სენატორი მარკო ლომბარდო: მზია ამაღლობელი და ნინო დათაშვილი არ არიან დამნაშავეები — ისინი პოლიტპატიმრები არიან
მზია ამაღლობელი და ნინო დათაშვილი
4 აგვისტოს იტალიის სენატში მოსმენის დროს გავლენიანმა სენატორმა მარკო ლომბარდომ საქართველოში მიმდინარე რეპრესიებზე ისაუბრა. მან ყურადღება გაამახვილა როგორც მზია ამაღლობელზე, ასევე ნინო დათაშვილზე. მისი თქმით, მზია ამაღლობელი და ნინო დათაშვილი არ არიან დამნაშავეები — ისინი პოლიტპატიმრები არიან, “ქართული ოცნება” კი რეჟიმია.
რა თქვა მარკო ლომბარდომ
“მსურს სენატს გავაცნო ქართველ ჟურნალისტის, მზია ამაღლობელის საქმე. იგი დააკავეს იანვარში მას შემდეგ, რაც პოლიციის ოფიცერს, ირაკლი დგებუაძეს,სილა გააწნა. ეს სილა იყო მისი რეაქცია ფიზიკურ ძალადობაზე, აბუჩად აგდებაზე, ფურთხზე. მას არ მისცეს წყალი და არ მისცეს საპირფარეშოში წასვლის საშუალება.
“ჩაიფსი!“ – სწორედ ამ სიტყვებმა გამოიწვია იმ სილის გაწვნა. ამ სილას მოჰყვა მისი დაპატიმრება, რომელიც უკვე მეშვიდე თვეა გრძელდება. ამ სილის გამო მას ემუქრება შვიდ წლამდე თავისუფლების აღკვეთა.
დღეს მას შესთავაზეს საპროცესო შეთანხმება — ჰქონდა შესაძლებლობა დაბრუნებოდა თავისუფლებას, მაგრამ მან უარი თქვა რადგან ეს მისთვის, როგორც გამოხატა, „ცოცხლად დამარხვის“ტოლფასი იქნებოდა.
მინდა ამ დარბაზში მოვიტანო მისი სიტყვები, რომელშიც უდიდესი გამბედაობა ჩანს:
“თქვენი სოლიდარობის წყალობით გადავრჩი. ნუ დაკარგავთ რწმენას საკუთარი თავის! ჯერ კიდევ არის დრო იბრძოლოთ გამარჯვებამდე! არ დაკარგოთ იმედი! მე მჯერა თქვენი! მჯერა, რომ როგორი მტრულიც არ უნდა იყოს გარემო, რომელშიც მოქმედებთ, ყოველი თქვენი ნაბიჯი იქნება ღირსეული— მიმართული თავისუფალი აზრისა და სიტყვის დასაცავად.“
მზიას, მხოლოდ ამ სილის გამო, კიდევ ერთხელ ვიმეორებ, შვიდ წლამდე პატიმრობა ემუქრება.!
ამ სიტყვებს იმიტიმ ვკითხულობ, რომ დღეს, სასამართლომ, გადაწყვეტილების გამოცხადება 6 აგვისტომდე გადადო.
ნინო დათაშვილი კი, პედაგოგი ქალი, შესაძლოა ფსიქიატრიულ დაწესებულებაში გადაიყვანონ, ფსიქიკური არასტაბილურობის მოტივით! მაგრამ მისი გონება ნათელია, თავისუფალია, დამოუკიდებელია!
მის ხმას ემოცია არღვევს, მაგრამ მისი ზურგი არ ტყდება და მისი სული არ იჩოქებს უსამართლობის წინაშე! ფსიქიკური ჯანმრთელობის გამოყენება პოლიტიკური დევნის იარაღად — ეს ტიპური ხერხია ავტორიტარული რეჟიმებისთვის!
მზია ამაღლობელი და ნინო დათაშვილი არ არიან დამნაშავეები — ისინი პოლიტპატიმრები არიან! “ქართული ოცნება“ არ არის ლეგიტიმური მთავრობა — ეს არის რეჟიმი!
დასასრულს, ქალბატონო თავმჯდომარევ: როდესაც ამ მთავრობის ზოგიერთი წარმომადგენელი გვეუბნება, რომ შეხვდნენ საქართველოს “ხელისუფლების” წარმომადგენლებს იმიტომ, რომ “არ შეიძლება საქართველოს მთავრობა შევატოვოთ რუსეთს ხელში“, მიჩნდება ფიქრი, რომ იტალიის ამოცანა – ჩვენი მთავრობის ამოცანა, ჩვენი მორალური ვალდებულება უნდა იყოს არა ქართული მთავრობის, არამედ ქართველი ხალხის არ მიტოვება რუსეთის ხელში!
ეს ახალგაზრდები მხოლოდ დემოკრატიას, თავისუფლებას და მშვიდობას ითხოვენ!
ჩვენი ამოცანა კი არის ვუთხრათ მათ:
“იყავით ძლიერები, რადგან თქვენ მარტო არ ხართ!“— თქვა მან.
4 აგვისტოს, მზია ამაღლობელის სასამართლო პროცესი სულ რაღაც ნახევარ საათს გაგრძელდა. პროცესზე სიტყვით გამოვიდა თავად მზია ამაღლობელი, რის შემდეგაც მოსამართლემ სხდომა 6 აგვისტოს 14 საათამდე გადადო. სავარაუდოდ, ამ დროს გამოცხადდება განაჩენი.
როგორც წინა პროცესებზე, ახლაც ხალხმრავლობა იყო და დარბაზში შესვლა უამრავმამსურველმა ვერ შეძლო. სასამართლო დარბაზში კვლავ იმყოფებოდა საქართველოს მეხუთე პრეზიდენტი სალომე ზურაბიშვილი, ასევე – წარმომადგენელი ევროკავშირის დელეგაციიდან მარი-კეროლინ ვერტომენი.
დასკვნითი სიტყვის წარმოთქმისას მზია ამჯერადაც ფეხზე იდგა და ძალიან ღელავდა. დროდადრო სიტყვა უწყდებოდა და ცრემლებიც ერეოდა.
ამასთან, ორგანიზაციამ “პარტნიორობა ადამიანის უფლებებისთვის“ 2 აგვისტოს გაავრცელა ინფორმაცია, რომ პროკურატურამ დაკავებული აქტივისტისა და მასწავლებლის ნინო დათაშვილის მიმართ ფსიქიატრიული ექსპერტიზის ჩატარება მოითხოვა, სასამართლომ კი აღნიშნული შუამდგომლობა დააკმაყოფილა. გადაწყვეტილება 2025 წლის ივლისში ახლადდანიშულმა მოსამართლემ, ფიქრია სიქტურაშვილმა მიიღო.
ადვოკატების განმარტებით, თუ ნინო დათაშვილი ექსპერტიზის ჩატარების წინააღმდეგი იქნება, მის მიმართ გამოყენებული იქნება იძულების პროპორციული ღონისძიებები.
ნინო დათაშვილი თბილისის საქალაქო სასამართლოში 9 ივნისს მომხდარი ფაქტის გამო 20 ივნისს დააკავეს. მას ბრალდება საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით წარედგინა, რაც საჯარო მოსამსახურეზე თავდასხმას მის მიერ სამსახურებრივი მოვალეობის შესრულების დროს გულისხმობს. კერძოდ სასამართლოს მანდატურზე თავდასხმას. აღნიშნული სასჯელი ჯარიმას, ან 4-დან 7 წლამდე თავისუფლების აღკვეთას ითვალისწინებს.
