„პუტინმა გვითხრა, რომ უნდა მოგკლათ“. როგორ დევნიან რუსეთში ომის მოწინააღმდეგეებს
რეპრესიები რუსეთში
კვირას, 6 მარტს, რუსეთის 65 ქალაქში, უკრაინაში მიმდინარე ომის საწინააღმდეგო საპროტესტო აქციები გაიმართა. რუსული ორგანიზაცია ОВД-Инфо-ს მონაცემებით, აქციებზე 4600 ადამიანზე მეტი დააკავეს. 30-ზე მეტმა მოქალაქემ პოლიციის განყოფილებებში ცემისა და წამების შესახებ განაცხადა. 12 წლის სკოლის მოსწავლეს კი, რომელსაც გაკვეთილზე ეჭვი შეეპარა პუტინის პოლიტიკის სისწორეში, სახლში პოლიციამ მიაკითხა.
26 წლის მოსკოველი ალექსანდრა კასლუჟსკიხი აქციაზე დააკავეს და მოსკოვის პოლიციის განყოფილებაში გადაიყვანეს. მან მოახერხა აუდიოჩანაწერის გაკეთება, სადაც პოლიციელები დასცინიან.
რუსულმა გამოცემა „Новая газета“-მ აუდიოჩანაწერი და მისი სრული სტენოგრამა გამოაქვეყნა.
პოლიციელები მორალურ ზეწოლას ახორციელებენ დაკავებულზე, ურტყამენ და ეუბნებიან, რომ მისი მოკვლაც კი შეუძლიათ, რადგან მათ ამის უფლება ხელისუფლებამ და პირადად პრეზიდენტმა პუტინმა მისცა.
«ეს ჩმო, ბლ**, შე მარგინალო. რა გგონია, რამეს გვიზამენ ამის გულისთვის? პუტინმა გვითხრა დაბრიდეთო ეს გამოსი***ულები, მორჩა! პუტინი ჩვენს მხარესაა! თქვენ რუსეთის მტრები ხართ, ხალხის მტრები! ახლა დაგბრიდავ და მორჩა. ამაში პრემიასაც მოგვცემენ », — ციტირებს გამოცემა დაკავებულის მიმართ პოლიციელების მუქარას.
მეორე დაკავებული, 21 წლის ქსენია ჰყვება, რომ პოლიციის განყოფილებაში მას ერთ-ერთი ოფიცერი ემუქრებოდა:
„ის ყვიროდა, ამბობდა, რომ ისეთებს, როგორებიც ჩვენ ვართ, „*** ცემა გვეკუთვნის“, რომ კარგი იქნებოდა ისე მოგვპყრობოდნენ, როგორც ბელარუსში ექცევიან, რომ ისეთი ადამიანები, როგორიც ჩვენ ვართ, ამ ქვეყანაში ცხოვრების ღირსები არ არიან, რომ ჩვენ ამ ქვეყანაში არავის ვჭირდებით, რომ ჩვენ ქვეყნის სირცხვილი ვართ. რომ შესძლებოდა, გვესროდა, ის სულ ბრაზობდა და ამბობდა, რომ წუხდა, სროლა რომ არ შეეძლო. სულ გვეკითხებოდა, რამდენი გადაგიხადესო“.
18 წლის ნასტიამაც მოგვითხრო მოჰყვა პოლიციის მხრიდან ძალადობის შესახებ იმავე „ბრატეევოს“ განყოფილებაში.
„როგორც კი ოთახში შედიხარ, მაშინვე ხედავ: ახლა შენ რაღაცას გაგიკეთებენ, მათი სახის გამომეტყველებით, მათი განწყობის მიხედვით ხვდები. როდესაც მე კონსტიტუციის 51 მუხლი ვახსენე (კონსტიტუციის მუხლი, ადამიანს უფლებას აძლევს საკუთარი თავის წინააღმდეგ ჩვენება არ მისცეს) და უარი ვთქვი მათთვის ჩემი პერსონალური მონაცემების მიწოდებაზე, მაშინვე პირდაპირ სახეში შემასხეს ერთი ლიტრი წყალი. მეძახდნენ მეძავს, პროსტიტუტს, მემუქრებოდნენ მაწანწალებთან ჩასმით, რომლებიც… ხომ გესმით. რამდენჯერმე ხელი მომიქნიეს. მემუქრებოდნენ, რომ აქედან ვერ გახვალო. მხოლოდ გვემუქრებოდნენ“.
სკოლის მოსწავლეს, რომელიც ომის წინააღმდეგია, სახლში პოლიციამ მიაკითხა
კირილი 12 წლისაა, ის მოსკოვის ერთ-ერთ სკოლაში, მე-6 კლასში სწავლობს.
პარასკევს, 4 მარტს, მეექვსე კლასელებს ისტორიის ჩვეულებრივი გაკვეთილი ჰქონდათ. თავად კირილი გვიამბობს მომხდარის შესახებ:
– მასწავლებელმა გვითხრა: „საერთოდ, მეექვსე კლასელებთან ეს არ განიხილება, მაგრამ თუ გინდათ გაიგოთ რა ხდება, კითხვები დასვითო. კითხვების დასმა დავიწყე: ვიკითხე: „რატომ დაიწყო პუტინმა ომი?“.
მასწავლებელმა უკრაინასთან ომის მიზეზების ახსნა რუსეთის ხელისუფლების პოზიციიდან დაიწყო.
ამის შემდეგ, როგორც კირილი ჰყვება, ის სხვა გაკვეთილზე წავიდა და დერეფანში დაიყვირა: „დიდება უკრაინას!“. დერეფანში მყოფმა ზოგიერთმა მოსწავლემ მას შესაბამისი სლოგანით უპასუხა.
კირილის დედა ჰყვება, რომ მოგვიანებით, მას WhatsApp-ში უცხო ნომრიდან დაურეკეს და პოლიციაში გასაუბრებისთვის დაიბარეს. მან უარი განაცხადა და უწყების გაგზავნა მოითხოვა.
მეორე დილით, 10 საათისთვის, მას შვილის სკოლის დამრიგებელმა დაურეკა. მან ნატალია შუადღის 12 საათისთვის, სკოლაში მიიწვია. განუმარტა, რომ არასრულწლოვანთა საქმეთა ინსპექციის თანამშრომლებს სურდათ მასთან და მის შვილთან გასაუბრება.
ნატალია მივიდა სკოლაში და განცხადება დაწერა, რომ შვილი გაჰყავს „იმის გამო, რომ ბავშვზე ზეწოლას ახდენენ და განათლების მიღებისთვის აუტანელ პირობებს უქმნიან“ მისი პოლიტიკური შეხედულებების გამო. ის ტაქსიში ჩასვა და თავის სამსახურში წაიყვანა. სკოლის კართან პოლიციელების ჯგუფს შეეჩეხნენ.
მომდევნო დღეს, კვირას, კირილი სახლში მარტო იყო. დედამისი სამსახურში წავიდა. ამ დროს, კარზე ორმა პოლიციელმა დააკაკუნა, მაგრამ კირილმა არ გაუღო. ისინი თითქმის ნახევარი საათი აკაკუნებდნენ, შემდეგ ბინაში ელექტროენერგია გამორთეს, კარქვეშ კი უწყება შეაცურეს „გამოკითხვაზე დაბარების შესახებ“ და წავიდნენ. უწყებაში გაურკვევლად ეწერა გამოკითხვის თარიღი და მუქარა გამოუცხადებლობის შემთხვევაში იძულებით წაყვანის შესახებ.
– საწოლზე ვიჯექი და ვფიქრობდი, ახლა რა იქნებოდა, – გვიყვება კირილი. – მაგრამ არ მეშინოდა. საინტერესოც კი იყო, რა ხდებოდა იქ მათთან. როგორ წყვეტენ ისინი: აი, ჩვენთან მოდის 12 წლის ბიჭმა თავისი აზრი გამოთქვა, მოდი მივადგეთ სახლში. აი, კარი არ გაგვიღო, მოდი დენი გამოვურთოთ.
კირილი მშვიდად გვიხსნის თავის პოზიციას:
– მიმაჩნია, რომ მასწავლებლები ცდებიან. გვეუბნებიან, რომ უკრაინის მცხოვრებლებს ტვინებს ურეცხავდნენ, მე კი მეჩვენება, რომ ტვინებს ჩვენ გვირეცხავდნენ აქ.
