საქართველოში "მტკიცე სული 2025-ის" მრავალეროვნული საერთაშორისო წვრთნები დაიწყო
მტკიცე სული 2025
საქართველოში “მტკიცე სული 2025-ის” მრავალეროვნული საერთაშორისო წვრთნები დაიწყო. Agile Spirit 2025 მრავალეროვნული საერთაშორისო წვრთნები 25 ივლისიდან 6 აგვისტოს ჩათვლით გაიმართება.
საერთაშორისო წვრთნები აშშ-ს ევროპული სარდლობის მიერაა დაგეგმილი, რომელიც ევროპასა და აფრიკაში აშშ-ს არმიის ხელმძღვანელობით ტარდება. მიმდინარე წლის სწავლებაში საქართველოსთან ერთად მონაწილეობას ბულგარეთი, გერმანია, ლიტვა, მოლდოვა, პოლონეთი, რუმინეთი, თურქეთი და უკრაინაც მიიღებენ.
აღსანიშნავია, რომ წვრთნების გახსნას არ ესწრებოდნენ “ქართული ოცნების” პრეზიდენტი მიხეილ ყაველაშვილი და თავდაცვის მინისტრი ირაკლი ჩიქოვანი.
მსგავსი წვრთნები საქართველოში 2023 წლის მერე არ ჩატარებულა.
● დიდი ბრიტანეთის საელჩო: სამწუხაროდ, ქართული ოცნება ჩამოშორდა ევროატლანტიკურ თანამშრომლობას
“მტკიცე სული 2025” ხაზს უსვამს შავი ზღვის რეგიონში უსაფრთხოებისა და სტაბილურობისადმი აშშ-ს ერთგულებას და ყურადღებას ამახვილებს უსაფრთხოების მხრივ საერთო გამოწვევების წინაშე მტკიცე ალიანსებისა და პარტნიორობის მნიშვნელობაზე.
სწავლება მასპინძელი ქვეყნების თანახელმძღვანელობით ტარდება და მისი მიზანი რეგიონულ უსაფრთხოებაში თანამშრომლობის გაძლიერება, სამხედრო შესაძლებლობების გაუმჯობესება, ინოვაციების ინტეგრირება და NATO-სა და მონაწილე პარტნიორ ქვეყნებს შორის თავსებადობის ხელშეწყობაა.
“2025 წლის 21 ივლისს აშშ-ს არმიის პარაშუტისტებმა, რომლებიც 173-ე საჰაერო-სადესანტო ბრიგადის 91-ე საკავალერიო პოლკის პირველ ესკადრილიაში იყვნენ განლაგებულნი, დაახლოებით 100 თურქ პარაშუტისტთან ერთად თურქეთში ერთობლივი საჰაერო ოპერაცია ჩაატარეს. ოპერაციას მოჰყვა მრავალეროვნული სასწავლო ღონისძიებებისთვის, მათ შორის საცეცხლე მომზადებისთვის, საქართველოში გადაადგილების პროცესი.” – წერია ევროპასა და აფრიკაში აშშ-ს არმიის ვებგვერდზე.
კომენტარი
გიორგი თავდგირიძე, პოლკოვნიკი, სამხედრო ექსპერტი: “საქართველო მრავალეროვნულ სამხედრო სწავლებას “მტკიცე სული“ (Agile Spirit) მეთორმეტედ მასპინძლობს. სწავლება კრწანისში, ნატო-საქართველოს წვრთნებისა და შეფასების ერთობლივ ცენტრში (JTEC) ოფიციალურად გაიხსნა. საერთაშორისო წვრთნებში მონაწილე ქვეყნების სამხედრო მოსამსახურეებს სიტყვით მიმართა თავდაცვის მინისტრის პირველმა მოადგილემ პაატა პატიაშვილმა, თავდაცვის ძალების მეთაურის მოადგილემ, გენერალ-მაიორმა ირაკლი ჭიჭინაძემ და ევროპასა და აფრიკაში აშშ-ის მე-7 არმიის წვრთნების სარდლობის მეთაურმა, ბრიგადის გენერალმა ტერი ტილისმა.
ღონისძიებას არ ესწრებოდა, “ქართული ოცნების“ თავდაცვის მინისტრი ირაკლი ჩიქოვანი. ასევე გაუგებარია თავდაცვის ძალების უფროსის და გენერალური შტაბის უფროსის დუმილი.
რუსი ბლოგერები გესლს ანთხევენ, მათვის წარმოუდგენლად მტკივნეული დარტყმაა ნატოს დაბრუნება საქართველოში და ოცნების უსუსურობის ყურება. აწი რაც არ უნდა იძახოს ოცნებამ ჩემი ბრალია არ არისო, რუსების თვალწინ, ოცნებაა გააბახეს.
ოცნება, თავისი უსუსურობის მიუხედავად, ჩვენ მოთმინებაზე და შიშზე დგას.”
