ქართულმა ოცნებამ "აგენტების კანონის" განხილვა ხუთშაბათის ნაცვლად დღეს დაიწყო. პარლამენტთან აქცია დაანონსდა

ქართულმა ოცნებამ “აგენტების კანონის” განხილვა დაიწყო

“ქართული ოცნება” უცხოური აგენტების შესახებ კანონის განხილვას პლენარულ სხდომაზე ხუთშაბათის ნაცვლად დღეს, სამშაბათს იწყებს. ინიციატივით მმართველი პარტიის წევრი მამუკა მდინარაძე გამოვიდა. 

პარალელურად, ოპოზიციამ საქართველოს პარლამენტთან აქცია დაანონსა.

“დავიწყოთ განხილვა აგენტების ამერიკული კანონის და გავაგრძელოთ ხუთშაბათს. მე ამას გთავაზობთ იმიტომ, რომ მოესწროს და რაღაცა გადახვეული და რეგლამენტის ცუდად გამოყენების არ მოხდეს პროცესის ჩაშლა. დავიწყოთ და თუ გადავა ხუთშაბათს, გადავიდეს. თავდაცვის კოდექსი რადგანაც არ გამოდის, ბოდიში უხერხული მდგომარეობის შექმნისათვის, მაგრამ მგონია, რომ ამ შემთხვევაში ეს უნდა იყოს პრიორიტეტი”, – განაცხადა მდინარაძემ.

მდინარაძის სიტყვების შემდეგ პარლამენტის თავმჯდომარემ, შალვა პაპუაშვილმა თქვა, რომ ამ კანონპროექტის განხილვასა და დებატებს ხალხი ელოდება. გარდა ამისა, მამუკა მდინარაძემ დაამატა, რომ ნაციონალურმა მოძრაობამ მთელი კვირის განმავლობაში ბოიკოტის შესახებ გამოაცხადა და “იმას ვერ იტყვიან, რომ ხუთშაბათს მოვდიოდით და არ ვიყავით სამშაბათს.”

“ნაციონალური მოძრაობის” წევრის, ხატია დეკანოიძის განცხადებით, ქართული ოცნების ეს ნაბიჯი საზოგადოების კიდევ ერთი დამცირებაა:

“მე ხომ ვარ ამ დარბაზში. რას ეუბნებით ჩემს კოლეგებს, რომ დარბაზში შემოსვლა არ შეუძლიათ და განხილვაში მონაწილეობა არ შეუძლიათ?”

“ნაციონალური მოძრაობის” თავმჯდომარემ ლევან ხაბეიშვილმა განაცხადა, რომ მნიშვნელოვანია სახალხო პროტესტი.

“ეს ხალხი ამ კანონს მაინც მიიღებს და მეც, თქვენც, ყველამ ხელი ერთად უნდა შევუშალოთ ამ კანონის მიღებასაც, ამ ქვეყნის გარუსებასაც და გაყოფას საერთოდ ზოგადად უნდა მოვრჩეთ ყველა სფეროში, არასამთავრობო სფეროში, პოლიტიკაში, მედიაში, ვაპირებთ ბრძოლას და მოქმედებას. მნიშვნელოვანია სახალხო პროტესტი.” – განაცხადა ხაბეიშვილმა.

საქართველოს პარლამენტის საგარეო ურთიერთობათა კომიტეტმა 2 მარტს პირველი მოსმენით მიიღო კანონი, რომლის მიხედვით, ის არასამთავრობო  და მედია ორგანიზაციები, რომლებიც უცხოეთიდან ფინანსდებიან, „უცხოური გავლენის აგენტებად“ უნდა დარეგისტრირდნენ. ხოლო 6 მარტს, ე.წ. აგენტების კანონს პარლამენტის იურიდიულმა კომიტეტმაც დაუჭირა მხარი.

27 თებერვლის მდგომარეობით, პარლამენტში ორი კანონპროექტია დარეგისტრირებული: ერთი 14 თებერვალს დარეგისტრირდა და ის რუსული კანონის ანალოგია; მეორე კი, ალტერნატივის სახით დარეგისტრირდა მას შემდეგ, რაც პირველს დიდი კრიტიკა მოჰყვა. ეს მეორე, მისი ავტორების თქმით, არის ამერიკული კანონის (FARA-ს) ანალოგი. მათ თქვეს, რომ FARA პირდაპირ თარგმნეს.

ორივე კანონპროექტის ავტორია მოძრაობა „ხალხის ძალა“, რომელიც მმართველი გუნდისგან ფორმალურად გამოყოფილმა დეპუტატებმა ჩამოაყალიბეს. „ხალხის ძალა“ მკვეთრად ანტიდასავლური განცხადებებით გამოირჩევა. მეტიც, მისი წევრები პირდაპირ აღიარებენ, რომ ეს პარტია შეიქმნა იმისთვის, რომ “ხალხს სიმართლე უთხრას დასავლეთის შესახებ, რომელიც საქართველოს ომში ჩათრევას ცდილობს”.

კანონპროექტს აკრიტიკებს ყველა, მმართველი პარტიის გარდა: ადგილობრივი არასამთავრობო და მედია სექტორი, ოპოზიცია, ექსპერტები და ის პოლიტიკოსები, რომლებიც ცოტა ხნის წინ “ქართული ოცნების” ხელისუფლებაში იყვნენ და საქართველოს პრეზიდენტიც კი.

კანონპროექტს მკაცრად აკრიტიკებენ საქართველოს დასავლელი პარტნიორები სხვადასხვა საერთაშორისო ორგანიზაციებიდან, ამერიკელი სენატორები თუ ევროპელი დეპუტატები. ამერიკის ელჩმა კი მას პირდაპირ უწოდა “რუსული კანონი”. კელი დეგნანი “აგენტების კანონს” 6 მარტსაც გამოეხმაურა და პარლამენტს მოუწოდა, გადახედოს და უკან გამოიწვიოს კანონი.

ამერიკის სახელმწიფო დეპარტამენტის პრესსპიკერი, ნედ პრაისი უკვე მესამე განცხადებას აკეთებს “აგენტების კანონზე” და ამბობს, რომ კანონის მხარდამჭერები პასუხისმგებლები იქნებიან ქვეყნის მომავლისთვის რისკის შექმნაზე.

20 თებერვალს საქართველოს ამერიკელი სენატორები, ჯინ შაჰინი და დიკ დურბინი ესტუმრნენ. ჯინ შაჰინმა პრესკონფერენციაზე “ქართული ოცნებიდან” ფორმალურად გასული დეპუტატების, “ხალხის ძალის” მიერ ინიციირებულ “უცხოური აგენტების” კანონზე განაცხადა, რომ კანონპროექტი არაა აშშ-ის კანონმდებლობის მსგავსი და ის რუსული კანონის მსგავსია.