პრეზიდენტი პროკურატურაში დაიბარეს. არჩევნების სავარაუდო გაყალბებაზე გამოძიება დაიწყო

პრეზიდენტი პროკურატურაში დაიბარეს

საქართველოს პროკურატურამ საპარლამენტო არჩევნების სავარაუდო გაყალბების ფაქტზე გამოძიება დაიწყო – მომჩივანი თავად ცენტრალური საარჩევნო კომისიაა. საარჩევნო კომისიის უკმაყოფილება გამოიწვია იმ ფაქტმა, რომ არჩევნების შემდეგ ცესკო “განსაკუთრებული თავდასხმისა და უსაფუძვლო კრიტიკის ობიექტი გახდა”. სწორედ ამ მიზეზით უწყემაბ 29 ოქტომბერს პროკურატურას მიმართა.

პროკურატურამ საქმე საქართველოს სისხლის სამართლის კოდექსის 164³-ე მუხლით (ხმის მიცემის ფარულობის დარღვევა, ხმების არასწორად დათვლა ან არჩევნების შედეგების არასწორად შეჯამება) აღძრა.

ერთ-ერთი პირველი, ვინც პროკურატურაში გამოკითხვაზე დაიბარეს, საქართველოს პრეზიდენტი სალომე ზურაბიშვილია.

ცესკოს განცხადებაში პრეზიდენტზე განსაკუთრებული აქცენტი იყო გაკეთებული:

“საქართველოს პრეზიდენტი სალომე ზურაბიშვილი, ასევე არჩევნებში მონაწილე ზოგიერთი პოლიტიკური პარტიების წარმომადგენლები დაუსაბუთებლად ესხმიან თავს ცესკოს და ცდილობენ, უსაფუძვლო ბრალდებებით უწყებას მიაყენონ რეპუტაციული ზიანი.

საზოგადოებისთვის ცნობილია, რომ საარჩევნო ადმინისტრაციაში მიმდინარეობს არსებული საჩივრების განხილვა, თუმცა ხსენებული პოლიტიკოსების მხრიდან არჩევნების „სავარაუდო გაყალბების“ ბრალდებებმა უკვე ფართო მასშტაბი მიიღო”, – წერს ცესკო.

პრეზიდენტის გამოკითხვა 31 ოქტომბერსაა დანიშნული.

“ცესკო-ს განცხადებისა და საჯარო სივრცეში მასმედიის მეშვეობით გავრცელებული ინფორმაციის თანახმად, საქართველოს პრეზიდენტი, სალომე ზურაბიშვილი უნდა ფლობდეს მტკიცებულებებს 2024 წლის საპარლამენტო არჩევნების შესაძლო გაყალბებასთან დაკავშირებით, რის გამოც, კანონით დადგენილი წესით, საქართველოს პრეზიდენტი, მიმდინარე წლის 31 ოქტომბერს, გამოკითხვის მიზნით დაბარებულია საგამოძიებო უწყებაში”, – აცხადებს პროკურატურა.

სალომე ზურაბიშვილმა არალეგიტიმურად ცნო 26 ოქტომბრის არჩევნები. მისი თქმით, ეს იყო რუსული სპეცოპერაცია და ტოტალური გაყალბება. პრეზიდენტმა მოუწოდა დასავლეთის ქვეყნებს არ აღიარონ გაყალბებული არჩევნები. სალომე ზურაბიშვილი სათავეში ჩაუდგა ოპოზიციის და სამოქალაქო საზოგადოების ბრძოლას არჩევნების გაყალბების წინააღმდეგ. მისი ინიციატივით, 28 ოქტომბერს პარლამენტის წინ მრავალათასიანი მიტინგი გაიმართა.

ოპოზიციის მთავარი მოთხოვნაა არჩევნების გაყალბების ფაქტზე დაიწყოს საერთაშორისო გამოძიება. ამ მოთხოვნას ხელისუფლება არ თანხმდება.

გავლენიანი არასამთავრობო ორგანიზაციების კოალიციამ გამოავლინა გაყალბების რამდენიმე ასეული შემთხვევა, რაც ფოტო-ვიდეო მასალით მყარდება. ასევე, როგორც დამკვირვებლები აცხადებენ, გამოვლენილია არაერთი სქემა, რომლითაც არჩევნები ყალბდებოდა – ეს სქემები ათასობით მოქალაქის პირადობის მოწმობის უკანონოდ გამოყენებას გულისხმობს.

26 ოქტომბრის არჩევნების აღიარებას საერთაშორისო თანამეგობრობა არ ჩქარობს. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია.

როგორც პროკურატურის მიერ გავრცელებულ განცხადებაში ვკითხულობთ, უწყება ჩაატარებს ყველა საჭირო საგამოძიებო მოქმედებას როგორც ცესკოს მიმართვაში მითითებული, ისე საქართველოს პრეზიდენტის, ცალკეული პოლიტიკური პარტიებისა და სადამკვირვებლო მისიების წარმომადგენლების მიერ გავრცელებული ფაქტების შესწავლის მიზნით.

პროკურატურაში აცხადებენ, რომ გამოძიების ფარგლებში გამოიკითხება ყველა პირი, რომლებიც შესაძლებელია ფლობდნენ ინფორმაციას სავარაუდო დანაშაულებრივ ფაქტთან დაკავშირებით.