კომენტარი: გუშინდელ დღეზე შავი დღე საქართველოს არ ჰქონია
პაატა ზაქარეიშვილის კომენტარი
პოლიტოლოგმა პაატა ზაქარეიშვილმა ევროკავშირის გაფართოების ანგარიშის შეფასებისას განაცხადა, რომ “ქართული ოცნების“ მთავარი ამოცანა ძალაუფლების შენარჩუნებაა და ევროკავშირი “არ ადარდებს”. ექსპერტის განმარტებით, ხელისუფლება ყველაფერს აკეთებს იმისთვის, რომ ევროკავშირმა საბოლოოდ კიდევ უფრო მეტად გააღრმაოს ჩვენთან გაუცხოება.
მისივე თქმით, “ქართული ოცნება“ ევროკავშირის გაფართოების ანგარიშით კმაყოფილია, რადგან ეს მისთვის გამანადგურებელი არ არის იქამდე, სანამ ხალხი ქუჩაში “რეალურად და ნამდვილად” არ გამოვა.
ევროპის კომისიის 2025 წლის გაფართოების ანგარიშის მიხედვით, საქართველოს ევროკავშირთან ინტეგრაციის პროცესის საფუძვლები ბოლო წლის განმავლობაში მნიშვნელოვნად დასუსტდა. ანგარიშში აღნიშნულია, რომ მთავრობის გადაწყვეტილებამ პრაქტიკულად შეაჩერა გაწევრიანების პროცესი.
გაფართოების საკითხებში ევროკავშირის უმაღლესი კომისრის, მარტა კოსის განცხადებით, გაერთიანების წევრობის კანდიდატების ისტორიაში საქართველოს ყველაზე ცუდი ანგარიშის დასკვნა ჰქონდა.
პაატა ზაქარეიშვილი: “გვყავს 100 000 ადამიანი, რომლებიც პიკზე გამოდიან. მხოლოდ ხალხზეა დამოკიდებული და არავითარ ევროკავშირზე, ამერიკაზე, “მეგობარ აქტზე“, ჩინეთზე და რუსეთზე – მხოლოდ ქართველ ხალხზე, იმ 100 000 კაცზე, რომელიც ნახევარი დღით გამოდის და არა ორი კვირით. გვყავს 100-200 ადამიანი, რომელიც მთელი წელია ყოველ დღე გამოდიან. მათ გვერდზე გადადეს ყველაფერი და გამოდიან. ამასთან, გვყავს 100 000 ადამიანი, ამ კატეგორიის ადამიანები, რომელსაც ასევე არ უნდათ “ქართული ოცნება“. ეს ადამიანები 2-3 საათით გამოდიან. რა მოხდება, რომ 2 კვირით გამოვიდნენ – არა ერთი წლით ან თვით, არამედ 2 კვირით? ეს იქნება დამანგრეველი “ქართული ოცნებისთვის“ და აღმაშენებელი საქართველოსთვის.
ამ ფონზე, რუსეთი არის ძალაუფლების შენარჩუნების დამხმარე ფაქტორი. 2016 წლიდან 2020 წლამდე “ქართულ ოცნებას“ ჯერ კიდევ იმედი აქვს, რომ ევროპული კონტექსტით შეინარჩუნოს ძალაუფლება, მაგრამ მას შემდეგ, რაც 2022 წელს, რუსეთი უკრაინაში შეიჭრა, მგონი მკაფიოდ უთხრა, რომ თქვენთან თამაშის დრო არ არის, გქონდეს ძალაუფლება, მაგრამ მე მხარს მხოლოდ იმ შემთხვევაში დაგიჭერ, თუ მკაფიოდ ჩაჯდები რუსულ პოლიტიკაში.
პრაქტიკულად, სომხეთთან უკვე მეტს მუშაობენ. ერთი მატარებელი წინ არის, მაგრამ გაჩერებულია და მეორე უკან არის, მაგრამ მოძრაობს და ადრე თუ გვიან გაჩერებულ მატარებელს დაეწევა. საქართველო წინაა ვიზალიბერალიზაციით, კანდიდატის სტატუსით და ა.შ, სომხეთს ჯერ ეს არ აქვს, მაგრამ ის მოძრაობს. შეიძლება ძალიან მალე სომხეთმა გაასწროს თუ კანდიდატის სტატუსი და ვიზალიბერალიზაციაც მიიღო. ევროკავშირი დღეს მოძრავ სახელმწიფოზე დებს ფსონს.
განსაკუთრებით “ქართული ოცნების“ ამომრჩეველმა დაიმახსოვროს: როცა მოლდოვა გახდება ევროკავშირის სახელმწიფო, მაშინ შენთან შვილიშვილი უნდა მოვიდეს და სახეში შეგაფურთხოს, რადგან მას შენ შანსები დაუკარგე. გუშინდელ დღეზე შავი დღე საქართველოს არ ჰქონია ამ გლობალური კონტექსტიდან და ევროპული ინტეგრაციიდან გამომდინარე. რაც სულხან-საბამ ოდესღაც დაიწყო, გუშინ დამარცხდა და იმედია დროებით.
რაც ჩვენ გვინდა ის არ იქნება, მაგრამ რაც იქნება, ჩვენთვის საკმარისი არ იქნება. შეიძლება იყოს სანქციები, რომ ელიტას ვიზალიბერალიზაცია გაუუქმდეს. არ იქნება კარგი მათთვის, მაგრამ სიტუაციიდან გამოძვრებიან.“
