პოლიტიკური კრიზისი აფხაზეთში: შინაგან საქმეთა მინისტრი დროებით ჩამოაშორეს თანამდებობას
აფხაზეთში პოლიტიკური კრიზისია ძალოვანების მიერ დეპუტატის ცემის გამო
აფხაზეთში ჯერ კიდევ გრძელდება პოლიტიკური კრიზისი, რომელიც ძალოვანების მიერ დეპუტატის ცემამ გამოიწვია. დაზარალებული პოლიტიკოსის მშობლიური სოფლის, აძიუბჟას მცხოვრებლები უკმაყოფილოები არიან პრეზიდენტის გადაწყვეტილებით, რომელმაც დროებით ჩამოაშორა თანამდებობას შინაგან საქმეთა მინისტრი. ისინი მის საბოლოო გადაყენებას მოითხოვენ. მოლაპარაკებების შემდეგ, პროტესტის მონაწილეები დაიშალნენ, მაგრამ იმ პირობით, რომ ერთ კვირაში დაბრუნდებიან.
სკანდალური ინციდენტი
ყველაფერი იმით დაიწყო, რომ დეპუტატი გარი კოკაია თანასოფლელებთან სოფელ აძიუბჟადან, ქართულ-აფხაზური 1992-1993 წლების ომის ვეტერანებთან ერთად, სოხუმის სანაპიროზე, რესტორანში, გამარჯვებისა და აფხაზეთის დამოუკიდებლობის დღეს აღნიშნავდა. სუფრის შემდეგ, უკვე ქუჩაში, მან სიხარულის გამოსახატავად პისტოლეტიდან რამდენჯერმე ჰაერში გაისროლა.
იმავდროულად, მეზობელ რესტორანში დღესასწაულს აღნიშნავდნენ აფხაზეთის პრეზიდენტი ასლან ბჟანია და მისი კოლეგა სამხრეთ ოსეთიდან, ანატოლი ბიბილოვი.
შემთხვევის ადგილზე მაშინვე გაჩნდა შინაგან საქმეთა მინისტრი დმიტრი დბარი და განგაშზე მისული სპეცრაზმი. როგორც დბარი ამტკიცებს, დაინახა რა, რომ კოკაია ფხიზელი არ იყო, დეპუტატს პისტოლეტის გადაცემა სთხოვა, მაგრამ მან უარი უთხრა. რის შემდეგაც, მილიციონერებმა გადაწყვიტეს ძალით წაერთმიათ იარაღი.
შედეგად, კოკაიას და რამდენიმე ვეტერანს სცემეს, მათ სამედიცინო დახმარება დასჭირდათ.
- აფხაზეთში სპეცსამსახურებმა ოპოზიციონერები „სასაუბროდ“ დაიბარეს
- „ახლა უნდა მოგკლათ“ – აფხაზეთში რუსი ტურისტი აწამეს
- მოსაზრება: რაზე შეთანხმდნენ ხელისუფლება და ოპოზიცია აფხაზეთში
მეორე დღეს, სოფელ აძიუბჟას მცხოვრებლები შეიკრიბნენ და პრეზიდენტსა და პარლამენტს მიმართეს, დაუყოვნებლივ გადააყენონ თანამდებობიდან შინაგან საქმეთა მინისტრი დმიტრი დბარი, ასევე, დეპუტატისა და ომის ვეტერანების ცემის ყველა მონაწილე.
საგანგებო სხდომაზე შეიკრიბა პარლამენტი, თუმცა, საბოლოოდ მაინც ვერ შეძლო დადგენილების მიღება, მიემართათ პრეზიდენტისთვის თანამდებობიდან დროებით ჩამოეშორებინა შინაგან საქმეთა მინისტრი დმიტრი დბარი და შსს-ს ყველა თანამშრომელი, რომლებიც ინციდენტთან იყვნენ დაკავშირებული.
ხელისუფლების რეაქცია
მოვლენების ასე განვითარების გამო, პრეზიდენტი ასლან ბჟანია იძულებული გახდა შეეწყვიტა მივლინება მოსკოვში და სამშობლოში დაბრუნებულიყო, რათა სიტუაცია დაემშვიდებინა.
უსაფრთხოების საბჭოს საგანგებო სხდომაზე, მან დროებით, გამოძიების მიმდინარეობის პერიოდში, თანამდებობას ჩამოაშორა შინაგან საქმეთა მინისტრი დმიტრი დბარი და ინციდენტთან დაკავშირებული ყველა პირი.
ამის მიუხედავად, სოფელ აძიუბჟას მცხოვრებლების მიერ ადრევე დაანონსებული მიტინგი აფხაზეთის პარლამენტთან მაინც გაიმართა. მათ მხარდასაჭერად ადგილზე მივიდნენ ოპოზიციური ვეტერანთა ორგანიზაციის, „არუაას“ წევრები.
მომიტინგეები არ დააკმაყოფილა პრეზიდენტის გადაწყვეტილებამ, თანამდებობიდან დროებით ჩამოეშორებინა მინისტრი და ეს ჩვეულებრივ პოლიტიკურ მანევრად მიიჩნიეს, რომლის მიზანიც – საპროტესტო ტალღის დაგდებაა. მათ მინისტრისა და აღნიშნულ შემთხვევასთან დაკავშირებული ყველა მილიციონერის სამსახურიდან საბოლოოდ გათავისუფლება მოითხოვეს.
პრეზიდენტმა ბჟანიამ სოფელ აძიუბჟას წარმომადგენელთა ჯგუფი მიიღო და განუმარტა, რომ გენპროკურატურა დაკავებულია აღნიშნული საქმის გამოძიებით და მას დრო სჭირდება. და სანამ ის არ დაასრულებს მუშაობას, თავად არ გაათავისუფლებს თანამდებობიდან მინისტრს.
მოგვიანებით, პარლამენტთან შეკრებილ პროტესტის მონაწილეებთან ანალოგიური განმარტებით გამოვიდა ვიცე-პრეზიდენტი ბადრი გუმბა და უსაფრთხოების საბჭოს მდივანი, სერგეი შამბა.
დაიშალნენ, მაგრამ დროებით
უკვე დღის მეორე ნახევარში, „არუაას“ სახელით სიტყვით გამოვიდა ყოფილი დეპუტატი ახრა ბჟანია, რომელმაც აქციის მონაწილეებს დაშლა და პროკურატურის გამოძიების დალოდება შესთავაზა.
„ეს პოლიტიკური მიტინგი არ არის და ჩვენ პოლიტიკური მოთხოვნები არ გვაქვს. ჩვენ ერთ რამეს ვითხოვთ – კანონის აღსრულებას აფხაზეთის მოქალაქეებთან დაკავშირებით, ამ შემთხვევაში, ჩვენს ვეტერანებთან მიმართებაში. ჩვენი სახელმწიფოს იდეოლოგია აგებული უნდა იყოს ამ ადამიანების პატივისცემაზე. თუკი ამ მთავარ საფუძველს შევარყევთ, სახელმწიფოს ვერ ავაშენებთ.
თქვენი შეუპოვრობის წყალობით მიღებულია გადაწყვეტილება გამოძიების დაწყებისა და შინაგან საქმეთა მინისტრის დროებით თანამდებობიდან ჩამოშორების შესახებ. თქვენ მთავარს მიაღწიეთ – სამართლიანობას ამ დროისთვის. მე, როგორც ვეტერანი, მივმართავ ახალგაზრდებს. მოდი, პარლამენტს, რომელმაც, როგორც ვფიქრობ სწორი პოზიცია დაიკავა და ჩვენს სახელმწიფოსაც მივცეთ გარკვეული პროცედურული ვადები. ერთი კვირა, როგორც პრეზიდენტმა თქვა“, – განაცხადა ახრა ბჟანიამ.
აძიუბჟელებმა, რომლებმაც ცალკე მოილაპარაკეს ერთმანეთში, გადაწყვიტეს „არუაას“ წინადადებას დათანხმებოდნენ. მათი სახელით ომის ვეტერანი გივი დოპუა გამოვიდა და ყველას სახლში წასვლისა და ხელისუფლების გადაწყვეტილებისთვის დალოდებისკენ მოუწოდა.
„მინდა გთხოვოთ, მოდი, მოვიცადოთ ეს შვიდი დღე. თუკი სამართლიან გადაწყვეტილებას მიიღებენ, მოვალთ აქ და მადლობას გადავუხდით პრეზიდენტს. ახლა კი გთხოვთ დავიშალოთ“, – თქვა მან, რის შემდეგაც ადამიანებმა პარლამენტის მიმდებარე მოედანი დატოვეს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
