მზია ამაღლობელს ბრალი გადაუკვალიფიცირეს და ორწლიანი პატიმრობა მიუსაჯეს
მზია ამაღლობელის განაჩენი
გამოცემების “ბათუმელებისა” და “ნეტგაზეთის” დამფუძნებელს, ჟურნალისტ მზია ამაღლობელს ბათუმის საქალაქო სასამართლოს მოსამართლე ნინო სახელაშვილმა ბრალი გადაუკვალიფიცირა და ორწლიანი პატიმრობა მიუსაჯა.
მზია ამაღლობელს პოლიციელისთვის სილის გაწვნის გამო, პოლიციელზე თავდასხმას ედავებოდნენ. მას ბრალი სისხლის სამართლის კოდექსის 353-ე პრიმა მუხლით ჰქონდა წაყენებული, რაც ოთხიდან შვიდ წლამდე პატიმრობას ითვალისწინებს.
განაჩენის გამოცხადების დღეს, მოსამართლემ ბრალი გადააკვალიფიცირა – სისხლის სამართლის 353-ე მუხლის პირველი ნაწილით, – პოლიციელიისთვის წინააღმდეგობის გაწევა.
სანქცირებულ მოსამართლე ნინო სახელაშვილს განაჩენის გამოსაცხადებლად მხოლოდ რამდენიმე წუთი დასჭირდა.
“მზია ამაღლობელის მიმართ საქართველოს სსკ-ის 353 პრიმა მუხლის პირველი ნაწილით წარდგენილი ბრალდება გადაკვალიფიცირდეს საქართველოს სსკ-ის 353 მულის პირველ ნაწილზე.
მზია ამაღლობელი ცნობილ იქნეს დამნაშავედ სსკ-ის 353-ე მუხლის პირველი ნაწილით გათვალისწინებული დანაშაულის ჩადენისათვის და ძირითადი სასჯელის სახედ და ზომად განესაზღვროს თავისუფლების აღკვეთა ორი წლის ვადით.
მზია ამაღლობელის მიმართ შეფარდებული აღკვეთის ღონისძიება პატიმრობა გაუქმდეს, მზია ამაღლობელს სასჯელის მოხდის ვადის ათვლა დაეწყოს დაკავების დღიდან 2025 წლის 12 იანვრიდან განაჩენი რეაგირებისთვის გადაეგზავნოს სასჯელაღსრულების შესაბამის დაწესებულებას”, – განაცხადა მოსამართლემ და დარბაზი დატოვა.
მზია ამაღლობელის ადვოკატის, მაია მწარიაშვილის შეფასებით, ამ განაჩენით ხელისუფლება “სახის შენარჩუნებას” შეეცადა:
“სინამდვილეში ეს არის საკუთარი თავის და სახის გადარჩენის მცდელობა და სამართალთან ამას საერთო არაფერი აქვს”
მან თქვა, რომ სინამდვილეში ეს არის არა განაჩენი, არამედ დასჯის დემონსტრაციული აქტი:
“აბსოლუტურად უინტერესოა, ოთხი წელი იქნებოდა თუ ორი წელი. სასამართლომ და სასამართლოს უკან, იცით ვისაც ვგულისმხობ, მთელი ხელისუფლება იყო ჩართული მზიას წინააღდეგ ცილისმწამებლურ კამპანიაში, ეს იყო მათთვის ვითომ სახის შენარჩუნების მცდელობა. ამას არაფერი საერთო არ აქვს 353-ე მუხლის კვალიფიკაციასთან. გასაგებია, რომ ეს ყველას ბრძოლის შედეგია, მაგრამ ეს არ არის სამართალი“, – განაცხადა ადვოკატმა.
ბათუმის საქალაქო სასამართლოში, ისევე როგორც ყველა პროცესზე, ამჯერადაც ხალხმრავლობა იყო. დარბაზში შესვლის მსურველებმა რიგი ერთი საათით ადრე დაიკავეს და მაინც, მათი დიდი ნაწილი გარეთ დარჩა.
სასამართლო პროცესს ისევ ესწრებოდა საქართველოს მეხუთე პრეზიდენტი სალომე ზურაბიშვილი. ის ერთ-ერთი პირველი შეუშვეს დარბაზში მანდატურებმა.
მზია ამაღლობელი სასამართლოში პროცესის დაწყებამდე დაახლოებით 40 წუთით ადრე მიიყვანეს. “პუბლიკის” ჟურნალისტმა მინდია გაბაიძემ შეძლო მისი განწყობის დაფიქსირება სასჯელაღსრულების მანქანაში.
ვიდეოში ჩანს, რომ მზია მხნედ არის, იღიმის და ჟურნალისტის ხმაზე მას ხელის აწევით ესალმება.
მზია ამაღლობელის გულშემატკივრებმა სასამართლოსთან შეკრება დილიდან დაიწყეს. კოლეგები და მეგობრები მას ამჯერადაც შეძახილებით დახვდნენ.
სასამართლოს შენობის მიმდებარედ, ქუჩაში, დილიდან ხმის გამაძლიერებლით ისმოდა ამონარიდები მზია ამაღლობელის საბოლოო სიტყვიდან. საბოლოო სიტყვები მზია ამაღლობელმა 4 აგვისტოს თქვა.
“ეს განაჩენი მარტო ჩემი სასჯელი არ იქნება. ეს იქნება თქვენი სასჯელიც, ბატონო პროკურორებო. ეს იქნება ყველა იმ პირის პროფესიული სასჯელი, რომელიც სახელმწიფოს მხრიდან ჩართული იყო ამ საქმეში“, – თქვა მან საბოლოო სიტყვაში.
განაჩენის გამოცხადების პარალელურად, გულშემატკივრები მზია ამაღლობელის მხარდასაჭერად სასამართლოს მიმდებარედ აქციას მართავდნენ. მიმდებარე ტერიტორია ხალხით იყო სავსე.
“თავისუფლება მზიას”, “მზია შვიდი თვეა ტყვეა”, “მეფე შიშველია”,”შეწყვიტეთ უკანონობა” – ამ და მსგავსი წარწერებით იდგნენ ადამიანები სასამართლოს მიმდებარედ.
განაჩენის გამოცხადების შემდეგ მზია ამაღლობელი რუსთავის ციხეში ისევ ტაშის და გამამხნევებელი შეძახილების ფონზე გააცილეს.
“სილა რეჟიმს” – აჩვენა წარწერა ეტაპირების მანქანიდან მზია ამაღლობელმა მის გულშემატკივრებს.
