პანდემია: მასობრივი საფლავები აშშ-ში. ავსტრია, გერმანია, ჩეხეთი და დანია კარანტინს ასუსტებენ. ფოტო
ვარდისფერი სუპერმთვარე – ყველაზე დიდი მთვარე, რომლის დანახვაც 2020 წელს დედამიწიდან შეიძლება. ფოტო გადაღებულია მალტაში, 2020 წლის 8 აპრილს.
თავდაპირველად – პანდემიის შესახებ ზოგადი მონაცემები, რომელიც გარკვეულს იმედს იძლევა.
პანდემიის სტატისტიკა საშინელებაა. 11 აპრილის მონაცემებით, კორონავირუსით ინფიცირებული 102 739 ადამიანი გარდაიცვალა. დაავადდა – 1 699 769. გამოჯანმრთელდა – 376 339.
მაგრამ 10 აპრილის დინამიკა, ისევე, როგორც წინა ორი დღის, უკეთესია, ვიდრე მანამდე არსებული.
დღე-ღამის განმავლობაში, მსოფლიოში, დაინფიცირდა 40 694 ადამიანი. ეს ნაკლებია, ვიდრე ერთი დღით ადრინდელი მონაცემები – 50 111. გასული დღე-ღამის განმავლობაში, ორჯერ ნაკლები ადამიანი გარდაიცვალა – 2 050, ერთი დღით ადრე დაიღუპა – 5 131.
აშშ: მსხვერპლი უფრო დიდია, ვიდრე ომებში, 30 წლის განმავლობაში
10 აპრილს, აშშ-ში, პანდემიის დაწყებიდან ყველაზე დიდი მსხვერპლი დაფიქსირდა. მთელ ქვეყანაში, 1 953 ადამიანი დაიღუპა.
ამერიკულ მედიაში გამოჩნდა დრონის დახმარებით გადაღებული ფოტო. მასზე ჩანს, ქიმიური თავდაცვის ფორმებში გამოწყობილი ადამიანები როგორ უშვებენ კუბოებს საერთო საფლავში.
ეს ნიუ იორკში, კუნძულ ჰარტზე ხდება. კრძალავენ ადამიანებს, რომელთაც არ ჰყავთ ნათესავები ან არ აქვთ დასაფლავების სახსრები. თუკი ადრე, მსგავსი დასაფლავებები კვირაში ერთხელ ხდებოდა და, დაახლოებით, 25 კუბო იყო – ამ დღეებში, ყოველდღიურად მიაქვთ, დაახლოებით, 25 კუბო.
- პანდემია, რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს
- „მაგრამ ბიზნესს მაინც არ დავხურავთ“ – თურქეთი მსოფლიოში პირველ ადგილზეა კორონავირუსის გავრცელების ტემპებით
- „გადაწყვიტო, ვინ უნდა იცოცხლოს და ვინ უნდა მოკვდეს – ის არ არის, რასაც მასწავლიდნენ“ – ნიუიორკელი ექიმის ისტორია
- კორონავირუსი კავკასიაში. განახლებადი
ნიუ იორკში, კორონავირუსით ინფიცირების 170 ათასზე მეტი შემთხვევაა დარეგისტრირებული და გარდაიცვალა თითქმის 8 ათასი ადამიანი.
დაავადებულთა რაოდენობა მხოლოდ ნიუ იორკში მეტია, ვიდრე მსოფლიოს ნებისმიერ ცალკე აღებულ სახელმწიფოში, მათ შორის, ჩინეთში, საიდანაც პანდემია დაიწყო.
11 აპრილისთვის, აშშ-ში, კორონავირუსით დაინფიცირდა ნახევარ მილიონზე მეტი ადამიანი და მათგან, 18 ათასზე მეტი დაიღუპა – უფრო მეტი, ვიდრე ამერიკამ დაკარგა უკანასკნელი 30 წლის განმავლობაში ყველა ომში – ქუვეითში, ერაყსა და ავღანეთში.
ამავდროულად, ქვეყნის სხვა შტატებში სიტუაცია გაცილებით უკეთესია. ვისკონსინში გაშლილი 3-ათასსაწოლიანი ჰოსპიტლის გამოყენება არ გახდა საჭირო და ბევრი ექიმი მოხალისედ წავიდა ნიუ იორკში, კოლეგების დასახმარებლად.
მოსალოდნელია, რომ დაავადების პიკი აშშ-ში ერთ კვირაში დადგება.
აშშ-ის პრეზიდენტთან არსებული კორონავირუსთან ბრძოლის შტაბის ხელმძღვანელმა განაცხადა, რომ, მისი პროგნოზებით, დაახლოებით, 60 ათასი ადამიანი დაიღუპება.
ავსტრია, გერმანია, ჩეხეთი და დანია: ფრთხილად უბრუნდებიან ჩვეულ ცხოვრების სტილს
ავსტრიამ (13 555 ინფიცირებული, 319 გარდაცვლილი) ევროპული ქვეყნებიდან პირველმა განაცხადა იმის შესახებ, რომ მზად არის მოხსნას შეზღუდვები ვაჭრობაზე. ხელისუფლების პროგნოზით, თუკი არაფერი ექსტრაორდინარული არ მოხდა, ამას აღდგომის (12 აპრილი) შემდეგ გააკეთებენ.
მის მაგალითზე ემზადება ჩეხეთიც (5 674 ინფიცირებული, 119 გარდაცვლილი), რომელიც აღდგომის შემდეგ, არა მხოლოდ მაღაზიების, არამედ საბავშვო და სპორტული მოედნებისა და სტადიონების გახსნას გეგმავს.
დანიამ (5 819 ინფიცირებული, 247 გარდაცვლილი) განაცხადა, რომ თუკი ახალი შემთხვევების შემცირების ტენდენცია შენარჩუნდა, საკარანტინო ზომებზე უარის თქმას დაიწყებს.
გერმანიაში, სასამართლოს გადაწყვეტილებით, გაუქმდა პლაჟზე გასვლის აკრძალვა მაკლენბურგ-წინა პომერანიის მიწაზე, ბალტიის ზღვის სანაპიროზე. ჯერჯერობით ეს მხოლოდ ადგილობრივ მცხოვრებლებს ეხებათ, რომლებმაც, ამასთან, უნდა დაიცვან სოციალური დისტანცია 2.5 მეტრი. ფედერალური ხელისუფლების აკრძალვა რეგიონებს შორის მიმოსვლაზე კვლავ ძალაში რჩება.
გერმანიაში (120 157 ინფიცირებული, 2 688 გარდაცვლილი), გასული ოთხი დღის განმავლობაში, შეინიშნებოდა კორონავირუსით ინფიცირებული ახალი პაციენტებისა და გარდაცვლილების რიცხვის განუხრელი შემცირება.
ეს სტატისტიკა გაცილებით უკეთესია, ვიდრე იტალიაში (147 577 ინფიცირებული, 18 849 გარდაცვლილი, ესპანეთსა (157 053 ინფიცირებული, 15 970 გარდაცვლილი) და საფრანგეთში (124 869 ინფიცირებული, 13 197 გარდაცვლილი).
დიდი ბრიტანეთი: კიდევ ერთი საკარანტინო კვირა
პრემიერ-მინისტრი ბორის ჯონსონი ინტენსიური თერაპიის პალატიდან ჩვეულებრივში გადაიყვანეს. თუმცა, ექიმები აფრთხილებენ, რომ სამუშაოს ერთ თვეზე ადრე ვერ დაუბრუნდება.
ჯონსონის ორსული ცოლი, რომელიც ასევე დაინფიცირდა კორონავირუსით, თავს დამაკმაყოფილებლად გრძნობს.
11 აპრილისთვის დიდ ბრიტანეთში, კორონავირუსით ინფიცირებული 73 758 ადამიანი ჰყავთ, რომელთაგან 9 958 გარდაიცვალა.
პრემიერ-მინისტრის მოვალეობის შემსრულებელმა, საგარეო საქმეთა მინისტრმა დომინიკ რააბმა განაცხადა, რომ კარანტინის მოხსნა და ცხოვრების ნორმალური რეჟიმში დაბრუნება ეტაპობრივად მოხდება სხვადასხვა ასაკობრივი ჯგუფისა და ტერიტორიისთვის.
მისი თქმით, ექსპერტები ახლა ასეთ გეგმაზე მუშაობენ და ეს ხელისუფლების მთავარი ამოცანაა.
ახალი ზელანდია – წარმატება სრულად დაკეტილ საზღვრებს მიღმა
ახალი ზელანდია, დაახლოებით, 5 მილიონამდე მოსახლით, კორონავირუსთან ბრძოლაში ერთ-ერთ საუკეთესო შედეგს აჩვენებს. ქვეყანამ ბევრზე ადრე – 20 მარტს – ჩაკეტა საზღვრები და გამოაცხადა მკაცრი კარანტინი.
უკანასკნელი 4 დღის განმავლობაში, ზედიზედ, ქვეყანაში იკლებს ვირუსით დაავადებულთა რაოდენობა. სულ დაინფიცირდა 1312 ადამიანი, მათგან გამოჯანმრთელდა 422, გარდაიცვალა 4.
„მე ფრთხილ ოპტიმიზმს განვიცდი“, – განაცხადა ახალი ზელანდიის პრემიერ-მინისტრმა.
