„ნეტავ იცოდნენ, რა ანტიპათიაა მათ მიმართ სომხეთში“ - პერსონა ნონ გრანტების შესახებ
პერსონა ნონ გრატა პირები სომხეთში
„მე არ ვარ შეზღუდვების მომხრე, მაგრამ მარგარიტა სიმონიანი და არამ გაბრიელიანოვი უნდა ჩამოვიდნენ სომხეთში და თავიანთი თვალით ნახონ, თუ რა ანტიპათიას იწვევენ სომხური საზოგადოების უმრავლესობაში მათი ყბადაღებული განცხადებების, სასაცილო ბრალდებებისა და იარლიყების გამო“, – განაცხადა სიტყვის თავისუფლების დაცვის კომიტეტის ხელმძღვანელმა აშოტ მელიქიანმა.
მისი აზრით, სომხური წარმოშობის რუსი მედიის მენეჯერების ლექსიკა და ქცევა, რომლებიც სომხეთში უკვე აღიარეს „არასასურველ პირებად“, ადასტურებს მათ ამპარტავნობას და მიუღებლობას.
წინა დღით, პრესკონფერენციაზე სომხეთის პრემიერ-მინისტრმა ნიკოლ ფაშინიანმა განაცხადა, რომ პერსონა ნონ გრატად გამოცხადებული პირები „ვალდებული არიან პატივი სცენ სომხეთს, მათ შორის სომეხი ხალხის მიერ არჩეულ ხელისუფლებას“.
ამის საპასუხოდ, მარგარიტა სიმონიანმა და არამ გაბრიელიანმა ნიკოლ ფაშინიანი “მოღალატედ” და “მატყუარად” გამოაცხადეს, და დაუფარავი ზიზღი გამოხატეს მის მიმართ.
ერთი კვირის წინ სომხეთში არ შეუშვეს სომხური წარმოშობის რუსი ჟურნალისტი და გამომცემელი, News Media ჰოლდინგის დამფუძნებელი არამ გაბრელიანოვი, ხოლო 2022 წლის ოქტომბერში, მარგარიტა სიმონიანს, ტელეკომპანია Russia Today-ს მთავარ რედაქტორს და კონსტანტინ ზატულინს, დსთ-ს საკითხებში სახელმწიფო სათათბიროს კომიტეტის თავმჯდომარის პირველ მოადგილეს, აეკრძალათ სომხეთში შესვლა.
ამ თემას ცოტა ხნის წინ რუსეთის პრეზიდენტის პრესმდივანიც გამოეხმაურა. პესკოვმა განაცხადა, რომ ნეგატიურად არის განწყობილი ასეთი გადაწყვეტილებების მიმართ და გამოთქვა იმედი, რომ უახლოეს მომავალში რუსეთსა და სომხეთს შორის ორმხრივი ურთიერთობები “გათავისუფლდება მსგავსი ქმედებებისგან.”
ფაშინიანი: “მათ პატივი უნდა სცენ სომხეთს”
14 მარტს გამართულ პრესკონფერენციაზე ფაშინიანმა უპასუხა შეკითხვას იმის შესახებ, თუ რატომ გამოცხადდა ზოგიერთი რუსული მედიის წარმომადგენელი სომხეთში „არასასურველ პირად“.
“სომხეთი არის სუვერენული სახელმწიფო და გააჩნია უფლება, ელოდოს პატივისცემას საკუთარ თავთან მიმართებაში. ასევე, სომხეთს აქვს უფლება გამოიყენოს სუვერენული მექანიზმები იმ შემთხვევაში, თუ მისი ინტერესების წინააღმდეგ არიან. მსგავსმა ხალხმა პატივი უნდა სცეს სომხეთსა და ხალხის მიერ არჩეულ მთავრობას.
ასევე მსურს გავამახვილო ყურადღება ერთ ფაქტზე: ამ ხალხს იმის ერთი პროცენტი მაინც რომ გაეკეთებინათ საკუთარ ქვეყანასთან მიმართებაში, რასაც სომხეთის წინააღმდეგ აკეთებდნენ, საკუთარ სახლშიც კი ვერ მოხვდებოდნენ. ამით ყველაფერი ნათქვამია.” – განაცხადა ფაშინიანმა.
პრემიერმა ასევე განმარტა, რომ პირის პერსონა ნონ გრატად ცნობის შესახებ გადაწყვეტილებებს იღებენ შესაბამისი სახელმწიფო ორგანოები ქვეყნის კანონმდებლობის შესაბამისად.
მარგარიტა სიმონიანი: “არასდროს არაფერი მითქვამს დერეფანზე”
„არასდროს არაფერი მითქვამს არცერთ დერეფანზე [გულისხმობს ზანზეგურის დერეფანს], მაგრამ მე ვისაუბრებ პირადად ფაშინიანზე: ის არის დეგენერატი და სომეხი ხალხის მოღალატე, მან გაყიდა და უღალატა ყველა იმ სომხურ ინტერესს, რომლის ღალატი და გაყიდვაც შეეძლო. მიდით, გაყიდეთ და უღალატეთ სანამ შეგიძლიათ. მას სძულს რუსეთი და ატყუებს პუტინს!“ – ასე გამოეხმაურა ფაშინიანის განცხადებას მარგარიტა სიმონიანი.
ტელეკომპანია RT-ის მთავარი რედაქტორი აცხადებს, რომ დღევანდელი ხელისუფლების პირობებში იგი ისედაც არ აპირებდა სომხეთში ჩასვლას.
“შეასწორეთ თქვენი ფორმულირება: მარგარიტა სიმონიანს ეკრძალება სომხეთში შესვლა ამჟამინდელი ხელისუფლების მიმართ ზიზღის გამო!“ – წერს იგი სოციალურ ქსელში.
გაბრიელიანოვი: ” ბატონ ნიკოლს მოუწევს პასუხების გაცემა”
9 მარტს ჟურნალისტმა და გამომცემელმა არამ გაბრიელიანოვმა ფეისბუქზე დაწერა, რომ მას სომხეთში არ უშვებენ. მან განაცხადა, რომ უჩივლებს სომხეთის მთავრობას და აიძულებს მას, მისცენ ქვეყანაში შესვლის უფლებას.
„ფაქტობრივად, სომხეთი გაჟღენთილია თურქეთის წინაშე ღალატისა და ღელვის ჟანგით. დღევანდელი სომხეთი არის რუსეთთან და რუს ხალხთან ძმური ურთიერთობების განადგურების მომხრე. გასაკვირი არ არის, რომ უშიშროების ძალებიც კი ფაშინიანს თორქ [თურქ] ნიკოლს ეძახიან.”
გაბრიელიანოვი წერს, რომ სასამართლო განიხილავს არა მხოლოდ სარჩელს სომხეთში შესვლის აკრძალვასთან დაკავშირებით, არამედ მეორე სარჩელსაც, რომელიც პირადად ფაშინიანს ეხება. მისი ადვოკატი ექსპრეზიდენტ რობერტ ქოჩარიანის ყოფილი დამცველი, არმან ვარდევანიანი იქნება.
არამ გაბრიელიანოვი ფაშინიანს ჰპირდება, რომ სასამართლოში დაუმტკიცებს მას, რომ იგი არის მატყუარა.
„სომხეთის მოსახლეობის 80 პროცენტზე მეტი უპატივცემულობას გამოხატავს არჩეული პრემიერის მიმართ.“ – ამბობს ჟურნალისტი.
კომენტარი
“სიმონიანს, გაბრიელიანს და სხვებს რუსული პროპაგანდა იყენებს სომხეთის წინააღმდეგ კონტრპროპაგანდის მთავარ იარაღად”, – ამბობს სიტყვის თავისუფლების დაცვის კომიტეტის თავმჯდომარე აშოტ მელიქიანი.
მისი აზრით, მარგარიტა სიმონიანმა დიდი ხანია შეწყვიტა ჟურნალისტობა და დღეს ის არის “კრემლის პროპაგანდისტი” და “პუტინის რეჟიმის სპიკერი”:
“სიმონიანი მზადაა ნებისმიერი იარლიყი მიაკეროს სომხეთის ხელისუფლებას და თავად ქვეყანას, რათა კრემლის კეთილგანწყობა დაიმსახუროს.”
მელიქიანი ხაზს უსვამს, რომ „არასასურველად“ გამოცხადებული პირები იმავე ლექსიკას იყენებენ, რასაც სომხური ოპოზიცია:
„ზოგიერთ შემთხვევაში იწყებენ ხალხის სახელით ლაპარაკს, ფაშინიანს ხალხის მოღალატედ აცხადებენ და ა.შ. ანუ ეს ის აზრებია, რისი მოსმენითაც უკვე დავიღალეთ რადიკალური ოპოზიციისგან – ეს არის კრემლის მეხუთე კოლონა სომხეთში“.
ექსპერტის განმარტებით, ეს მედია მენეჯერები ფაქტობრივად რუსეთის აგენტები არიან, რომლებიც სომხეთში მოქმედი მეხუთე კოლონის ინტერესებს ემსახურებიან.
მელიქიანის თქმით, საზოგადოება ამ თემებს ყურადღებას არ აქცევს, რადგან ადგილობრივი მედია ამ ადამიანებს უბრალოდ უგულებელყოფს.
