საკონსტიტუციო სასამართლომ პრეზიდენტის იმპიჩმენტის წარდგინების განხილვა დაასრულა

პრეზიდენტის იმპიჩმენტი

საკონსტიტუციო სასამართლომ საქართველოს პრეზიდენტის, სალომე ზურაბიშვილის იმპიჩმენტის წარდგინების განხილვა დაასრულა. პლენუმი სამი დღის განმავლობაში უსმენდა მხარეებს. სასამართლომ დასკვნა 2 კვირის ვადაში უნდა გამოაქვეყნოს.

თუ საკონსტიტუციო სასამართლო სალომე ზურაბიშვილის მხრიდან კონსტიტუციის დარღვევას დაადგენს, პოლიტიკური პროცესი პარლამენტში გადაინაცვლებს. პრეზიდენტის იმპიჩმენტისთვის საჭიროა 100 დეპუტატის ხმა – ამ ეტაპისთვის “ქართულ ოცნებას” საჭირო მხარდაჭერა არ აქვს.

სხდომებს არ დასწრებია თავად სალომე ზურაბიშვილი. მის ინტერესებს სასამართლოზე იცავდნენ პარლამენტის ყოფილი ვიცე-სპიკერი თამარ ჩუგოშვილი და მაია კოპალეიშვილი – საკონსტიტუციო სასამართლოს ყოფილი მოსამართლე.

წარდგინების ავტორების მხრიდან სხდომაზე მომხსენებლები იყვნენ ირაკლი კობახიძე, ანრი ოხანაშვილი, გიორგი კახიანი და თენგიზ შარმანაშვილი.

“თქვენს გადაწყვეტილებაზეა დამოკიდებული საქართველოს დარჩება კონსტიტუცია თუ არა. ამ დონეზე დგას საკითხი. თქვენს გადაწყვეტილებაზე დამოკიდებული საქართველო დარჩება საპარლამენტო რესპუბლიკად თუ გადაიქცევა გაურკვეველ ჰიბრიდულ სისტემად”, – მიმართა ირაკლი კობახიძემ მოსამართლეებს დასკვნითი სიტყვის დროს.

“მათ ის კი არ ადარდებთ კონსტიტუცია მართლაც დაირღვა თუ არა, მათი დარდია წმინდა პოლიტიკური, გაბრაზებულები და განაწყენებული არიან საქართველოს პრეზიდენტზე და მათი სურვილია, რომ დაკავებული თანამდებობიდან გადააყენონ. დიდი იმედი მაქვს, რომ საკონსტიტუციო სასამართლო არ მოექცევა ამ პოლიტიკურ პროცესში”, – განაცხადა მაია კოპალეიშვილმა.

საქართველოს პრემიერმინისტრი ირაკლი ღარიბაშვილი ამბობს, რომ სალომე ზურაბიშვილს “ყველგან უშვებდა”, მაგრამ მერე ნდობა დაიკარგა. მისივე განმარტებით, ევროპელ ლიდერებს იმპიჩმენტის შესახებ მოუყვა და “მათ ეს გაიგეს”, მაგრამ თქვეს, რომ რაც ხდება, “ეს არ არის ლამაზი”.

● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?
● საქართველოს პრეზიდენტი თურნავას კანდიდატად წარდგენის გამო ბოდიშს იხდის და მას გადადგომისკენ მოუწოდებს
● “არსად არ წავალ, ჩემს გადადგომაზე ოცნება ყველამ უნდა დაივიწყოს” – სალომე ზურაბიშვილის მიმართვა

პირველ სექტემბერს ცნობილი გახდა, რომ მმართველმა პარტიამ „ქართულმა ოცნებამ“ იმპიჩმენტის პროცესი დაიწყო და განაცხადა, რომ პრეზიდენტმა უხეშად დაარღვია კონსტიტუცია, როდესაც მთავრობის თანხმობის გარეშე უცხო ქვეყნებში რამდენიმე ვიზიტი განახორციელა.

კერძო, საუბარია სამ სამუშაო ვიზიტზე: 2023 წლის 31 აგვისტოს გერმანიის ფედერაციული რესპუბლიკის პრეზიდენტთან, 2023 წლის 1 სექტემბერს ევროპული საბჭოს პრეზიდენტთან და 2023 წლის 6 სექტემბერს საფრანგეთის პრეზიდენტთან.

ზურაბიშვილის თქმით, უცხოურ ვიზიტებში ის საკუთარი სახსრებით დადის და საზღვარგარეთ საქართველოსთვის ევროკავშირის კანდიდატის სტატუსის მინიჭებას ლობირებს.

საკონსტიტუციო სასამართლოს თავმჯდომარემ, მერაბ ტურავამ ჟურნალისტებს განუცხადა, რომ პრეზიდენტის წარმომადგენლები პრეზიდენტის ვიზიტებზე დეტალურად ვერ ისაუბრებენ და მათ მხოლოდ სამართლებრივ საკითხებზე ექნებათ პასუხები.

ოპოზიციის შიგნითვე არ გამორიცხავენ, რომ “ქართულმა ოცნებამ” შესაძლოა მოახერხოს ოპოზიციის ზოგიერთი წარმომადგენლის გადაბირება და იმპიჩმენტისთვის საჭირო 100 ხმის მოგროვება. ოპოზიციური პარტიების წარმომადგენლები ერთმანეთისკენ იშვერენ ხელს, თუმცა კეთდება ზოგადი განცხადებები და კონკრეტულად თუ ვინ შეიძლება გადაიბიროს ოცნებამ, არავინ ასახელებს.