"ქართველი ხალხის აქტს" 10 მხარდამჭერი სენატორი დაემატა
ქართველი ხალხის აქტი
ამერიკელი სენატორების ჯინ შაჰინის და ჯიმ რიშის ორპარტიულ კანონპროექტს “ქართველი ხალხის აქტს” 10 მხარდამჭერი სენატორი დაემატა. ჯამში კანონპროექტს 19 თანასპონსორი სენატორი ჰყავს, მათგან 9 რესპუბლიკელია, 9 – დემოკრატი, ხოლო 1 – დამოუკიდებელი წევრია.
თანაინიციატორები არიან:
- ჯეიმს რიში – რესპუბლიკელი;
- ბენ კარდინი – დემოკრატი;
- პიტ რიკეტსი – რესპუბლიკელი;
- ლინდსი გრეჰემი – რესპუბლიკელი;
- კრისტოფერ კუნი – დემოკრატი;
- რიჩარდ დურბინი – დემოკრატი;
- თომას ტილისი – რესპუბლიკელი;
- ტიმ კეინი – დემოკრატი;
- კრის ვან ჰოლენი – დემოკრატი;
- ჯონ ბუზმანი – რესპუბლიკელი;
- მიტ რომნი – რესპუბლიკელი;
- ჯეფ მერკლი – დემოკრატი;
- ჯონ კორნი – რესპუბლიკელი;
- კრისტოფერ მერფი – დემოკრატი;
- დენ სალივანი – რესპუბლიკელი;
- ანგუს კინგი – დამოუკიდებელი
- ტოდ იანგი – რესპუბლიკელი;
- შელდონ უაითჰაუსი – დემოკრატი;
- ჯორჯ ჰელმი – დემოკრატი;
ამერიკის შეერთებული შტატების სენატი საქართველოს წინააღმდეგ სანქციების ახალ, ორპარტიულ კანონპროექტს განიხილავს, რომლის ავტორები სენატორები ჯინ შაჰინი და ჯიმ რიში არიან.
მათი განმარტებით, “ქართული ოცნების” მიერ შემოღებული რუსული კანონი მსგავსია იმ კანონისა, რომელსაც რუსეთი სამოქალაქო საზოგადოების გასაჩუმებლად და კრიტიკული ხმის ჩასახშობად იყენებს, ხოლო შსს-მ კანონპროექტის საწინააღმდეგო აქციების დაშლისას, ცრემლსადენ გაზსა და წიწაკის სპრეისთან ერთად, მომიტინგეების მიმართ ძალადობრივი ხერხები გამოიყენა.
ამასთან ერთად, პაკეტში ნაგულისხმები იქნება აშშ-სა და საქართველოს შორის სტრატეგიული დიალოგის პერმანენტული გაუქმება, ხოლო, ამასთანავე, გამოიყოფა 50 მილიონი დოლარი, რისი მიზანიც, საქართველოში დემოკრატიისა და კანონის უზენაესობის მხარდაჭერაა.
რას გულისხმობს კანონი
კანონმდებლობა ორ ნაწილს მოიცავს.
პირველი:
• განმარტავს შედეგებს საქართველოს ხელისუფლების წარმომადგენლებისა და პირებისთვის, რომლებიც პასუხისმგებელნი არიან საქართველოს ევროატლანტიკური ინტეგრაციისთვის ხელის შეშლაზე, მათ შორის:
- სახელმწიფო დეპარტამენტის დავალდებულებას, ქართველ პირებსა და მათი ოჯახის წევრებს სამოგზაურო შეზღუდვები დაუწესდეს, უცხოური აგენტების კანონის ხელშეწყობასა და მხარდაჭერაში მონაწილეობისთვის.
- ახალი სანქციების დაწესებას იმ პირებზე, რომლებიც პასუხისმგებელნი არიან საქართველოს სტაბილურობის, სუვერენიტეტისა ან ტერიტორიული მთლიანობისთვის ძირის გამოთხრაში და
- სახელმწიფო დეპარტამენტის დავალდებულებას, არსებული სანქციების ჩარჩო გავრცელდეს ქართველი ინდივიდების წინააღმდეგ, რომლებიც პასუხისმგებელნი არიან ადამიანის უფლებების დარღვევასა და კორუფციაზე.
• სთხოვს სახელმწიფო დეპარტამენტს, საქართველოს მიმართ გრძელვადიანი სტრატეგიის შემუშავებას, მათ შორის სამხედრო დახმარების გადახედვას და შეერთებული შტატების მთავრობის ყველა დაფინანსების შეჩერებას საქართველოს მთავრობისთვის, რომელიც მატერიალურ დახმარებას მოიცავს.
• აშშ-საქართველოს სტრატეგიული დიალოგის სამუდამოდ შეჩერების მოწოდებას”,- ნათქვამია სენატორების მიერ კანონპროექტის სულისკვეთების განმარტებით წერილში.
სენატორების განცხადების მიხედვით, კანონპროექტის მეორე ნაწილი მოიცავს საქართველოსთან მომავალი თანამშრომლობის შეფასებას:
• ხაზს უსვამს აშშ-ს სენატის ვალდებულებას მხარი დაუჭიროს საქართველოს სამოქალაქო საზოგადოებას, ბოლოდროინდელი მოვლენების გათვალისწინებით.
• გამოყოფს არანაკლებ 50 მილიონ აშშ დოლარს საქართველოში დემოკრატიისა და კანონის უზენაესობის პროექტების მხარდასაჭერად.
• ავალდებულებს სახელმწიფო დეპარტამენტს და აშშ-ის საერთაშორისო განვითარების სააგენტოს (USAID) განსაზღვროს, თუ როგორ გააგრძელოს საქართველოს სამოქალაქო საზოგადოების მხარდაჭერა, ბოლო მოვლენების გათვალისწინებით.
აღსანიშნავია, რომ აშშ-ის კონგრესის საგარეო ურთიერთობათა კომიტეტმა რესპუბლიკელი ჯო ვილსონის ინიციატივას, MEGOBARI აქტს, 11 ივლისს დაუჭირა მხარი. მისი მიღების საჭიროება მას შემდეგ დადგა, რაც საქართველომ ე.წ. “უცხოური აგენტების კანონი” მიიღო, რომელიც რუსული კანონმდებლობის ანალოგია და როგორც საქართველოს დასავლელი პარტნიორები აღნიშნავენ, აფერხებს საქართველოს ევროინტეგრაციას და დემოკრატიულ წინსვლას.
“MEGOBARI AQTI“-ს ინიციატორი აშშ-ის საკანონმდებლო ორგანოს ქვედა პალატის წევრი – რესპუბლიკელი კონგრესმენი ჯო უილსონია.
აქტის თანახმად, ერთი მხრივ, პასუხი უნდა აგონ იმ პირებმა, რომლებიც საქართველოში “რუსული სტილის უცხო ქვეყნის აგენტების კანონის მიღებაზე ან შესაძლო ამოქმედებაზე არიან პასუხისმგებელნი“, მეორე მხრივ კი, ის „საქართველოს მიერ დემოკრატიული, დასავლური კურსის გამყარების შემთხვევაში“ ქვეყანას გაძლიერებულ მხარდაჭერას ჰპირდება.
