პოლიტიკოსები და არასამთავრობოები სააკაშვილის მრავალპროფილიან კლინიკაში გადაყვანას მოითხოვენ
19 არასამთავრობო ორგანიზაცია, ასევე პარტიები “ლელო”, “დროა” და “ხალხისთვის” საქართველოს მესამე პრეზიდენტის, მიხეილ სააკაშვილის მრავალპროფილიან, სამოქალაქო კლინიკაში გადაყვანას მოითხოვენ. ისინი მოუწოდებენ მთავრობას, გაითვალისწინონ სახალხო დამცველის რეკომენდაციები.
განცხადებაზე ხელმომწერი არასამთავრობოები მიიჩნევენ, რომ ხელისუფლებამ ჰოსპიტალიზაციის საკითხი ადამიანის სიცოცხლის, ჯანმრთელობისა და პირადი უსაფრთხოების უფლების დაცვის მაღალი სტანდარტით უნდა გადაწყვიტოს.
მათივე განმარტებით, ექიმთა მულტიფუნქციურმა ჯგუფმა გასცა რეკომენდაცია, რომ სააკაშვილის ჰოსპიტალიზაცია შესაბამისი პერსონალითა და სამედიცინო აღჭურვილობით დაკომპლექტებულ საავადმყოფოში მოხდეს, სახალხო დამცველის დასკვნით კი N18 სასჯელაღსრულების დაწესებულებაში არსებული საავადმყოფო ამ სტანდარტებს არ შეესაბამება. გარდა ამისა, სახალხო დამცველის განცხადებით, მიხეილ სააკაშვილის N18 დაწესებულებაში მოთავსება მისი უსაფრთხოების რისკებს შეიცავს.
განცხადება გაავრცელა პარტია “დროამაც”. განცხადებაში ნათქვამია, რომ ყოფილი პრეზიდენტი დაუყოვნებლივ უნდა გადაიყვანონ სამოქალაქო სექტორის კლინიკაში.
“ქართულმა ოცნებამ”, ნაცვლად პატიმრის ჯანმრთელობაზე ზრუნვისა, ბინძური, ცილისმწამებლური და ცინიკური განცხადებები გააკეთა სახალხო დამცველის მისამართით და გამორიცხა სააკაშვილის სამოქალაქო კლინიკაში გადაყვანის შესაძლებლობა“, – წერია განცხადებაში.
“დროა” აღნიშნავს იმასაც, რომ ხელისუფლება იტყუება, როდესაც ამბობს, რომ პატიმრების სამკურნალოდ მხოლოდ ციხის საავადმყოფო განიხილება, რადგან 2020 წელს 585 პატიმარი გადაიყვანეს სამოქალაქო ჰოსპიტალში, რაც კიდევ ერთხელ აჩვენებს, რომ მიხეილ სააკაშვილის მიმართ სახეზეა “ქართული ოცნების” პირადი ანგარიშსწორება.
პარტია მოუწოდებს საქართველოში აკრედიტებულ დიპლომატიურ კორპუსს, საერთაშორისო და ადგილობრივ არასამთავრობო ორგანიზაციებს, გამოიყენონ ყველა ბერკეტი, რათა მიხეილ სააკაშვილის ჯანმრთელობის და სიცოცხლის უფლება დაცული იყოს.
● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
● თავისუფლება მიშას: რას ფიქრობენ ექსპერტები ბოლო ცხრა წლის ყველაზე ხალხმრავალ აქციაზე
სტრასბურგის სასამართლოსთვის მიმართვას ურჩევს “ნაციონალურ მოძრაობას” პარტია “ხალხისთვის” ლიდერი ანა დოლიძე. მისი თქმით, სტრასბურგის სასამართლო განიხილავს და დაუყოვნებლივ გადაწყვეტს, უნდა გადაიყვანონ თუ არა სააკაშვილი სამოქალაქო კლინიკაში.
“გამოიყენონ სტრასბურგის პროცედურა, 39-ე მუხლით უზრუნველყოფილი, ჰქვია დროებითი ღონისძიება, ერთხელ ეს არის წარსულში გამოყენებული. მისი აზრია, სააკაშვილის ადვოკატებმა მიმართონ სტრასბურგის სასამართლოს, რომელიც დაუყოვნებლივ მიიღებს გადაწყვეტილებას, გადაიყვანონ ის თუ არა სამოქალაქო საავადმყოფოში”, – ამბობს დოლიძე.
სააკაშვილის შესახებ განცხადება გაავრცელა პარტია “ლელომაც”, რომელშიც ნათქვამია, რომ ხელისუფლებას კარგად უნდა ესმოდეს პატიმრობაში მყოფი პრეზიდენტის სიცოცხლის შენარჩუნების მნიშვნელობა.
“სამწუხაროდ, საქართველოს ხელისუფლება აუხსნელ სიჯიუტეს იჩენს და მიხეილ სააკაშვილის ციხის რესპუბლიკურ საავადმყოფოში გადაყვანას აპირებს, სადაც მდგომარეობის დრამატულად დამძიმების შემთხვევაში არც მკურნალობისთვის სათანადო პირობები არსებობს და არც უსაფრთხოების გარანტიები. მდგომარეობის დრამატულად დამძიმების საფრთხე ყოველდღიურად მატულობს.
მოვითხოვთ, მიხეილ სააკაშვილის სამოქალაქო პროფილის სათანადოდ აღჭურვილ კლინიკაში დაუყოვნებლივ გადაყვანას, სადაც გარანტირებულად დაცული იქნება მისი სიცოცხლე და უსაფრთხოება. ნებისმიერი პატიმრის სიცოცხლესა და ჯანმრთელობაზე პასუხისმგებელია სახელმწიფო”, – ნათქვამია განცხადებაში.
● ყოფილი პრეზიდენტი მიხეილ სააკაშვილი უკვე 26-ე დღეა შიმშილობს. მისი ჯანმრთელობის მდგომარეობის შესასწავლად რამდენიმე დღის წინ ციხეში ექიმთა ჯგუფი იმყოფებოდა, რომლებმაც პრევენციული ჰოსპიტალიზაციის რეკომენდაცია მრავალფუნქციურ სამედიცინო დაწესებულებაში გასცეს, თუმცა იუსტიციის მინისტრი ამბობს, რომ თუ მესამე პრეზიდენტის ჯანმრთელობის მდგომარეობა გაუარესდება, ის გადაყვანილი იქნება მხოლოდ ციხის საავადმყოფოში.
● იუსტიციის მინისტრის, რატი ბრეგაძის მტკიცებით, ციხის კლინიკა აკმაყოფილებს მრავალპროფილური საავადმყოფოს კრიტერიუმებს და შეუძლია მოშიმშილე პატიმრის ჯანმრთელობის მართვა.
● სახალხო დამცველის სპეციალურმა წარმომადგენელმა ციხის იმ საავადმყოფოს მზადყოფნის ხარისხი შეამოწმა, სადაც მესამე პრეზიდენტს უპირებენ გადაყვანას.
● სახალხო დამცველის განცხადებაში ნათქვამია, რომ ციხის საავადმყოფოში არსებული ვითარება სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ დასკვნასა და რეკომენდაციებს, ასევე, არსებობს გარკვეული რისკები უსაფრთხოების თვალსაზრისით.
● მიხეილ სააკაშვილის მდგომარეობის მონიტორინგისთვის შექმნილი ექიმთა კონსილიუმი კარდიოლოგმა ზურაბ ფაღავამ დატოვა. ექიმის თქმით, კონსილიუმის დატოვების მიზეზი მისი გაუარესებული ჯანმრთელობის მდგომარეობაა.
