თბილისის სახელმწიფო უნივერსიტეტის მიმდებარე ტერიტორია გადაიკეტა - აქციები უწყვეტად გაგრძელდება. ფოტორეპორტაჟი
პროტესტი თბილისში
თბილისის სახელმწიფო უნივერსიტეტის მიმდებარე ტერიტორია გადაიკეტება, აქცია კი იქ 24 საათის განმავლობაში იქნება. მომიტინგეებმა ჭავჭავაძის გამზირზე კარვები გაშალეს და გზა ე.წ. მარშრუტკებით ჩახერგეს. ჭავჭავაძის გამზირის მიმდებარედ ამ დროისთვის, 20-ზე მეტი კარავია გაშლილი. აქციის ლიდერების თქმით, პროტესტი უწყვეტად გაგრძელდება.
“მორჩა სეირნობა, სიარული, ჟივილ-ხივილი, ყველაფერი მორჩა, ვიბრუნებთ სამშობლოს. ვკეტავთ ყველაფერს…. ამ მაგისტრალზე მოძრაობა არ იქნება. არც სხვა მაგისტრალებზე. ნელ-ნელა, მაგრამ მიზანმიმართულად, დაგეგმილად, მშვიდობიანად დავიკავებთ ჩვენს ქვეყანას. ეს ქვეყანა ჩვენია”, – განაცხადა “კოალიცია ცვლილებებისთვის” ლიდერმა ნიკა გვარამიამ.
ასევე, საქართველოში მოქმედი 13 უნივერსიტეტის სტუდენტებმა დღევანდელ აქციაზე მანიფესტი წაიკითხეს. სტუდენტები აღნიშნავენ, რომ არ ცნობენ 26 ოქტომბერს ჩატარებულ არჩევნებსა და მისი შედეგებით დაკომპლექტებული პარლამენტის ლეგიტიმურობას.
თბილისის სახელმწიფო უნივერსიტეტი, ჭავჭავაძის გამზირის გადაკეტვის გამო, სასწავლო პროცესს 1 დღით აუქმებს.
“გაცნობებთ, რომ სასწავლო პროცესი თბილისის სახელმწიფო უნივერსიტეტში გრძელდება ჩვეულ რეჟიმში. დაგეგმილი საგამოცდო პროცესი (თსუ ბიბლიოთეკის კორპუსში) წარიმართება განსაზღვრული გრაფიკით.
ჭავჭავაძის გამზირის გადაკეტვის/სატრანსპორტო მოძრაობის შეზღუდვის გამო, 18 ნოემბერს ვაკის ტერიტორიაზე მდებარე სასწავლო კორპუსებში დაგეგმილი სააუდიტორიო ან სხვა ტიპის მეცადინეობები შეჩერდება 1 დღით”, – მისწერეს თსუ-დან სტუდენტებსა და ლექტორებს.
ელენე ხოშტარია, “კოალიცია ცვლილებებისთვის” ერთ-ერთი ლიდერი: წინააღმდეგობის მოძრაობა დაწყებულია – ჩვენ გაჩერებას არ ვაპირებთ. ჩვენ არ ვაპირებთ ოცნების დღის წესრიგით სიარულს. ასევე ჩვენ არ ვაპირეთ მათი ძალადობრივი გეგმებით სიარულს. ჩვენ ვართ არაძალადობრივი, მტკიცე წინააღმდეგობის მოძრაობა.
ჩვენ დღეს მოვუწოდებთ ყველას, მათ შორის, რუსთაველზე მდგომ ხალხს, თსუ-სთან ვჩერდებით, დღეს გავათევთ ღამეს, 24-საათი აქ ვიქნებით, გაგაცნობთ ყველა შემდგომ გეგმას. ასე გაგრძელდება მანამ, სანამ არ იქნება ახალი და სამართლიანი არჩევნები. არჩევნები, რომელსაც საქართველოს მოსახლეობა იმსახურებს.
ყველაფერი უზრუნველყოფილია. ჩვენ ახლა აქ მოვაწყობთ ყველაფერს, ეს ქაოტური პროცესი არ არის. ეს დაგეგმილი პროცესია, რომელსაც ელემენტარული შემართება სჭირდება და რომელიც ყველა თქვენგანს ყველაზე მეტად გაქვთ, ვიდრე ნებისმიერ პოლიტიკოსს და პარტიას. მთავარი მამოძრავებელი ძალა თქვენ ხართ.”
“სტუდენტების მანიფესტში წერია, რომ 2024 წლის ოქტომბრის არჩევნები დემოკრატიის პრინციპებს ეწინააღმდეგება და სახელმწიფო კონსტიტუციას, ინტერესებსა და რეპუტაციას საერთაშორისო დონეზე მნიშვნელოვან დარტყმას აყენებს.
საქართველოს სტუდენტები, ვიაზრებთ ჩვენს პასუხისმგებლობას სამშობლოსა და ერის წინაშე, ვაგრძელებთ ჯერ კიდევ ჩვენამდე დაწყებულ ბრძოლას თავისუფლებისა და დამოუკიდებლობისთვის.
ისტორიული არჩევანი გაკეთებულია, საქართველო ყოველთვის ირჩევდა და ირჩევს ევროპას, წინსვლასა და განვითარებას. ჩვენ ამ არჩევანის ერთგულებას ვამტკიცებთ. მხარს ვუჭერთ პროტესტის ყველა არაძალადობრივ ფორმას და მოგიწოდებთ სტუდენტებს ერთობისკენ, რადგან ძალა, რომელსაც სასურველი ცვლილების მოტანა შეუძლია, ძალა, რომელსაც ღირსეული სისტემის შექმნა შეუძლია სწორედ ჩვენშია.
ჩვენ არ ვაპირებთ, დავთმოთ ჩვენი ქვეყნის თავისუფლება საქართველოს სტუდენტები, როგორც საქართველოს მოქალაქეები ვრჩებით დემოკრატიული ღირებულებებისა და სახელმწიფო ინტერესების ერთგული არ ვცნობთ ჩატარებულ არჩევნებს და ამ არჩევნების შედეგების შესაბამისად დაკომპლექტებულ პარლამენტს ლეგიტიმურად და მზად ვართ ბოლომდე ვიბრძოლოთ ჩვენი და ჩვენი ქვეყნის თავისუფლებისთვის! გვახსოვდეს, ძალა ერთობაშია და გამარჯვება გარდაუვალია! ვიბრძვით თავისუფლებისთვის!”, – წერია მანიფესტში.
“დღეიდან, საღამოს 8 საათიდან 24 საათის განმავლობაში თბილისის ეს ტერიტორია გადაიკეტება. ჩვენ გადავდივართ არაძალადობრივი პროტესტის სხვა ეტაპზე. გადავდივართ იმ ეტაპზე, რომელსაც ჩვენი წარსული, აწმყო და მომავალი გვკარნახობს. […]
დღეიდან ჩვენ ვმოქმედებთ მხოლოდ და მხოლოდ ადეკვატურად. ერთი სიტყვით, 24 საათის განმავლობაში, ხვალ საღამოს 8 საათამდე თბილისის ერთ-ერთ ყველაზე ცენტრალურ ადგილას ვრჩებით, უნივერსიტეტის წინ. შემდგომი განცხადებები მოგვიანებით გაკეთდება”. – თქვა ნიკა მელიამ.
ახლა იმ ეტაპზე ვართ, რომელსაც ყველა ველოდებოდით – ამის შესახებ „ძლიერი საქართველოს“ წევრმა, ლევან ცუცქირიძემ ჭავჭავაძის გამზირზე მიმდინარე აქციაზე განაცხადა.
მისი თქმით, ეს არის წინააღმდეგობის და ხმების დაცვის ეტაპი, რისთვისაც ოპოზიცია მზად არის.
“ოპოზიციაში ყველამ ვიცოდით, რომ ეს ის მთავრობა არ არის, რომელიც ნებით, დემოკრატიულად ჩაატარებდა სამართლიან არჩევნებს და შემდეგ ამ არჩევნების შედეგებს აღიარებდა. ამის მიუხედავად, ოპოზიციური პოლიტიკური კოალიციები გავიდნენ არჩევნებზე და ყველა წინააღმდეგობის მიუხედავად დაამარცხეს ეს მთავრობა. ახლა იმ ეტაპზე ვართ, რომელსაც ყველა ველოდებოდით. ეს არის ეტაპი, როდესაც გამარჯვება არის დასაცავი, იმიტომ, რომ ეს მთავრობა, ცდილობს მიითვისოს არჩევნები, შედეგები, დაწეროს, რაც მას უნდა და წაგვართვას თავისუფალი არჩევანის უფლება. ამიტომ, ეს არის წინააღმდეგობის , ჩვენი ხმების დაცვის ეტაპი და ჩვენ ამისთვის, ყველანი ერთად მზად ვართ. აქ ვართ, აქ ვიქნები, სხვაგანაც ვიქნებით და ვიბრძოლებთ ერთად“, – განაცხადა ლევან ცუცქირიძემ.
ჩვენც ის მოქალაქეები ვართ, რომლებიც მოსახლეობასთან ერთად ვართ შეშფოთებულები იმ უმსგავსობით, რომელიც ამ ქვეყანაში ხდება – ჩვენი პარტიაც ამ პროტესტის მონაწილეა, – ამის შესახებ „გახარია საქართველოსთვის“ წევრმა, დიმიტრი ცქიტიშვილმა განაცხადა.
მისი თქმით, ქვეყანაში არის უსამართლობის “ძალიან მწვავე” განცდა.
“ეს ძალიან ბუნებრივი პროცესია- ქვეყანაში არის უსამართლობის ძალიან მწვავე განცდა. სხვადასხვა მომენტში, სხვადასხვა ადგილას, ალბათ, იქნება ასეთი უკმაყოფილების გამოხატვის პროცესი. დღევანდელი აქცია, რომ დაიწყო რუსთაველზე, იქ ვიყავი, შემდეგ გადმოინაცვლეს ვერა-ვაკის ტერიტორიაზე. ჩვენ ამ პროტესტის მონაწილეები ვართ. ჩვენც ის მოქალაქეები ვართ, რომლებიც მოსახლეობასთან ერთად ვართ შეშფოთებულები იმ უმსგავსობით, რომელიც ამ ქვეყანაში ხდება. არამხოლოდ დღევანდელობა, არამედ მომავალი კვდება. მომავალს უკლავენ ამ ქვეყანას. ეს პროტესტი არის სხვადასხვა სოციალურ ჯგუფში და თაობაში. ზოგს შეიძლება მოეწონოს ესთეტიკა, ზოგს შეიძლება არ მოეწონოს, მაგრამ ფაქტია, რომ პროტესტია და მათ შორის ჩვენი პარტიაც ამ პროტესტის მონაწილეა.
ამ პროტესტის მონაწილე ვიქნები მანამ, სანამ არ იქნება მნიშვნელოვანი ცვლილებები იმისთვის, რომ ქვეყანა დაუბრუნდეს დემოკრატიული განვითარების ნორმალურ გზას.“ – თქვა დიმიტრი ცქიტიშვილმა.
