"2008 წელს ბიძინა ივანიშვილი და „ქართული ოცნება“ რომ ყოფილიყო, ომი არ მოხდებოდა" - პრემიერმა წელი შეაჯამა
პრემიერმა წელი შეაჯამა
პრემიერმინისტრ ირაკლი ღარიბაშვილის განცხადებით, 2008 წელს ბიძინა ივანიშვილი და „ქართული ოცნება“ რომ ხელისუფლებაში ყოფილიყო, აგვისტოს ომი არ მოხდებოდა. როგორც პრემიერმა მთავრობის წლიური ანგარიშის წარდგენისას აღნიშნა, “მაშინდელმა უპასუხისმგებლო” მთავრობამ ვერ მოახერხა ამ ომის თავიდან არიდება.
კიდევ რა თქვა საქართველოს პრემიერმინისტრმა:
ომის შესახებ
“ბოლო პერიოდის განმავლობაში ჩვენს საზოგადოებას ღიად ვესაუბრებოდით იმ რისკების შესახებ, რომელთანაც გამკლავებაც გვიწევდა. საფრთხე საკმაოდ რეალური იყო. ეს არ იყო მოგონილი. ქვეყნის დესტაბილიზაციის საფრთხე იყო, ქვეყნის შიგნით მოქმედი რადიკალური ჯგუფები და მტრული ძალები პირდაპირ იყვნენ დაინტერესებული იმით, რომ ქვეყანა ჩაბმულიყო ამ საომარ ვითარებაში. მე ფაქტებს აღარ გაგახსენებთ, ყველამ კარგად ვიცით ყველაფერი. სიამაყით უნდა ითქვას, რომ ჩვენმა ხელისუფლებამ მხოლოდ და მხოლოდ ჩვენი ქვეყნის და ხალხის ინტერესებიდან გამომდინარე მივიღეთ გადაწყვეტილებები.
ყველაზე დიდი განსაცდელი, რაც შეიძლება ჩვენს ქვეყანას და ხალხს დაატყდეს თავს, ეს არის ომი და ჩვენ ეს ყველაზე დიდი განსაცდელი თავიდან ავირიდეთ. ავიცილეთ ომი და მშვიდობიანად, გონივრულად გავიყვანეთ ჩვენი ქვეყანა სამშვიდობოს. ჩვენ ეს გამარჯვება ერთად მოვიპოვეთ.
შორს ვარ იმ აზრისგან, რომ ეს რისკები მთლიანად არის განეიტრალებული. ბუნებრივია, ეს რისკები არსად წასულა, მაგრამ ჩვენ მაქსიმალური სიფრთხილით და გონიერებით ვაფასებთ რისკებს, ვახდენთ საფრთხეების იდენტიფიცირებას, შესაბამის პრევენციას ვახორციელებთ და ჩვენი ქვეყნის მოსახლეობას და ჩვენს ქვეყანას ვიცავთ.“ – განაცხადა ღარიბაშვილმა.
● შამბა: კონფლიქტის გადასალახად საჭიროა საუბარი. იცვლება თუ არა მიდგომა ქართულ-აფხაზური კონფლიქტის მიმართ?
● ჟენევაში აშშ-ის დელეგაციის განცხადება: რუსეთმა 2008 წელს აღებული ვალდებულება შეასრულოს
● თამაზ გინტურის მკვლელობა: რა მოხდა კირბალში და რა ვერსია აქვს ცხინვალს
“ქართული ოცნების“ მმართველობის დროს, ქვეყნის ეკონომიკა სამჯერ გაიზარდა”
პრემიერის თქმით, „ქართული ოცნების“ ხელისუფლებაში მოსვლამდე ბიუჯეტის შევსების უმთავრესი გზა იყო ბიზნესის რეკეტი, ამასთან, მაღალი იყო სიღარიბე. როგორც ღარიბაშვილმა განმარტა, ბოლო 11 წელიწადში, „ქართული ოცნების“ მმართველობის დროს, ქვეყნის ეროვნული ეკონომიკა სამჯერ გაიზარდა.
“მაღალი იყო სიღარიბე, თითქმის 30%-ზე მეტი იყო სიღარიბე, უმუშევრობაც ამდენივე. ქვეყანაში არავითარი პერსპექტივა არ არსებობდა. ბიზნესი დემოტივირებული იყო, ბიზნესს მხოლოდ ნეგატიური პროგნოზები და მოლოდინები ჰქონდა. ქვეყანაში დამყარებული იყო ავტოკრატიული რეჟიმი, უსამართლო, რომელიც მოქალაქეებს ჩაგრავდა, ომ გამოვლილი მოქალაქეებს, იმ ომ გამოვლილ მოქალაქეებს, რომელიც იმ ხელისუფლებამ ვერ აარიდა თავს და 20 % არის ოკუპირებული.
მაშინ, მთელი ქვეყნის ეკონომიკა, მთლიანი შიდა პროდუქტი დაახლოებით 27 მილიარდი ლარი იყო, წელს 80 მილიარდი ლარი იყო მთლიანი შიდა პროდუქტი, 2024 წელს გახდება 86 მილიარდი ლარი. ბოლო 11 წელიწადში, „ქართული ოცნების“ მმართველობის დროს, ქვეყნის ეროვნული ეკონომიკა სამჯერ გაიზარდა, 27 მილიარდი ლარიდან, 86 მილიარდ ლარამდე. 2012 წელს ბიუჯეტი იყო 8 მილიარდზე მეტი, დაახლოებით 8 მილიარდ 500 მილიონამდე, გაისად იქნება 28 მილიარდ 700 მილიონი, აქაც თითქმის გავასამმაგეთ ბიუჯეტი ბოლო 11 წელიწადში. ბოლო 11 წელიწადში 20 მილიარდით გაიზარდა ჩვენი ქვეყნის მთლიანი ნაერთი ბიუჯეტი.
როგორც პრემიერმა აღნიშნა, მსოფლიო ბანკის კლასიფიკაციით, საქართველო გადავიდა საშუალოზე მაღალი შემოსავლის ქვეყნებს შორის.
„ბოლო 2 წელი ძალიან მნიშვნელოვანი იყო. ჩვენ ორნიშნა ეკონომიკური ზრდა გვქონდა. წელსაც, მიუხედავად დიდი გამოწვევებისა და კატაკლიზმებისა, რომელიც რეგიონსა და მსოფლიოში ხდება, ჩვენ მოვახერხეთ ბოლო 2 წელი 10 % -ზე მეტით გაგვეზარდა ჩვენი ქვეყნის ეკონომიკა. წელს 7%-ის ფარგლებში გვაქვს ეკონომიკური ზრდა. ინფლაციის სრული კონტროლი მოვახერხეთ, ინფლაცია სამიზნე მაჩვენებელს ქვემოთ არის. 1%-ზე ქვემოთ ჩამოვიდა. ეს წნეხი მთლიანად მოიხსნა. გასულ წელს მთავარი გამოწვევა იყო ფასები და ინფლაციის ზრდა, ეს რისკებიც და საფრთხე მთლიანად მოხსნილია, შეიძლება ამაყად ითქვას, ამ წლის მუშაობის შედეგია ინფლაციის მართვა და კონტროლი. მსოფლიო ბანკის კლასიფიკაციით, საქართველო გადავიდა საშუალოზე მაღალი შემოსავლის ქვეყნებს შორის“, – აღნიშნა ღარიბაშვილმა.
● საქართველოს რუსეთზე ეკონომიკური დამოკიდებულება 2023 წელსაც იზრდება – TI
● საქართველოს ახალი სტრატეგიული პარტნიორი ჰყავს: ჩინეთთან მეგობრობის რისკები და შესაძლებლობები
“ბოლო 11 წლის განმავლობაში, სიღარიბე ფაქტობრივად განახევრდა”
მთავრობის მეთაურის განმარტებით, უმუშევრობის დონე ისტორიულ მინიმუმამდე, 17%-მდე შემცირდა.
“ასევე შემცირდა სიღარიბე და მიაღწია ისტორიულ მინიმუმს, 15%-მდე ჩამოვიდა სიღარიბე. წელს, სამივე კვარტალში უმუშევრობის დონის შემცირების ტენდენცია გაგრძელდა. მესამე კვარტლის მდგომარეობით, კვარტალურ ჭრილში რომ ვთქვათ, დასაქმების მაქსიმალური მაჩვენებელი და უმუშევრობის მინიმალური დონე ფიქსირდება. უმუშევრობის დონე მცირდება სამუშაო ძალის და დასაქმების ზრდის პარალელურად; წელს, მაგალითად, მესამე კვარტალში უმუშევრობის დონე 15.6% იყო, ხოლო დასაქმებულთა რაოდენობა, ასევე რეკორდული, მილიონ 366 000-ს მიაღწია.” – თქვა ღარიბაშვილმა.
სანქციების გვერდის ავლის არც ერთი ფაქტი არ დაფიქსირებულა
ირაკლი ღარიბაშვილის განცხადებით, სახელმწიფომ სანქციების თავიდან არიდების 1000-მდე შემთხვევა გამოავლინა. როგორც პრემიერმა განმარტა, სანქციების ასარიდებლად “ჩვენი ქვეყნის” გამოყენების არც ერთი ფაქტი არ დაფიქსირებულა:
“ჩვენ მაქსიმალურად ღიად და გამჭვირვალედ ვიმუშავეთ, ვიმუშავებთ და ასე გავაგრძელებთ მომავალშიც. ჩვენი ნებისმიერი გადაწყვეტილება ეფუძნება ჩვენი ქვეყნის და ხალხის ეროვნულ ინტერესებს, იმას, რომ ჩვენი ქვენების ეკონომიკა არ დაზიანებულიყო და მეორეს მხრივ, ჩვენ მაქსიმალური სიფრთხილით ვმოქმედებდით, რომ რაიმე კითხვა არ გასჩენოდა ჩვენს რომელიმე პარტნიორ ქვეყანას და ეს ასეც მოხდა, ჩვენ, ყველა ასეთი საფრთხის დროული იდენტიფიცირება მოვახდინეთ, 1000-მდე შემთხვევა იქნა იდენტიფიცირებული სანქციების თავიდან არიდების, ოღონდ ეს შეეხებოდა იმ პროდუქციას, რომელიც ევროპიდან რუსეთის მიმართულებით იგზავნებოდა.
ჩვენ, იმავე წამს, დაუყოვნებლივ შევატყობინეთ ჩვენს ევროპელ კოლეგებს ამ მცდელობების შესახებ. ასეთი 1000 შემთხვევა გამოვლინდა ჩვენს მიერ ევროპულ სახელმწიფოებში წინასწარ მიღებული ინფორმაციების შესაბამისად. მადლობა მინდა გადავუხადო ბატონ ლაშა ხუციშვილს და მის შესაბამის უწყებებს, დროული პრევენციები მოახდინეს.“
● მიკროჩიპებიდან ავტომობილებამდე: როგორ ეხმარებიან რუსეთს მეზობლები სანქციების გვერდის ავლაში
● ჯეიმს ო’ბრაიენი: უნდა ვიცოდეთ, რა იტვირთება საქართველოდან რუსეთში დაბრუნებულ თვითმფრინავებში
ექსპერტის კომენტარი
ეკონომისტი ბესო ნამჩავაძე წერს, რომ საქართველოს პრემიერმა მოიტყუა, როდესაც ეკონომიკის სამჯერ გაზრდაზე საუბრობდა.
“მოიტყუა პრემიერმა ბოლო 11 წელში ეკონომიკა 3-ჯერ გაიზარდაო. გაიზარდა, ოღონდ 1.6-ჯერ. დაახლოებით 2-ჯერ მეტი რიცხვი თქვა, ვიდრე რეალურად არის.
11 წელში 3-ჯერ ზრდა შესაძლებელი ნამდვილად იყო და ასე რომ არ მოხდა, მისი პასუხისმგებლობაც არის.
მართლა 3-ჯერ რომ გაზრდილიყო, დღეს ვიქნებოდით უფრო მდიდარი, ვიდრე ბულგარეთი, დავეწეოდით რუმინეთს და ლატვიას.
ამიტომ აქვს დიდი მნიშვნელობა ეკონომიკური ზრდის ყოველწლიურ ტემპს. გასაგებია, 1-2 წელში დიდ ეფექტს ვერ დაინახავ, მაგრამ 10-11 წელს რომ შეაჯამებ, ეფექტი აშკარაა.
საიდან მოიტანა ეს 3-ჯერ ზრდა. 2023 წლის ნომინალური ეკონომიკა შეადარა 2012 წლის ეკონომიკას და არ გაითვალისწინა ის, რომ ნომინალურ ეკონომიკას ინფლაციაც ზრდის. ანუ უარყოფითი მოვლენა (ინფლაცია) დადებითში ჩაითვალა.
1993 წელს საქართველოს ეკონომიკა თუ იყო 1 მილიარდი კუპონი და ჰიპერინფლაციის გამო ერთ წელში 1 ტრილიონი გახდა, ღარიბაშვილის “ლოგიკით“ გამოდის, რომ ეკონომიკა 1000-ჯერ გაზრდილა. აი ზუსტად ამ ტყუილს ამბობს, ერთი-ერთზე, ოღონდ უფრო პატარა რიცხვებში
ადამიანს თუ ეკონომიკის წიგნთან ახლოს ჩაუვლია, იცის, რომ ასე არ შეიძლება, ეკონომიკა ასე არ იზომება, მაგრამ იცის პრემიერმა, რომ ბევრთან გაუვა ეს ტყუილი.
მოკლედ, ღარიბაშვილს რომ ტყუილი არ ეთქვა, მეც არ დავწერდი ეხლა ამ სტატუსს, მაგრამ სამწუხაროდ, მის პროპაგანდას ვერ გადავფარავ.
პ.ს.
ისინიც სცოდავენ (არ იციან ან განგებ იტყუებიან), ვინც ეკონომიკურ ზრდას დოლარებში ზომავენ. ლარის გაუფასურების გამო, ბევრი ითვლიდა დოლარში, ოღონდ ვარდნა გამოსულიყო. ახლა აღარ აწყობთ, ნომინალურ დოლარშიც ზრდა გამოდის.
