რა ხდება უკრაინაში: უცხოელების ევაკუაცია და შემოჭრის მოლოდინი

კონფლიქტი უკრაინაში

სულ უფრო მეტი ქვეყანა მოუწოდებს თავის მოქალაქეებს დატოვონ უკრაინა რუსეთის შემოჭრის რეალური საფრთხის გამო.

11 თებერვალს საღამოს ასეთი მოწოდებით მოქალაქეებს 14 ქვეყნის მთავრობამ მიმართა.

ერთ დღეში, 11 თებერვალს, მონტენეგრომ, ნიდერლანდებმა, იაპონიამ, ნორვეგიამ, ლატვიამ, დიდმა ბრიტანეთმა, ესტონეთმა და დანიამ ურჩიეს თავიანთ მოქალაქეებს დაეტოვებინათ უკრაინის ტერიტორია რუსული საფრთხის გამო, იუწყება უკრაინული ტელეკომპანია Hromadske.

• რა შუაშია აქ ფინეთი? საიდუმლო და ღია დიპლომატია უკრაინის გარშემო
•  მოსაზრება: ვის მხარესაა საქართველო უკრაინის კონფლიქტში?

• მოსკოვს „მოთმინება ამოეწურა“: როგორ მოიქცევა დასავლეთი უკრაინასთან და საქართველოსთან?

ისრაელმა, გარდა ასეთი რეკომენდაციებისა, გამოაცხადა დიპლომატების ოჯახების ევაკუაციაც. სამხრეთ კორეამ თავის მოქალაქეებს უკრაინის დატოვება უბრძანა და დაუმორჩებლობის შემთხვევაში პასუხისმგებლობით დაემუქრა.

მანამდე სხვა ქვეყნებმა, მათ შორის  შეერთებულმა შტატებმა და კანადამ, უკვე ურჩიეს თავიანთ მოქალაქეებს უკრაინის ტერიტორიის დატოვება.

უკრაინაში ევროკავშირის წარმომადგენლობის ხელმძღვანელმა მატი მაასისკასმა კიევი სასწრაფოდ დატოვა. ის და მისი ათამდე თანამშრომელი ბრიუსელში ბრუნდებიან, იუწყება რადიო თავისუფლების წყაროები ევროკავშირის დიპლომატიური წრეებიდან. ევროკავშირის სპიკერმა პიტერ სტანომ ჟურნალისტებს განუცხადა, რომ ეს არ არის ევაკუაცია და რომ თანამშრომლებს აქვთ შესაძლებლობა უკრაინის ფარგლებს გარედან დისტანციურად იმუშაონ.

12 თებერვალს რუსული პროსამთავრობო საინფორმაციო სააგენტო RIA Novosti წყაროებზე დაყრდნობით იტყობინება, რომ უკრაინას რუსი დიპლომატები ტოვებენ.

შემოჭრა “უახლოეს  დღეებში“

აშშ-ის პრეზიდენტმა ჯო ბაიდენმა ნატოსა და ევროკავშირის სხვა ლიდერებს განუცხადა, რომ აშშ-ს ინფორმაციით, რუსეთის პრეზიდენტმა ვლადიმირ პუტინმა უკრაინაში უახლოეს დღეებში შეჭრის გადაწყვეტილება მიიღო. ამის შესახებ ბრიტანული გამოცემა The Guardian დიპლომატიურ წყაროებზე დაყრდნობით წერს.

ბაიდენმა, სავარაუდოდ, ამის შესახებ მოკავშირეებს 11 თებერვალს საღამოს, ოპერატიული ონლაინ შეხვედრის დროს განუცხადა, სადაც უახლესი სადაზვერვო მონაცემები და პუტინის გეგმები განიხილეს. მას ესწრებოდნენ აშშ-ის, კანადის, ევროკავშირის, საფრანგეთის, გერმანიის, იტალიის, პოლონეთის, რუმინეთის, დიდი ბრიტანეთისა და ნატოს ლიდერები.

მოგვიანებით, აშშ-ის ეროვნული უსაფრთხოების მრჩეველმა ჯეიკ სალივანმა გამართა სპეციალური ბრიფინგი, რომელზეც განაცხადა, რომ ვაშინგტონს აქვს რეალური მტკიცებულებები იმისა, რომ რუსეთის შეჭრა უკრაინაში შესაძლებელია და მოუწოდა აშშ-ს მოქალაქეებს დაუყოვნებლივ დაეტოვებინათ ქვეყანა.

„ჩვენ არ ვამბობთ, რომ პუტინმა მიიღო საბოლოო გადაწყვეტილება… ჩვენ მიგვაჩნია, რომ ყველა ამერიკელმა უკრაინაში უნდა დატოვოს ქვეყანა რაც შეიძლება მალე, ნებისმიერ შემთხვევაში მომდევნო 24-48 საათის განმავლობაში. რისკი საკმაოდ მაღალია ამჟამად და საფრთხე პირდაპირია“, – თქვა სალივანმა.

აშშ-ის საზოგადოებრივი მაუწყებლის PBS ჟურნალისტმა  ნიკ შიფრინმა სამი ანონიმური  ოფიციალური პირის აზრზე დაყრდბობით ტვიტერზე დაწერა, რომ აშშ-ის შეფასებით, „რუსეთის პრეზიდენტმა ვლადიმერ პუტინმა მიიღო გადაწყვეტილება უკრაინაში შეჭრის შესახებ და ეს გადაწყვეტილება რუს სამხედროებს გადასცა“.

ჟურნალისტის მონაცემებით, ასეთი შეჭრა შეიძლება მომავალ კვირას დაიწყოს და აშშ ვარაუდობს, რომ ეს შეიძლება იყოს „საშინელი, სისხლიანი კამპანია, რომელიც დაიწყება ორდღიანი საჰაერო დაბომბვით და ელექტრონული ომით, რასაც მოჰყვება ქვეყანაში შეჭრა ხელისუფლების შეცვლის შესაძლო ამოცანებით. “, – ნათქვამია საჰაერო ძალების ცნობით.

სააგენტო Bloomberg, წყაროებზე დაყრდნობით, შეჭრის თარიღსაც ასახელებს – 15 თებერვალი.

სიტუაციის განმუხტვის მიზნით, აშშ-ის პრეზიდენტი ჯო ბაიდენი და საფრანგეთის პრეზიდენტი ემანუელ მაკრონი პუტინთან სატელეფონო საუბარს 12 თებერვალს გეგმავენ. ის ფაქტი, რომ მოლაპარაკებები გაიმართება, კრემლის პრესსპიკერმა დიმიტრი პესკოვმა დაადასტურა.

გარდა ამისა, აშშ-ის სახელმწიფო მდივანი ენტონი ბლინკენი აპირებს რუსეთის საგარეო საქმეთა მინისტრ სერგეი ლავროვთან ესაუბროს.