ოპოზიცია არჩევნებში ერთმანეთის ხმების დაცვაზე შეთანხმდა

ოცდასამმა ოპოზიციურმა პარტიამ 2020 წლის ოქტომბრის საპარლამენტო არჩევნებში ერთმანეთის ხმების დასაცავად სპეციალურ მემორანდუმს მოაწერა ხელი და ინტერპარტიული სამუშაო ჯგუფი შექმნა. 

პარტიები თანხმდებიან, რომ ერთმანეთის ხმების დაცვის საქმეში ყველა უნდა ჩაერთოს და “ქართულ ოცნებას” არჩევნების გაყალბების საშუალება არ უნდა მისცენ.

ოპოზიციური პარტიების ლიდერების განცხადებით, დეკლარაციაზე ხელმოწერა არჩევნების გაყალბების შესაძლებლობის ერთგვარი პრევენციაა. მათი განმარტებით, არჩევნების დღეს იმუშავებს სატელეფონო ცხელი ხაზი, სადაც არჩევნების დღეს მიმდინარე პროცესების შესახებ ინფორმაცია მოიყრის თავს. ერთმანეთთან კოორდინირებულად იმუშავებენ საარჩევნო კომისიის ოპოზიციური წევრები და დამკვირვებლებიც.

დეკლარაციაში აღნიშნულია, რომ ივანიშვილის ოლიგარქიული მმართველობა ქვეყნისთვის და მისი დემოკრატიული განვითარებისთვის უმძიმესი გამოწვევაა და რომ „ივანიშვილის რეჟიმის ხელშია მობილიზებული როგორც ადმინისტრაციული, ისე ფინანსური რესურსის დიდი ნაწილი, სახელმწიფო ინსტიტუტები კი საზოგადოების ნაცვლად მმართველი გუნდის ინტერესებს ემსახურება. 

• რაზე შეთანხმდნენ 8 მარტს ოპოზიცია და ხელისუფლება. რას ნიშნავს მოდელი 120/30?

ოპოზიციური პარტიები აპირებენ, კოორდინირებულად იმუშაონ ყველა ოლქში, მათ შორის იქაც, სადაც ერთმანეთის კონკურენტი კანდიდატები ჰყავთ: 

„პარტიების ამოცანა არა ცალკეული პოლიტიკური გემოვნების ამომრჩეველთა ხმების დაცვა, არამედ მთელი საარჩევნო პროცესის გამჭვირვალობისა და თითოეული მოქალაქის არჩევანის დაცვა იქნება.

ქვეყნის შიგნით, საარჩევნო პროცესისადმი ფართო საზოგადოებრივი მხარდაჭერასა და ხმების დაცვის მიზნით კოორდინაციასთან ერთად, ოპოზიციური პარტიები ვთანხმდებით, რომ ერთობლივად, შეთანხმებულად ვიმუშავებთ საერთაშორისო დამკვირვებლებთან, რათა არჩევნების ლეგიტიმურობის გარშემო არ გაჩნდეს კითხვის ნიშნები,“  – წერია დეკლარაციაში. 

“ჩვენ დავიცავთ არა მხოლოდ ჩვენი საკუთარი პარტიების ხმებს, არამედ თითოეული ამომრჩევლის ხმას, რათა არცერთი ხმა ივანიშვილმა არ მოიპაროს და ჩვენი ყველა თანამოქალაქის ხმა იყოს რეალურად ასახული სამართლიან არჩევნებში,” – აცხადებს “ნაციონალური მოძრაობის” ლიდერი, თინა ბოკუჩავა.

“30-მდე ოპოზიციური პარტია, პრაქტიკულად სრული სპექტრი, თანხმდება ერთმანეთის ხმების დაცვაზე და თანმხდება იმას, რომ ერთობლივი ძალისხმევით არ დაუშვებს არჩევნების გაყალბებას. რა თქმა უნდა, ეს არის ძალიან მძლავრი სიგნალი ოპოზიციის ერთობის შესახებ, ამ დოკუმენტს აქვს პრაქტიკული ღირებულება და მასში ასახული იქნება მექანიზმები, რომლითაც ოპოზიცია ხმებს დაიცავს,” – ამბობს “ევროპული საქართველოს” წევრი, დავით ბაქრაძე. 

ხმების დაცვის შესახებ ოპოზიციის მემორანდუმზე ხელის მოწერაზე უარი თქვა  “ჩვენი საქართველო –  სოლიდარობის ალიანსმა”. 

“ნებისმიერი ამომრჩევლის მიერ, თუნდაც ჩვენი პარტიისთვის სრულიად მიუღებელი პოლიტიკური ძალის სასარგებლოდ, გაკეთებული არჩევანი და მიცემული ხმა უნდა იყოს დაცული, რაც არის საფუძველი არჩევნებზე ნების თავისუფალი გამოხატვისა. ამიტომ მიგვაჩნია, რომ უკლებლივ ყველა პარტიისთვის ეს უნდა წარმოადგენდეს მორალითა და დემოკრატიის უნივერსალური პრინციპებით ნაკარნახევ ვალდებულებას და არა შეთანხმების შედეგად ერთმანეთის მიმართ აღებულ პასუხისმგებლობას. ამიტომ ვერ ვხედავთ ჩვენი მხრიდან მემორანდუმის ხელმოწერის აუცილებლობას”, – ნათქვამია “ჩვენი საქართველო – სოლიდარობის ალიანსის” მიერ გავრცელებულ განცხადებაში.

დეკლარაციას ხელს აწერენ პარტიები:

“ახალი საქართველოსთვის”, “გამარჯვებული საქართველო”, “სტრატეგია აღმაშენებელი”, “გირჩი”,  “ევროპული საქართველო”, “ნაციონალური მოძრაობა”, “ემსახურე საქართველოს”, “ერთიანი საქართველო – დემოკრატიული მოძრაობა”, ედპ, “ჩვენ თვითონ”, მოძრაობა “სახელმწიფო ხალხისთვის”, “რესპუბლიკური პარტია, “ლელო”, “სამართლიანობისათვის”, “საქართველო ლიდერთა შორის”, “ლეიბორისტული პარტია”, “სამოქალაქო ალიანსი თავისუფლებისთვის”, პოლიტიკური მოძრაობა “ტრიბუნა”, “ქრისტიან-კონსერვატიული პარტია, “ქრისტიან-დემოკრატიული მოძრაობა”, “საქართველოს პარლამენტართა საზოგადოება”, “ახალი ქრისტიან-დემოკრატიული მოძრაობა”.

დეკლარაციას უერთდება კახა კუკავაც, თუმცა, ის დღევანდელ შეხვედრას ვერ დაესწრო.

2020 წლის 8 მარტს, ხელისუფლებასა და ოპოზიციას შორის მიღწეული შეთანხმების თანახმად, ოქტომბრის საპარლამენტო არჩევნები 120/30 მოდელით ჩატარდება: ამომრჩეველი 120 დეპუტატს პროპორციული წესით აირჩევს, ხოლო 30-ს – მაჟორიტარულ ოლქებში.