუსეთის მოქალაქე ვასამბეგ ბადრის ძე ბოკოვი, ინგუში, დაბადებული ინგუშეთის რესპუბლიკაში, 1982 წლის 21 დეკემბერს. მისი დაკავების ოფიციალური მიზეზი არ არის ის, რაზეც ახლა უნდა გესაუბროთ. ის სხვა მიზეზით დააკავეს, რამდენადაც ჩემთვის ცნობილია, მაგრამ მთავარი, რაც საქართველოს ხელისუფლებისთვის გახდა ცნობილი უკრაინის სამართალდამცველების მხრიდან, არის ის, რომ იგი გეგმავდა გიორგი გაბუნიას ლიკვიდაციას ჩეჩნეთის ლიდერის, რამზან კადიროვის დაკვეთით”,  – ამბობს ის.

გვარამია ამბობს, რომ გიორგი გაბუნიას თვეების მანძილზე უთვალთვალებდნენ. 

მისივე ინფორმაციით, ბოკოვის მიმართ გამოძიება უკრაინამ დამოუკიდებლად დაიწყო და ამ გამოძიების შესახებ ქართულმა მხარემ არაფერი იცოდა. 

როგორც გვარამია აცხადებს, გიორგი გაბუნიას დაგეგმილი ლიკვიდაციის კოორდინირება უკრაინაში ხდებოდა და ის ჩეჩნეთის რესპუბლიკიდან იმართებოდა, უშუალო მოქმედებები კი საქართველოში მიმდინარეობდა.

• შეიყვარო კადიროვი“ – ჩეჩნეთის ლიდერს რუს ბლოგერებთან ერთად „იუმორისტულ“ ვიდეოებში იღებენ

“პანდემიის დროს, როდესაც კონტროლი მოიშალა, საქმე გადმოგზავნათ საქართველოს სამართალდამცავებს. კიდევ უფრო ძლიერდება ბატონი გაბუნიას დაცვა ამის შემდეგ. საქართველოს ხელისუფლებამ ეს ინფორმაცია არ მიიღო სერიოზულად და ჩათვალა უკრაინაში ქართული ლობის პროვოკაციად. მიუხედავად ამისა, მაინც გააძლიერა კონტროლი გაბუნიას გადაადგილებაზე, რაც მისასალმებელია”,  – აცხადებს გვარამია.

ჩეჩნეთის ლიდერი, რამზან კადიროვი, ჟურნალისტ გიორგი გაბუნიას 2019 წლის ივლისში, მას შემდეგ დაემუქრა, რაც ჟურნალისტმა, რომელიც იმ დროს ტელეკომპანია “რუსთავი 2”-ში მუშაობდა, საავტორო გადაცემა “პოსტსკრიპტუმი” დაიწყო სიტყვებით – “ვოვაჩაკა, შენ ხარ ორღობის მეძავი” და რუსეთის პრეზიდენტს პირდაპირ ეთერში დედა შეაგინა.

მაშინ კადიროვმა საჯაროდ განაცხადა, რომ  “მილიონობით ახალგაზრდა არსებობს, რომელიც რუსეთის პრეზიდენტს პატივს სცემს” და გაბუნიას დამალვა ურჩია. 

სახელმწიფო უსაფრთხოების სამსახურს, ჯერჯერობით, ამ თემაზე კომენტარი არ გაუკეთებია.