NASA-მ დედამიწის მსგავსი 7 პლანეტა აღმოაჩინა
ამერიკის შეერთებული შტატების აერონავტიკისა და კოსმოსური სივრცის კვლევის სამმართველომ (NASA) განაცხადა, რომ აღმოჩენილ იქნა დედამიწის ზომის პლანეტები, მზის სისტემიდან 40 სინათლის წელიწადის მანძილზე მდებარეობს.
BBC-ცნობით, პლანეტები წითელი ჯუჯა ვარსკვლავის, TRAPPIST-1-ის ორბიტაზე იქნა აღმოჩენილი. თითოეული მათგანი დედამიწის ზომისაა, სამი მათგანი კი TRAPPIST-1-ის გარშემო ე.წ. „დასახლების ზონაში“ მოძრაობს და, თეორიულად, არსებობს იმის ალბათობა, რომ მათზე სიცოცხლე არსებობს.
“მეორე დედამიწის აღმოჩნაზე საუბრისას უმჯობესი იქნება ვიკითხოთ, თუ როდის აღმოვაჩენთ ასეთ პლანეტას. ეჭვს არ იწვევს, რომ ადრე თუ გვიან, მეორე დედამიწას აღმოვაჩენთ“, – განაცხადა „ნასას“ სამეცნიერო მისიების დირექტორთა საბჭოს მოადგილემ, თომას ცურბიუხენმა ვაშინგტონში გამართულ პერესკონფერენციაზე.
ასტრონომების თქმით, ამ ეგზოპლანეტების აღმოჩენა კოსმოსურ ტელესკოპ „სპიტცერის“ საშუალებით მოხერხდა. მათი აზრით, ეს აღმოჩენა ყველაზე მნიშვნელოვანია იმ დაკვირვებს შორის, რომლებიც ამ ტელესკოპის გამოყენებით ხორციელდება.
რას ნიშნავს „ეგზოპლანეტა“?
ეგზოპლანეტებად მზის სისტემის საზღვრებს გარეთ მდებარე პლანეტებს მოიხსენიებენ. პირველი ასეთი ციური სხეული 1992 წელს აღმოაჩინეს. სინამდვილეში ეგზოპლანეტები ტელესკოპში არ ჩანს. ამ ტიპის პლანეტებს ვარსკვლავების მოძრაობისა და გამოსხივების უმცირესი ცვლილებების წყალობით პოულობენ. ამ ცვლილებებს კი საკუთრივ ვარსკვლავის გარშემო მოძრავი პლანეტები განაპირობებენ. თითოეული ამ პლანეტის მასასა და ზომას ზუსტი გამოთვლების საშუალებით ადგენენ. ტექნოლოგიების განვითარების წყალობით, აღმოჩენილი პლანეტების რაოდენობა განუხრელად იზრდება. ამ საქმეში ნამდვილი გარღვევა 2009 წელს მოხდა, როდესაც დედამიწის ორბიტაზე უმძლავრესი კოსმოსური ტელესკოპი, „კეპლერი“ განათავსეს. მისი საშუალებით ათასზე მეტი ეგზოპლანეტა იქნა აღმოჩენილი. ამჟამად სულ 3500 ეგზოპლანეტაა რეგისტრირებული.
„ჰყავს“ თუ არა დედამიწას „ორეულები“?
მეცნიერების განსაკუთრებულ ყურადღებას იპყრობენ ე.წ. „სიცოცხლის ზონაში“ მდებარე ეგზოპლანეტები. ასეთ სივრცეში მდებარე პლანეტაზე არსებული ტემპერატურა ერთგვარ წინაპირობას ქმნის იმისათვის, რომ მასზე წყალი არსებობდეს (თხევადი ფორმით). ამას გარდა, პლანეტას უნდა ჰქონდეს მყარი ზედაპირი და საკმარისი მასა იმისთვის, რათა ატმოსფერო შეინრჩუნოს. დედამიწის ტიპის პლანეტის („დედამიწა 2.0“-ის) აღმოჩენის შესახებ „ნასას“ მეცნიერებმა პირველად 2015 წლის ივლისში განაცხადეს. საუბარია პლანეტაზე სახელწოდებით Kepler 452b, რომელიც დედამიწიდან 1400 სინათლის წელიწადითაა დაშორებული. მას, შესაძლოა, ატმოსფერო ჰქონდეს და არ არის გამორიცხული, რომ მის ზედაპირზე თხევადი წყალი არსებობდეს. აღმოჩენილი პლანეტის მასა დედამიწის მასას 1,5-ჯერ აღემატება. 2016 წლის აგვისტოში სპეციალისტებმა კიდევ ერთი სენსაციური აღმოჩენის შესახებ განაცხადეს. აღმოჩნდა, რომ დედამიწის ტიპის კიდევ ერთი პლანეტა, ფაქტობრივად, ჩვენს მეზობლად მდებარეობს. საუბარია მზის სისტემის უახლოეს ვარსკვლავის, წითელ ჯუჯა პროქსიმა ცენტავრას სისტემაზე, რომელშიც დედამიწის ტიპის პლანეტა იქნა აღმოჩენილი. მანძილი ამ პლანეტამდე „სულ რაღაც“ 4,2 სინათლის წელიწადია. არ არის გამორიცხული, რომ ამ ციურ სხეულებზე სიცოცხლე არსებობდეს. თუმცა, უნდა აღინიშნოს, რომ მეცნიერებს ჯერ კიდევ არ აქვთ მტკიცებულებები, რომლებიც კოსმოსურ სივრცეში სიცოცხლის არსებობას დაადასტურებდა.
