ნიკა გვარამიას პოლიტიკური გეგმები. ვინ იქნებიან მისი გუნდის წევრები და მოკავშირეები
ნიკა გვარამიას პოლიტიკური გეგმები
“მთავარი არხის” ყოფილი გენერალური დირექტორი ნიკა გვარამია ახალ პოლიტიკურ გაერთიანებას ოფიციალურად მარტში დააფუძნებს. უკვე ცნობილია, რომ მას ერქმევა “ახალი”.
ჯერჯერობით მომავალი პარტიის არც გუნდი და არც სავარაუდო პოლიტიკური პარტნიორები ცნობილი არ არის, თუმცა, სააკაშვილის ყოფილი თანაგუნდელის და მთავარი ოპოზიციური არხის დამფუძნებლის გეგმები რომ 2024 წლის არჩევნებს უკავშირდება, ეს უკვე ცხადია.
ℹ️ საპარლამენტო არჩევნები საქართველოში 2024 წლის შემოდგომაზე გაიმართება. საქართველო საპარლამენტო რესპუბლიკაა, ამიტომ ის, ვინც გაიმარჯვებს ამ არჩევნებში, მომავალი ოთხი წლის განმავლობაში ქვეყნის მართვის სადავეებს გადაიბარებს. უკვე მე-12 წელიწადია, რაც საქართველოს პარტია “ქართული ოცნება” მართავს, რომლის დამფუძნებელია ქვეყნის უმდიდრესი ადამიანი, მილიარდერი ბიძინა ივანიშვილი დგას. 2012 წელს “ქართულმა ოცნებამ” არჩევნებით ჩაანაცვლა მიხეილ სააკაშვილის “ნაციონალური მოძრაობა”. მართალია ივანიშვილს არავითარი ოფიციალური თანამდებობა არ უკავია, მაგრამ არც ქვეყნის შიგნით და არც მის ფარგლებს გარეთ ეჭვი არავის ეპარება, რომ სწორედ ივანიშვილია ქვეყნის არაფორმალური მმართველი.
გუნდი და პარტნიორები
გვარამიამ ფეისბუკზე გააზიარა ფოტო, სადაც იგი ახალგაზრდა აქტივისტების და არასამთავრობო სექტორის წევრების გარემოცვაშია. ტელევიზიის ყოფილმა შეფმა ისინი წარადგინა, როგორც ახალი გუნდის წევრები. როგორც გვარამია ამბობს, ფოტოზე სამუშაო პროცესია აღბეჭდილი – დიქტატორული რეჟიმების შეცვლის გამოცდილებას განიხილავენ.
ფოტოზე ბევრი ახალი სახეა, არც თუ ისე კარგად ნაცნობი ფართო საზოგადოებისთვის. გვარამია ამბობს, რომ აქვს ამბიცია, პოლიტიკაში ახალი თაობა მოიყვანოს. გაერთიანების სახელწოდება – “ახალიც” სწორედ აქედან მოდის.
“ტვ პირველთან” ინტერვიუში მან თქვა, რომ გუნდის შემადგენლობას უკვე მარტის დასაწყისისთვის გამოაცხადებს.
მეორე მნიშვნელოვანი კითხვა, რაც გვარამიასთან მიმართებაში არსებობს არის ის, თუ რომელ პოლიტიკურ პარტიასთან აპირებს ის თანამშრომლობას.
ℹ️ ყველა კვლევა აჩვენებს, რომ არც ერთ ოპოზიციურ პარტიას არ აქვს ისეთი მაღალი რეიტინგი, რომ დამოუკიდებლად, კოალიციური გაერთიანების გარეშე შეძლონ მთავრობის ფორმირება. ამდენად, კითხვა, თუ ვინ ვისთან აპირებს პოლიტიკურ თანამშრომლობას, ქართულ პოლიტიკაში დღეს აქტუალურია.
IRI-ს ბოლო კვლევით, რომელიც 2023 წლის დეკემბერში გამოქვეყნდა, “ქართულ ოცნებას” 25% , “ნაციონალური მოძრაობას” 13%, გიორგი გახარია – საქართველოსთვის: 4% ; სტრატეგია აღმაშენებელი – 3%; ლელო – 2%; გირჩი – მეტი თავისუფლება და დროა – 2%.
გვარამიას ამ კითხვაზე პასუხი ჯერ არა აქვს. თუმცა, ის ასახელებს კონკრეტულ პარტიებს და პოლიტიკოსებს, ვისთანაც კონსულტაციები აქვს.
ეს არის”ნაციონალური მოძრაობის” ყოფილი თავმჯდომარე ნიკა მელია, რომელიც ამ პარტიიდან შიდა დაპირისპირების შემდეგ წამოვიდა. ასევე, ელენე ხოშტარიას და ზურაბ ჯაფარიძის პოლიტიკურ გაერთიანება “დროა-გირჩი” და თიბისი ბანკის დამფუძნებლის, ბიზნესმენ მამუკა ხაზარაძის “ლელო”. ასევე გვარამიამ სასურველ პოლიტიკურ პარტნიორად ყოფილი სახალხო დამცველი ნინო ლომჯარია დაასახელა.
როგორც გვარამია ამბობს, ამ პარტიებს მხოლოდ ერთად შეუძლიათ პრობლემები შეუქმნან “ქართულ ოცნებას”:
“ჯამურად, ამ აქტორებს, პლუს, ცალკეულ ადამიანებს, ვისაც აქვს პოლიტიკური და სოციალური კაპიტალი, შეგვიძლია ვიყოთ 25 პროცენტს ზემოთ. მე ამბიცია და პრეტენზია მაქვს, რომ ერთობა, თუ ჩვენ ამას შევძლებთ, იქნება ყველაზე უფრო მსხვილი კონკურენტი ქართული ოცნების,“ – ამბობს გვარამია.
თავად დასახელებულ პოლიტიკოსებს საჯაროდ ჯერ არ გაუკეთებიათ განცხადება, აპირებენ თუ არა გვარამიასთან სამომავლო თანამშრომლობას.
გვარამიას პოზიცია გახარიაზე
გვარამიას განცხადებით, სამომავლო კოალიციაში ის ასევე ხედავს საქართველოს ყოფილი პრემიერ-მინისტრის გიორგი გახარიას პარტიასაც. მისი თქმით, გახარიას წარსულთან მიმართებით კითხვების დასმას ის ამ ეტაპზე არ აპირებს.
ℹ️ ოპოზიციაში ბიძინა ივანიშვილის ყოფილი ფავორიტი, საქართველოს ყოფილი პრემიერ-მინისტრი გიორგი გახარია კონტრავერსიული ფიგურაა. გახარია იყო შინაგან საქმეთა მინისტრი ე.წ. გავრილოვის ღამის დროს, როდესაც სპეცრაზმმა რუსთაველის გამზირზე მშვიდობიანი მომიტინგეები დაარბია. დაშავდა ათეულობით მომიტინგე. ორმა ადამიამა, მათ შორის 18 წლის მაკო გომურმა თვალი დაკარგა. ამის გამო ბევრი ოპოზიციური პარტია, როგორც მინიმუმ ამ ეტაპზე, ღიად არ ამბობს, რომ გახარიასთან ითანამშრომლებს.
“გახარიასთან დაკავშირებით, მგონი, ერთადერთი ადამიანი ვარ ოპოზიციური სპექტრიდან, ვინც გაბედა და ეს თქვა, “ – ამბობს გვარამია.
მისი თქმით, გახარიასთან მისი მთავარი კითხვა არა წარსულს, არამედ მომავალს უკავშირდება: რა გადაწყვეტილებას მიიღებს გახარია, თუკი არჩევნების შედეგების მიხედვით, მისი პოზიცია გადამწყვეტი იქნება კოალიციის შესაქმნელად – ვისთან შექმნის კოალიციას – ხელისუფლებასთან თუ ოპოზიციასთან.
„ალბათ გახარიასაც აქვს ჩემთან დაკავშირებით წარსულზე შეკითხვები. მე მასაც და ყველა დანარჩენს ვთავაზობ, წარსულზე ვილაპარაკოთ, უსაფრთხო მომავალში როცა ვიქნებით. დღეის მდგომარეობით, ჩვენ წარსულზე ლაპარაკით შეიძლება, მომავალი დავკარგოთ და ჩავრჩეთ ამ ტალახიან აწმყოში,” – განაცხადა გვარამიამ „ტვ პირველის“ ეთერში.
გახარიას პარტიამ პასუხად განაცხადა, რომ ისინი წინასაარჩევნოდ არც ერთ პოლიტიკურ სუბიექტთან გაერთიანებას არ აპირებენ. #ნუგვეტენებით – წერს სოციალურ ქსელში პარტიის ერთ-ერთი ლიდერი მიხეილ დაუშვილი.
“ნაციონალურ მოძრაობაზე” და მიხეილ სააკაშვილზე
მიუხედავად იმისა, რომ მიხეილ სააკაშვილი თითქმის სამი წელია პატიმრობაშია, მისი ფიგურა კვლავ გადამწყვეტ როლს ასრულებს ოპოზიციური ფლანგზე მიმდინარე პოლიტიკურ პროცესებში.
მისი პარტია “ნაციონალური მოძრობა”, რომელიც მანამდე 9 წელი მართავდა ქვეყანას, ოპოზიციაში ყოფნის დროს მარტივ მამრავლებად დაიშალა. სწორედ ამ პარტიის ყოფილი წევრები ქმნიან დღეს ოპოზიციური სპექტრის მნიშვნელოვან ბირთვს.
ნიკა გვარამიაც მიხეილ სააკაშვილის ახლო გარემოცვის წევრი და მისი თანაგუნდელია. თუმცა, დღეს გვარამია ემიჯნება “ნაციონალურ მოძრაობას” და ამბობს, რომ ეს პარტია დღეს მისთვის მიუღებელია.
“ამ წუთში [ენმ-ში] არაფერი არ მომწონს, გარდა სწორი საგარეო პოლიტიკური ვექტორისა… ჩემთვის “ნაციონალური მოძრაობის” მთავარი ფაქტორი არის მიშა სააკაშვილი… ახლაც ასეა, მაგრამ მიშას მიღმა რაც ხდება… ჩემთვის პრობლემატურია… მე მათ ხმას არ მივცემ პირველად ჩემი პოლიტიკური ბოლო წლების ისტორიის განმავლობაში,“ – ამბობს გვარამია.
მისი თქმით, აზრთა სხვადასხვაობაა ასევე მასა და მიხეილ სააკაშვილის ხედვებს შორის.
„მნიშვნელოვან საკითხებში ვეთანხმებით ერთმანეთს, თუმცა რაღაც სტრატეგიების ფარგლებში ეს ვერ ხდება, ბუნებრივია, და ტაქტიკურ საკითხებში თანხვედრები შეიძლება არ იყოს, მე ამაში პრობლემას ვერ ვხედავ,“ – აცხადებს ნიკა გვარამია “ტვ პირველის” ეთერში.
“მიშას თავისი პარტია აქვს, ჯერჯერობით, ყველაზე დიდი ოპოზიციური პარტია, მე მიმაჩნია, რომ სხვა მიმართულებით უნდა ვიარო,“ – ამბობს გვარამია.
პრეზიდენტ ზურაბიშვილზე
ნიკა გვარამიას შეფასებით, სალომე ზურაბიშვილი უფრო აქტიურად უნდა ჩაერთოს პოლიტიკურ პროცესებში და ფასილიტატორის როლი შეითავსოს.
“ეს რაღაც თვალსაზრისით ეს დაეხმარებოდა ოპოზიციას კოორდინირებულ ქმედებებში” – განაცხადა გვარამიამ, – მიუხედავად იმისა, რომ სალომე ზურაბიშვილს ძალიან მძიმე, ჩემს ხედვებთან სრულიად არათავსებადი განცხადებები აქვს გაკეთებული, მიუხედავად ამისა, მასთანაც შეკითხვები მექნებოდა მომავალზე,“ – ამბობს ნიკა გვარამია.
ყოფილი პროკურორი და მთავარი ჭკვიანი
პროფესიით იურისტი, ინტელექტ კლუბის “რა? სად? როდის?”-ის მოაზროვნე ნიკა გვარამია მიხეილ სააკაშვილის ხელისუფლების დროს საქართველოს გენერალური პროკურორის მოადგილის, იუსტიციის მინისტრის, განათლების მინისტრის პოსტებს იკავებდა.
“ქართული ოცნების” მოსვლის შემდეგ, 2012 წლის ნოემბრიდან გვარამია იმ დროისთვის ოპოზიციის კონტროლის ქვეშ მყოფ არხს, “რუსთავი 2-ს” ჩაუდგა სათავეში და ქართულ მედია სივრცეში ერთ-ერთ ყველაზე გავლენიან და ამავე დროს კონტრავერსიულ ფიგურად იქცა.
მას შემდეგ, რა 2019 წლის ივლისში “რუსთავი 2” ევროსასამართლოს გადაწყვეტილებით ყოფილ მფლობელს, ქიბარ ხალვაშს დაუბრუნდა, გვარამიამ ზუსტად სამ თვეში ახალი სატელევიზიო არხის გახსნა მოახერხა.
“მთავარმა არხმა” 2019 წლის 9 სექტემბერს დაიწყო მაუწყებლობა. ხუთი წლის თავზე “მთავარი არხი” ქვეყანაში რეიტინგით მეორე (ზოგიერთი მთვლელის მიხედვით, მესამე) ადგილზეა პროსახელისუფლებო “იმედის” შემდეგ.
ამ ყველაფრის პარალელურად გვარამიას წინააღმდეგ სისხლის სამართლის საქმე იყო აღძრული. პროკურატურა ნიკა გვარამიას “რუსთავი 2-ი” დირექტორობის დროს, ტელეკომპანიის კუთვნილი ქონების გაფლანგვას, კომერციულ მოსყიდვას, ყალბი ოფიციალური დოკუმენტის დამზადებასა და გამოყენებას, ასევე უკანონო შემოსავლის ლეგალიზაციას ედავებოდა.
მაგალითად, ერთ-ერთი ეპიზოდის თანახმად, გვარამიას ედავებოდნენ კერძო კომპანიის, “რუსთავი 2”-ის სამსახურებრივი მანქანის საკუთარი ოჯახის საჭიროებებისთვის გამოყენებას. ნაჩვენები იყო გვარამიას ცოლის თვალთვალის კადრები, სადაც ჩანს, რომ ცოლს ამ მანქანით შვილები სკოლაში მიჰყავს.
2022 წლის 16 მაისს, ნიკა გვარამია სასამართლო დარბაზში დააპატიმრეს. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა სწორედ იმ ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
როგორც ოპოზიცია და ადგილობრივი არასამთავრობო ორგანიზაციები, ასევე საერთაშორისო აქტორები ერთხმად აცხადებდნენ, რომ გვარამია პოლიტიკური მოტივითაა დაკავებული.
“მთავარი არხის” დამფუძნებლის საქმე მოხვდა ამერიკის სახელმწიფო დეპარტამენტის ანგარიშშიც. დოკუმენტის ქვეთავებში, რომლებიც პოლიტიკურ პატიმრებსა და გამოხატვის თავისუფლება ეხება, საუბარია მთავარი არხის გენერალური დირექტორი, ნიკა გვარამიას დაკავების შესახებ.
თეთრი სახლი Amnesty International-ზე დაყრდნობით წერს, რომ გვარამიას საქმემ გამოავლინა “მთავრობის მზარდი გავლენა სასამართლოებზე რიგ საქმეებში”, რომლებიც მიზნად ისახავს მათი კრიტიკოსებისა და ოპონენტების დათრგუნვას.
ნიკა გვარამიას ციხიდან ერთ წელიწადსა და ერთ თვეში, 2023 წლის 22 ივნისს გამოვიდა. იგი პრეზიდენტმა ზურაბიშვილმა შეიწყალა. ეს შეწყალება ზურაბიშვილს კინაღამ პრეზიდენტობის დაკარგვად დაუჯდა – ზურაბიშვილის წინააღმდეგ 2023 წლის შემოდგომაზე “ქართულმა ოცნებამ” იმპიჩმენტის პროცედურა წამოიწყო. ექსპერტები აღნიშნავენ, რომ გვარამიას შეწყალება ერთ-ერთი მთავარი მიზეზი იყო, რის გამოც ხელისუფლება ზურაბიშვილის დასჯას ცდილობდა.
2023 წლის 29 ივნისს ჟურნალისტთა დაცვის კომიტეტმა (CPJ) ნიკა გვარამიას პრესის თავისუფლების საერთაშორისო ჯილდო მიანიჭა.
ამჟამად გვარამია “მთავარი არხის” გენერალური დირექტორი აღარ არის, ის ამ თანამდებობიდან ჯერ კიდევ ციხეში ყოფნის დროს გადადგა და პოსტი გიორგი გაბუნიას დაუთმო. მართალია, გვარამია ამბობს, რომ მთლიანად ჩამოშორდა არხის მენეჯმენტს, თუმცა მისი გავლენისა და არხზე ავტორიტეტის გათვალისწინებით, ეს ძნელი დასაჯერებელია.
“მთავარ არხზე” გვარამიას ამჟამად გადაცემა “მთავარი ჭკვიანი” მიჰყავს, რომელიც ბრიტანული ტელეთამაშის, Who Wants to Be a Millionaire?-ის ქართული ანალოგია.
გვარამია ასევე მუდმივად ხაზს უსვამს იმას, რომ მისი იდენტობის მნიშვნელოვანი ნაწილია მისი წარმომავლობა – იგი სოხუმშია დაბადებული და სკოლაც იქ დაამთავრა.
