ევროკავშირში საქართველოს ყოფილი ელჩი: NATO-ს კონტექსტში უკრაინისგან დაშორება რთული სანახავია

ნატალია საბანაძე NATO-ზე

ევროკავშირში საქართველოს ყოფილი ელჩი და საერთაშორისო საკითხებში გიორგი გახარიას მრჩეველი, ნატალია საბანაძე პალიტრანიუსთან საუბარში ამბობს, რომ NATO-ს კონტექსტში უკრაინისგან დაშორება რთული სანახავია. მისივე განმარტებით, საქართველომ სხვა ბანაკში გადაინაცვლა.

გამოცემა Frankfurter Allgemeine Zeitung-ის ცნობით, საქართველოს პრემიერმინისტრი ირაკლი ღარიბაშვილი ვილნიუსში NATO-ს სამიტზე არ მიიწვიეს, რადგან უკრაინაში ომის ერთ-ერთ მთავარ მიზეზად NATO-ს დასახელების შემდეგ ის, როგორც ალიანსმა თავად პრემიერს განუმარტა, “სასურველი სტუმარი არ იყო”.

საქართველოსა და NATO-ს შორის ურთიერთობების “სიმპტომს” უწოდებს გამოცემა იმ ფაქტს, რომ საქართველო ალიანსის სამიტზე პრემიერის სახით არაა წარმოდგენილი.

Frankfurter Allgemeine Zeitung-ის თქმით, ღარიბაშვილი სასურველი სტუმარი მას შემდეგ არაა, რაც ბრატისლავაში უსაფრთხოების კონფერენციაზე უკრაინაში ომის დაწყების “ერთ-ერთ მთავარ მიზეზად” NATO და მისი გაფართოება დაასახელა.

გამოცემის თქმით, ეს უკრაინაში ომის შესახებ რუსული ვერსიის მკაფიო გამეორება იყო.

“დღეს ჩვენი პრობლემა არის ის, რომ ძალიან ბევრი მეგობარი დავკარგეთ. იმ ხალხთან, რომლებიც ადრე ჩვენთვის იბრძოდნენ, დღეს სხვა დამოკიდებულება გვაქვს. დღეს ასევე ჩვენ გავუშვით უცნაური სიგნალი, იმით, რომ გავაგზავნეთ საგარეო საქმეთა მინისტრი და უფრო მაღალ დონეზე არ ვიყავით წარმოდგენილი [NATO-ს სამიტზე].

დღეს საქართველო რეალურად არ დგას უკრაინის მხარეს, უკრაინას მორალურ მხარდაჭერაზეა საუბარი, ისეთ მხარდაჭერას არ უცხადებს, რომელსაც მისგან ელიან და არ აჩვენებს, რომ არის ერთსულოვანი სხვა პარტნიორებთან ერთად. ეს არის დიპლომატიური ფონი, რომელმაც ალბათ გამიწვია ის, რომ საქართველო ჩამოშორდა.

ჩვენ ეს არ უნდა დაგვეშვა, ეს შეიძლება სხვას გადააბრალო, მაგრამ, მე მგონი, ეს არ იქნება სწორი. ჩვენ ეს რომ არ დაგვეშვა, ალბათ ასე არ იქნებოდა. განსაკუთრებით რთული სანახავია NATO-ს კონტექსტში უკრაინისგან დაშორება და ჩვენ აღმოვჩნდით ბოსნიის და მოლდოვას გვერდით, ასე ვთქვათ, სხვა ბანაკში გადავინაცვლეთ.” – აცხადებს საბანაძე.

● ზურაბ ბატიაშვილის მოსაზრება: საქართველო, რომელიც თავის დროზე რეფორმების მედროშე იყო, ახლა ყველაზე ჩამორჩენილ ჯგუფშია
● “იმედგაცრუებული ვართ, რომ საქართველო სანქციებს არ ასრულებს, თუმცა გვესმის” – რა თქვა სანქციების ოფისმა
● 85% ნატოში გაწევრიანებას უჭერს მხარს, 90% ევროკავშირში. Edison Research-ის კვლევის მთავარი მიგნებები

11 ივლისს, NATO-მ ვილნიუსის სამიტის პირველი დღის დასრულების შემდეგ კომუნიკე გამოაქვეყნა, რომელშიც აღნიშნულია, რომ ალიანსი “ადასტურებს 2008 წლის ბუქარესტის სამიტზე მიღებულ გადაწყვეტილებას”, რომ საქართველო გახდება ალიანსის წევრი წევრობის სამოქმედო გეგმით, MAP-ით, რაც პროცესის განუყოფელი ნაწილია.

კომუნიკეში ასევე ვკითხულობთ:

● ევროატლანტიკური მისწრაფებების წინსვლისთვის საქართველომ უნდა მიაღწიოს პროგრესს რეფორმებში, მათ შორის საკვანძო დემოკრატიულ რეფორმებში და წლიური ეროვნული პროგრამა მაქსიმალურად გამოიყენოს.

● NATO მტკიცედ უჭერს მხარს საქართველოს უფლებას, განსაზღვროს საკუთარი მომავალი და საგარეო პოლიტიკური კურსი გარე ძალების ჩარევის გარეშე.

● NATO მხარს უჭერს საქართველოს ტერიტორიული მთლიანობისა და სუვერენიტეტისადმი საერთაშორისოდ აღიარებულ საზღვრებში. 

● NATO მოუწოდებს რუსეთის ფედერაციას გაიყვანოს თავისი ჯარი, რომელიც საქართველოში თანხმობის გარეშე განათავსა. 

● ასევე, ალიანსი მოუწოდებს რუსეთს, უკან გაიწვიოს საქართველოს რეგიონების, აფხაზეთისა და სამხრეთ ოსეთის აღიარება, შეწყვიტოს ამ რეგიონების მილიტარიზაცია და საზღვრის დაწესების, საქართველოსგან მათი იძულებით გამოყოფის მცდელობები.