პიკეტირება, აქციები, მარში პარლამენტთან - რას გეგმავს ოპოზიცია მარტის თვეში
დღეს პარლამენტის წინ ფართომასშტაბიანი აქცია „თავისუფლებისთვის“ გაიმართა. როგორც აქციის მონაწილეები აცხადებენ, აქციები პერმანენტულ ხასიათს მიიღებს, მოხდება სახელმწიფო შენობების პიკეტირება და აქცია-მსვლელობები.
აქციების მთავარი მოთხოვნაა ყველაზე მსხვილი ოპოზიციური პარტიის, “ერთიანი ნაციონალური მოძრაობის” თავმჯდომარის, ნიკა მელიას და ტელეკომპანია “მთავარის” მეწილის, გიორგი რურუას განთავისუფლება. ასევე, რიგგარეშე საპარლამენტო არჩევნების დანიშვნა.
ოპოზიციის სამომავლო გეგმები დემონსტრანტებს “ნაციონალური მოძრაობის” ერთ-ერთმა ლიდერმა, ხატია დეკანოიძემ გააცნო:
- 2 მარტს გაიმართება საკანონმდებლო ორგანოს პიკეტი;
- 5 მარტს დემონსტრანტები კანცელარიის პიკეტს მოაწყობენ;
- 9 მარტს აქცია გაიმართება შინაგან საქმეთა სამინისტროსთან;
- 11 მარტს აქცია გაიმართება სასამართლოსთან;
- 13 მარტს კი ისევ პარლამენტთან ფართომასშტაბიანი აქცია-მარში მოეწყობა.
„ამ გავრილოვებს მოუწევთ ჩვენი ხმის მოსმენა. საპროტესტო ტალღა არ დასრულდება მოკლე დროში.
თავისუფლების მოპოვების გზა არის რთული, დაბრკოლებებით და მოუთმენლობით აღსავსე, მაგრამ ჩვენ არ ვაპირებთ ამ უსამართლობის მოთმენას”, – განაცხადა აქციაზე ხატია დეკანოიძემ.
● პოლიტიკური კრიზისი საქართველოში. იქნება თუ არა ვადამდელი არჩევნები?
● პირველი საერთაშორისო გამოხმაურებები მელიას დაკავებაზე
● Foreign Policy: საქართველოს ოპოზიციის ლიდერის დაკავებამ სანქციების მოთხოვნა გამოიწვია
_________________________________________________
ნიკა მელია 23 თებერვალს, “ნაციონალური მოძრაობის” შტაბში სპეცოპერაციის შედეგად დააკავეს. ოპოზიციის ერთ-ერთი ლიდერის დაკავებამ კიდევ უფრო გააღრმავა ქვეყანაში არსებული პოლიტიკური კრიზისი, რომელიც გასული წლის ოქტომბრის საპარლამენტო არჩევნების შემდეგ დაიწყო. ოპოზიციამ არჩევნებს გაყალბებული უწოდა და მათი შედეგები არ აღიარა.
მელიას დაკავებამ უპრეცედენტო რეზონანსი გამოიწვია საერთაშორისო საზოგადოებაში. პრაქტიკულად ყველა საერთაშორისო ორგანიზაციამ, რომელიც საქართველოში მუშაობს, ასევე ელჩებმა და დასავლელმა პარტნიორებმა ერთხმად დაგმეს მელიას დაკავება და მას დემოკრატიის გზაზე უკან გადადგმული ნაბიჯი უწოდეს. დასავლელი პარტნიორები მოუწოდებდნენ ხელისუფლებას და ოპოზიციას დიალოგისკენ. ორივე მხარე გამოხატავს მზადყოფნას მოლაპარაკებების მაგიდასთან დასხდნენ, თუმცა ჯერ ეს არ მომხდარა. ოპოზიციას დიალოგისთვის თავისი პირობა აქვს – პოლიტპატიმრების გათავისუფლება.
_______________________________________________
● “საქართველოს ადგილი ევროპულ ოჯახში საფრთხის ქვეშაა” – ევროპელი და ამერიკელი პარლამენტარების განცხადება
● ნიკა მელიას დაკავება: პირველი რეაქციები ფეისბუკზე
_________________________________________________
