"პიჯაკების საქმე" - რა თქვა მიხეილ სააკაშვილმა სასამართლოზე
პიჯაკების საქმე
2 დეკემბერს მიხეილ სააკაშვილი მეორედ წარსდგა სასამართლოს წინაშე. ამჯერად, თბილისის საქალაქო სასამართლოში ე.წ. “პიჯაკების საქმე”, საბიუჯეტო თანხის დიდი ოდენობით გაფლანგვის საქმე იხილებოდა.
პროკურატურა საქართველოს მესამე პრეზიდენტს ადანაშაულებს დიდი ოდენობით საბიუჯეტო თანხის, დაახლოებით 9 მილიონი ლარის ჯგუფურად გაფლანგვაში. სააკაშვილი ბრალს არ აღიარებს.
ამ საქმეში მიხეილ სააკაშვილთან ერთად ბრალდებულია სახელმწიფო დაცვის სპეციალური სამსახურის იმჟამინდელი უფროსი თეიმურაზ ჯანაშია. ჯანაშიაც საქმეს აბსურდულს უწოდებს და ამბობს, რომ სააკაშვილს საპრეზიდენტო უფლებამოსილების განხორციელებისა და წარმომადგენლობითი ხარჯებისთვის ასამართლებენ.
კორუფციაზე
მიხეილ სააკაშვილმა სასამართლოს წინაშე წარმოთქმულ სიტყვაში განაცხადა, რომ მისთვის დიდი შეურაცხყოფაა კორუფციის ბრალდება.
“სააკაშვილთან სიტყვა „კორუფციის“ ხსენებას მე ვერ მივიღებ” – განაცხადა სააკაშვილმა.
სააკაშვილის თქმით, მსოფლიო ბანკმა წიგნიც კი მიუძღვნა საქართველოს ბრძოლას კორუფციასთან მისი პრეზიდენტობის დროს.
“ერთადერთი შემთხვევა იყო როცა “მსოფლიო ბანკმა” გამოაქვეყნა წიგნი კორუფციის დაძლევაზე ქვეყანაში. ეს მოახერხა მხოლოდ ერთმა ქვეყანამ და ეს იყო საქართველო, ამაზე გამოუშვეს წიგნი”.
● სააკაშვილის საქმეები. რისთვის ზის ციხეში ყოფილი პრეზიდენტი
სააკაშვილის თქმით, ის მზად არის სასამართლოს კითხვებს გასცეს პასუხი და საკუთარი უდანაშაულობა დაამტკიცოს, ოღონდ სასამართლო სისტემის შეცვლის შემთხვევაში, მაშინ, როდესაც სასამართლო გახდება დამოუკიდებელი და სამართლიანი.
სასამართლოს მიმართ უნდობლობაზე
ის საკუთარ თავს მძევალს უწოდებს:
„ხომ არ სჯობს, რომ ჯერ მოითხოვოთ მძევლობიდან ჩემი გამოხსნა.. ჩამოვედი და პირდაპირ მგლის ხახაში გავყავი თავი. მზად ვარ წარვდგე იმ სასამართლოს წინაშე და დაე, მან გამასამართლოს როცა იქნება, თუნდაც ერთ წელიწადში, ორ წელიწადში თუ სამში,“-განაცხადა სააკაშვილმა.
მისი თქმით, „დღევანდელი მახინჯი სისტემის ერთადერთი ფუნქციაა, რომ ციხიდან ცოცხალი არ გავიდეს“.
„არ ვითხოვ მადლობას იმის გამო, რომ დენი მოვიყვანე, არ ვითხოვ მადლობას იმის გამო, რომ ზოგიერთმა ჩვენი სისტემით ჩააბარა და იურიდიულ ფაკულტეტზე 15 ათასს აღარ სთხოვდნენ. ზოგიერთი მათგანი ალბათ ჩემი სტიპენდიით იყო წასული, როგორც მაგალითად, ჩემი მკვლელობის ერთ-ერთი თანამონაწილე, იუსტიციის ე.წ. მინისტრი. არ ვითხოვ მადლობას, რომ ხელფასები, პენსიები გაიზარდა, სამუშაო ადგილები 2-ჯერ გაიზარდა. ხომ არ გთხოვთ მადლობას 200 ახალი კლინიკისთვის, სადაც სამწუხაროდ, დღეს ექიმებს ძალიან მძიმე პირობები აქვთ, მაგრამ უსამართლობას, შეურაცხყოფას ვერ მივიღებ“,- განაცხადა სააკაშვილმა.
ბოტოქსზე
ექსპრეზიდენტმა მედიაში გავრცელებულ ინფორმაციასაც გამოეხმაურა, რომ ძვირადღირებული კოსმეტიკური პროცედურები უცხოურ კლინიკებში გაიკეთა.
“რაც შეეხება ლეგენდარულ ბოტოქსს, ეს არის აბსოლუტური სიცრუე… გაუგზავნეთ ყველა იმ კლინიკას, რომლებზეც ლაპარაკობთ, გაუგზავნეთ და მიიღეთ იმათგან დადასტურება, თუ ეს იყო კოსმეტიკური პროცედურა, თუ ეს არ იყო ჩვეულებრივი კანის სნეულების მკურნალობა, რომელიც დამემართა 2008 წლის შემდეგ, ნერვულ ნიადაგზე, როგორც ექიმები ამბობდნენ, ნიკა ყიფშიძემ [სააკაშვილის პირადი ექიმი_JAMnews] კარგად იცის. სურათებშიც შეგიძლიათ, რომ ნახოთ როგორ არის დასივებული სახე 2008 წლის შემდეგ და რომელიც რეგულარულად საჭიროებდა რაღაც აპარატზე მიერთებას და ა.შ.”
სანდრა რულოვსზე
სააკაშვილის განცხადებით, ხარჯების დიდი ნაწილი, რომელსაც მას ედავებიან, საქართველოს ყოფილ პირველ ლედის, მის ყოფილ მეუღლეს, სანდრა რულოვსს ეკუთვნის.
“ამ ხარჯების მეოთხედი თუ მეხუთედი სანდრასია”, — აღნიშნა მიხეილ სააკაშვილმა სასამართლოს სხდომაზე.
მან იკითხა, რატომ არ ფიგურირებს საქმეში სანდრა რულოვსი, შემდეგ კი სასამართლოს იმ ინვესტიციებისა და გრანტებს შესახებ შეახსენა, რომელიც, მისი თქმით, ქვეყანაში ყოფილი პირველი ლედის დამსახურებით შემოვიდა.
“სანდრას რატომ არ ასამართლებენ? ხარჯების დიდი ნაწილი არის სანდრასი. სიამოვნებით ვიჯდებოდი მასთან ერთად საბრალდებო სკამზე იმიტომ, რომ ამ ხარჯების მეოთხედი თუ მეხუთედი სანდრასია.
ოღონდ, სანამ სანდრას ედავებით, გაიხსენეთ, რომ სანდრამ შემოიტანა ამ ქვეყანაში 100 მილიონი ევროს გრანტები სამედიცინო სფეროში. სანდრას მეშვეობით 4-ჯერ ნაკლები ქართველი ქალი კვდება მკერდის კიბოთი, ვიდრე მანამდე. სანდრას მეშვეობით… ციხის სისტემაში ყველა ციხის ექიმი გეტყვით, რამდენი რამ აქვს გაკეთებული ჯანდაცვისთვის ციხეში.
სანდრა არ არის კორუფციონერი? ერთად ვიყავით გენერალური ასამბლეის სესიაზე ნიუ-იორკში და სასწრაფოდ ნიუ-იორკის ჰოსპიტალში გავუკეთეთ ოპერაცია. დაჯდა საკმაოდ ძვირი თანხა. რატომ არ არის სანდრა შეტანილი?” — დასძინა მან.
