ნინოწმინდის პანსიონს ბავშვები ტოვებენ. საპატრიარქო სასამართლოს გადაწყვეტილებას ასაჩივრებს
სასამართლოს გადაწყვეტილების შემდეგ, ნინოწმინდის პანსიონი უკვე 26-მა ბავშვმა დატოვა. თუმცა საპატრიარქო ამ გადაწყვეტილებას ასაჩივრებს.
_______________________________
● სახელმწიფოს იქ არ უშვებენ. რა ხდება ნინოწმინდის ბავშვთა სახლში
____________________________________
“გუშინ 6 და დღეს კიდევ 20 ბავშვი გავიდა ბოროტების ბუნაგიდან! სახელმწიფო მიყვება სასამართლოს გადაწყვეტილებას და გაჰყავს ყველა ბავშვი. ეს ძალიან კარგია. ხვალ, მაქსიმუმ ზეგ, უნდა დასრულდეს ეს პროცესი. მერე, როცა სამშვიდობოზე გვეყოლება ბავშვები, სრულად უნდა ვორიენტირდეთ გამოძიებაზე”, – წერს ორგანიზაცია “პარტნიორობა ადამიანის უფლებებისთვის (PHR)” იურისტი ანა აბაშიძე.
PHR არის ის ორგანიზაცია, რომელმაც სასამართლოს პანსიონიდან ბავშვების გამოყვანის მოთხოვნით მიმართა.
მოსამართლე ივანე ღლონტმა 5 ივნისს დააკმაყოფილა ორგანიზაციის სარჩელი. შესაბამისად, ნინოწმინდის პანსიონიდან ყველა ბავშვი უნდა გამოიყვანონ და ისინი მიმღებ ოჯახებთან ან საოჯახო ტიპის თავშესაფრებში გადაიყვანონ.
ორგანიზაციამ სასამართლოს წარუდგინა სხალთელი მთავარეპისკოპოსის, სპირიდონის მიერ გავრცელებული ვიდეომასალა, რომელშიც კარგად ჩანს ბავშვების სახეები.
იურისტების, ანა არგანაშვილის და ანა აბაშიძის თქმით, ეს ვიდეო ადასტურებს, რომ ბავშვების სიცოცხლე და ჯანმრთელობა საფრთხის ქვეშაა.
პანსიონის მოსწავლეების ფსიქოლოგიური და ფიზიკური შეურაცხყოფის შესაძლო ფაქტების შესახებ ინფორმაცია დიდი ხანია მედიაში აქტიურად განიხილება. საქართველოს სახალხო დამცველის აპარატის თანამშრომლები, რომლებიც პასუხისმგებელნი არიან ნებისმიერი დახურული დაწესებულების მონიტორინგზე, სხვა სამთავრობო დეპარტამენტებთან ერთად, პანსიონში არ დაიშვებიან.
მიზეზი მაღალი რანგის სასულიერო პირის – სხალთის მთავარეპისკოპოსის, მეუფე სპირიდონის ბრძანება იყო, რომელიც იმავდროულად ამავე პანსიონის რექტორია.
თვით მეუფემ, რომელმაც ვიდეომიმართვა ჩაწერა, თავისი უარი შემდეგნაირად განმარტა:”ეს ის ხალხია, ვინც ოფიციალურად ითხოვს ერთსქესიანთა ქორწინების დაკანონებას.”
წინა კვირას ნინო ლომჯარიამ პროკურატურისგან შეიტყო, რომ ბოლო ხუთი წლის განმავლობაში შინაგან საქმეთა სამინისტრომ დაიწყო ოთხი გამოძიება ნინოწმინდის სკოლა-პანსიონის აღსაზრდელების მიმართ ძალადობის სავარაუდო ფაქტებზე, მათ შორის – სექსუალური ძალადობის შესახებ.
ამის შემდეგ შინაგან საქმეთა სამინისტრომ მორიგი შემოწმება დაიწყო. ამჯერად, გამოძიება საქართველოს სისხლის სამართლის კოდექსის 126-1 მუხლით დაიწყო, რაც არასრულწლოვანების მიმართ ძალადობას გულისხმობს.
ფაქტობრივად არ დარჩენილა არასამთავრობო ორგანიზაცია და პოლიტიკური ჯგუფი, რომელიც ნინოწმინდის პანსიონის ამბებს არ გამოეხმაურა. ამავე დროს, იმართება საპროტესტო აქციები მთავრობის კანცელარიასთან და პროკურატურასთან. 3 ივნისს ერთ-ერთ ასეთ აქციაზე პოლიციამ 9 ადამიანი დააკავა.
რას ამბობს სახალხო დამცველი
სახალხო დამცველის, ნინო ლომჯარიას განცხადებით, ის ნინოწმინდის პანსიონიდან წამოსულ 6 არასრულწლოვანს ესაუბრა, რომლებმაც ფიზიკური დასჯისა და ფსიქოლოგიური ძალადობის ფაქტები გაიხსენეს.
“დღეს შევხვდი ნინოწმინდის ბავშვთა პანსიონის 6 აღსაზრდელს, რომლებიც საკუთარი სურვილით გადავიდნენ ალტერნატიულ ზრუნვაში. ყველა მათგანი მშვიდ და უსაფრთხო გარემოში იმყოფება, შეუფერხებლად მიეწოდებათ მხარდამჭერი სერვისები. ბავშვების ინფორმაციით, ისინი თავს გრძნობენ კარგად და ახალ გარემოსთან და სხვა ბავშვებთან შეგუება არ გაჭირვებიათ.
არასრულწლოვანებმა ჩემთან დეტალურად ისაუბრეს ნინოწმინდის პანსიონში გატარებულ წლებზე. გაიხსენეს ფიზიკური დასჯის და ფსიქოლოგიური ძალადობის ფაქტები, რასაც, მათი თქმით, მეტწილად მცირეწლოვნების პერიოდში ჰქონდა ადგილი.
ამ ეტაპზე, განსაკუთრებით მნიშვნელოვანია, რომ პირველ რიგში, დეტალურად შეფასდეს ყველა ბავშვის ბიოლოგიურ ოჯახში არსებული მდგომარეობა, დაიგეგმოს მათი ოჯახებში შესაძლო დაბრუნება და გადაიდგას ნაბიჯები ოჯახების გაძლიერების მიმართულებით”, – წერს ლომჯარია.
“ჩვენ არ უნდა დავემონოთ და არ უნდა დავემორჩილოთ ლიბერალებს” – სამღვდელოება სასამართლოს წინააღმდეგ
საქართველოს საპატრიარქო ნინოწმინდის პანსიონზე სასამართლოს გადაწყვეტილებას გაასაჩივრებს.
საპატრიარქოს განცხადებით, ნინოწმინდის პანსიონში სახალხო დამცველის შესვლასთან დაკავშირებული პრობლემები მათთვის არავის უცნობებია და ეს მათ მედიიდან შეიტყვეს.
საპატრიარქო მიიჩნევს, რომ მოსამართლე ივანე ღლონტის გადაწყვეტილება უნდა გასაჩივრდეს, რადგან პროცესზე შესაბამისი მტკიცებულებები წარმოდგენილი არ ყოფილა.
“ამასთან, ვაცხადებთ, რომ გავასაჩივრებთ სასამართლო გადაწყვეტილებას, რომელიც ეხება ნინოწმინდის პანსიონიდან ბენეფიციართა გამოყვანის პროცესს, რადგან სასამართლოზე წარმოდგენილი არ ყოფილა შესაბამისი მტკიცებულებები იქ მყოფ არასრულწლოვანებზე უღირსი მოპყრობის და ძალადობის დამადასტურებელი ფაქტების შესახებ; აგრეთვე, პანსიონის ადმინისტრაციას და პერსონალს არ მისცემია შესაძლებლობა, დაეფიქსირებინათ საკუთარი პოზიცია”, – წერია მათ განცხადებაში.
მათივე შეფასებით, პანსიონიდან ბენეფიციარების გაყვანის დაჩქარებული პროცესი არ შეესაბამება ბავშვების საუკეთესო ინტერესს.
“ჩვენი პოზიციით, გადაყვანის დაუსაბუთებელი და ნაჩქარევი პროცესი მხოლოდ დააზარალებს აღსაზრდელებს და წინააღმდეგობაში მოდის მათი უფლებების სათანადო დაცვასთან.”
___________________________________
● სახალხო დამცველი: ნინოწმინდის პანსიონზე გამოძიება გაუპატიურების მუხლითაც მიმდინარეობს
● “გააღე პანსიონის კარი!” – მთავრობის ადმინისტრაციასთან აქტივისტებმა აქცია გამართეს
__________________________________
ნინოწმინდის პანსიონის მოვლენებს გამოეხმაურა ჭყონდიდელი მიტროპოლიტი სტეფანეც. მან საკვირაო ქადაგება ლგბტქ ადამიანების დისკრედიტაციას და მათ მიმართ სიძულვილის გამოხატვას მიუძღვნა.
მან გააკრიტიკა სასამართლოს გადაწყვეტილება და ბავშვების პანსიონიდან გაყვანის შესახებ თქვა: “კანონის უზენაესობა ღმერთის უზენაესობას ეწინააღმდეგება”. ამასთან, მეუფე სტეფანემ მრევლს მოუწოდა, “არ დაემორჩილონ იმ კანონებს, რომლებიც ქრისტიანობას ეწინააღმდეგება”.
“ჩვენ არ უნდა დავემონოთ და არ უნდა დავემორჩილოთ ლიბერალებს. არც იმ ცრუ კანონებს, რომლებიც ქრისტიანობის საწინააღმდეგოა.
დაეტაკნენ ნინოწმინდის ბავშვთა დაწესებულებას ცრუ ბრალდებებით. ვერავინ ვერაფერს ამტკიცებს, მაგრამ წამოენთნენ ისინი, ვინც არიან ლიბერალების გამტარებლები ყველა მიმართულებით. დაიწყეს აგიტაცია-პროპაგანდა, როგორც კომუნისტების და ფაშისტების დროს. მიდის თავდასხმა ღირებულებებზე, თან ვითომ ძალადობას ებრძვიან და თვითონ ძალადობენ, ისე ძალადობენ, რომ ამის გამო ბავშვებს სტრესი აქვთ.“
რაც შეეხება პანსიონის ხელმძღვანელს, სხალთელმა ეპისკოპოსმა სპირიდონმა აღნიშნა, რომ იძულებულია, სასამართლოს გადაწყვეტილებას დაემორჩილოს.
“მაგრამ არ არის სწორი ეს, რადგან იქ წერია, რომ საშიში მდგომარეობაა ბავშვებისთვის და სასწრაფოდ მოაცილეთ აქაურობას შეზღუდული შესაძლებლობის მქონე ბავშვებიო და რას დაეყრდნო მოსამართლე? დაეყრდნო იმ არასამთავრობოების ცილისმწამებლურ განცხადებებს, რომ თითქოს აქ რაღაც ცუდი ხდება”, – აცხადებს სპირიდონი.
____________________________________
● დასავლეთი თუ რუსეთი? საით მიჰყავს ქვეყანა ქართულ ეკლესიას
● კორონავირუსი და ბოლო ჟამის ეკლესია. საუბარი გია ნოდიასთან და ბექა მინდიაშვილთან
____________________________________
